Read ბიბლია სიბრძნე სოლომონისა 18 Bible Online

სიბრძნე სოლომონისა 18 - ბიბლია bible

სიბრძნე სოლომონისა 18

¹შენს წმიდათათვის კი ნათობდა უდიადესი ნათელი; ხოლო მტრებს ესმოდათ მათი ხმა, მაგრამ ხედვით კი ვერ ხედავდნენ, და ნეტარად მიაჩნდათ ისინი, რადგანაც არ იტანჯებოდნენ.

²მადლობას უხდიდნენ მათ იმის გამო, რომ არ ცდილობდნენ შური ეძიათ იმ ბოროტებისთვის, რაც მტარვალთაგან დაეთმინათ, და შენდობას სთხოვდნენ მათ.

³ამიტომაც მიეცი მათ ცეცხლოვანი სვეტი გზის მაჩვენებლად და უხიფათო მგზავრობისათვის — უვნებელი მზე.

⁴მტრები კი იმსახურებდნენ იმას, რომ არ ღირსებოდათ ნათელი და წყვდიადის ტყვეებად დარჩენილიყვნენ, რადგანაც დატყვევებული ჰყავდათ შენი შვილები, რომელთა მეშვეობითაც სჯულის უხრწნელი ნათელი უნდა მისცემოდა სამყაროს.

⁵როცა მათ განიზრახეს ამოეჟლიტათ წმიდათა ყრმები, თუმცა ერთი მიგდებული ჩვილი მაინც გადარჩა, სანაცვლოდ ურიცხვი შვილი წაართვი მათ და ბობოქარ წყალში მოაშთვე ყველანი ერთად.

⁶ეს ღამე წინასწარ ეუწყათ ჩვენს წინაპრებს, რათა მტკიცედ სცოდნოდათ აღთქმა, რაც ირწმუნეს, და მხნედ ყოფილიყვნენ.

⁷და შენი ხალხი ელოდა, როგორც მართალთა ხსნას, ისე მტრების დაღუპვასაც.

⁸და მართლაც, რითაც მტრები დასაჯე, იმითვე განგვადიდე ჩვენმა მხმობელმა.

⁹კეთილთა წმიდა შვილები ფარულად სწირავდნენ მსხვერპლს და ერთსულოვნად დაადგინეს საღვთო სჯულად, რომ წმიდათა წილხვედრი თანაბრად ყოფილიყო სიკეთეც და განსაცდელიც, და უკვე გალობდნენ მამათა საგალობლებს.

¹⁰საპირისპირო მხრიდან კი ისმოდა მტრების გნიასი და საწყალობელი მოთქმა-გოდება, რითაც გლოვობდნენ დაღუპულ შვილებს.

¹¹ერთნაირად დაისაჯა ყმაც და ბატონიც; მდაბიოც ისევე ეწამა, როგორც მეფე.

¹²უკლებლივ ყველას წინ ესვენა ურიცხვი მკვდარი და მკვდართა დასამარხად ცოცხლები აღარ კმაროდნენ, რადგანაც ერთ წამში მოისრა მათი რჩეული მოდგმა.

¹³და ყველამ, ვისაც ჯადოქრობის გამო არა სწამდა რა, პირმშოთა დაღუპვისას ღვთის შვილად აღიარა ჩვენი ხალხი.

¹⁴ვინაიდან, როცა ყველაფერი მყუდროებამ მოიცვა და თავისი დინებით მალე განახევრდა ღამე,

¹⁵დასაღუპად განწირული ქვეყნის შუაგულზე ცათა სამეუფო ტახტთაგან მრისხანე მეომარივით გადმოვიდა შენი ყოვლისმძლე სიტყვა და თან მოჰქონდა ბასრი მახვილი — შენი ურყევი ბრძანება,

¹⁶დადგა და სიკვდილით აღავსო ყოველი; ზეცას სწვდებოდა ქვეყნად მოარული.

¹⁷მაშინ უეცრად შეაძრწუნა ისინი სიზმარეულმა ხილვებმა და თავზარი დაეცა ყველას.

¹⁸ვინ სად ეცემოდა ცოცხალ-მკვდარი, ვინ სად, და აღიარებდა თავისი დაღუპვის მიზეზს.

¹⁹ვინაიდან თავზარდამცემმა სიზმრებმა ყველაფერი წინასწარ აუწყეს მათ, რათა სიკვდილის წინ მაინც სცოდნოდათ, თუ რისთვის იტანჯებოდნენ ასე სასტიკად.

²⁰თუმცა სასიკვდილო განსაცდელმა მართლაც უწია და მრავალი მათგანი დაიღუპა უდაბნოში, მაგრამ ეს რისხვა დიდხანს არ გაგრძელებულა.

²¹რადგანაც ისწრაფა უბიწო კაცმა მათდა შეწევნად და ხელთ იპყრა საჭურველი თავისი მსახურებისა — ლოცვა და საკმეველი წყალობის გამოსათხოვად; წინ აღუდგა რისხვას და ზღვარი დაუდო უბედურებას, რითაც ცხადყო, რომ შენი მსახური იყო.

²²მან სძლია მტერი, მაგრამ არა სხეულის თუ საჭურვლის ძალით, არამედ მარტოოდენ სიტყვით შემუსრა იგი, როცა გაიხსენა წინაპართათვის მიცემული ფიცი და აღთქმანი.

²³როცა უკვე აღიმართა გვამების გროვა, შუაში ჩადგა, შემუსრა მომხდურთა რისხვა და ცოცხლებისკენ სავალი გზა გადაუღობა.

²⁴მისი მოსასხამი მთელ სამყაროს განასახიერებდა, ოთხრიგად ჩაყოლებულ ძვირფას ქვებზე წინაპართა დიდება იყო აღბეჭდილი, ხოლო მის დიადემაზე — შენი სიდიადე.

²⁵სწორედ ამის წინაშე უკუიქცა შემმუსვრელი და მასვე შეუკრთა, რადგან რისხვის ეს ერთი განსაცდელიც საკმაო იყო.