Read ბიბლია სიბრძნე სოლომონისა 2 Bible Online

სიბრძნე სოლომონისა 2 - ბიბლია bible

სიბრძნე სოლომონისა 2

¹უმართებულოდ განმსჯელნი ეუბნებოდნენ ერთმანეთს: „ხანმოკლე და მწუხარეა ჩვენი ცხოვრება, ადამიანი თავს ვერ დააღწევს სიკვდილს და არც საიქიოსაგან დამხსნელი ეგულება ვინმე.

²შემთხვევით დავიბადეთ და შემდეგაც ისე ვიქნებით, როგორც არყოფილნი; რადგანაც სუნთქვა ჩვენს ნესტოებში კვამლია მხოლოდ, აზრი კი ჩვენი გულის ფეთქვით გამკრთალი ნაპერწკალი.

³მისი ჩაქრობისთანავე სხეულიც ჩაიფერფლება და სუნთქვაც განქარდება, როგორც ჰაერის ქროლვა.

⁴თანდათანობით დაივიწყებენ ჩვენს სახელს, აღარავინ ახსენებს ჩვენს ნამოქმედარს, ღრუბელივით უკვალოდ ჩაივლის ჩვენი ცხოვრება და გაქრება, როგორც მზის სხივებით დაწეწილი და მისი მცხუნვარებით განწონილი ნისლი.

⁵რადგან აჩრდილივით მსწრაფლწარმავალია ჩვენი ცხოვრება, ვერვინ გარდაგვივლენს აღსასრულს, ვინაიდან ბეჭედი დასმულია და არავინ ბრუნდება უკან.

⁶მაშ, შევიტკბოთ დღევანდელი სიკეთე, მოვისთვლათ წლების ნაყოფი და სიჭაბუკით ვიხაროთ.

⁷აღვივსოთ ძვირფასი ღვინითა და კეთილსუნელებით, ნუ გავუშვებთ ხელიდან გაზაფხულის ყვავილს.

⁸ვიდრე არ დამჭკნარა, კოკობი ვარდის გვირგვინით შევიმკოთ შუბლი.

⁹ნურავინ დააკლდება ამ ჩვენს ღრეობას, ყველგან დავტოვოთ სიხარულის კვალი, რადგან ესაა ჩვენი წილი და ხვედრი.

¹⁰კისერი მოვუგრიხოთ ალალმართალ ღატაკს, ნუ დავინდობთ ქვრივებს და ნურც მოხუცის ჭაღარას დავერიდებით.

¹¹ჩვენი ძალა სამართლის საზომად იქცეს, რადგანაც უძლურება უბადრუკია.

¹²მახე დავუგოთ მართალს, რადგანაც გულს გვიწყალებს და ხელს გვიშლის; გვიკიჟინებს: სჯულის წინაშე სცოდავთო, და უზრდელობას გვაყვედრის.

¹³ღვთისმცოდნეობას იჩემებს და უფლის შვილად მოაქვს თავი.

¹⁴ჩვენი ზრახვების მამხილებლად გვექცა და თვალით დასანახავადაც კი გვიმძიმს.

¹⁵რადგან მისი ცხოვრება არა ჰგავს სხვების ცხოვრებას და განსხვავებულია ბილიკი მისი.

¹⁶გაიძვერებად მივაჩნივართ, თავს არიდებს ჩვენს გზას, როგორც უწმინდურს; ნეტარებად რაცხს მართალთა აღსასრულს და იქადის, ჩემი მამააო ღმერთი.

¹⁷ვნახოთ, მართალია თუ არა მისი სიტყვები და გამოვცადოთ იგი აღსასრულისას.

¹⁸თუ მართლაც ჭეშმარიტი ძეა ღვთისა, უფალი დაიფარავს და დაიხსნის მტრების ხელიდან.

¹⁹შეურაცხყოფითა და წამებით გამოვცადოთ იგი, რათა დავრწმუნდეთ მის თვინიერებაში და უბოროტობა მისი ვიხილოთ.

²⁰სამარცხვინო სიკვდილი მივუსაჯოთ, რადგანაც, მისივე თქმისა არ იყოს, ღვთისაგან არ გაიწირება.“

²¹ასე განსაჯეს, მაგრამ შეცდნენ, მათივე ბოროტებით დაბრმავებულნი.

²²ვერც ღვთის საიდუმლონი შეიცნეს, არც სიწმიდის საზღაურს ელოდნენ და არც უბიწო სულთა ჯილდო ჩაუგდიათ რამედ.

²³რადგანაც ღმერთმა უხრწნელად გამოსახა, შექმნა ადამიანი, თავისი მარადიულობის ხატად შექმნა იგი.

²⁴მაგრამ ეშმაკის მოშურნეობით სიკვდილი შემოვიდა სამყაროში და ეშმაკის კერძთა ხვედრია იგი.