Read ბიბლია სიბრძნე სოლომონისა 4 Bible Online

სიბრძნე სოლომონისა 4 - ბიბლია bible

სიბრძნე სოლომონისა 4

¹უმჯობესია უშვილობა სათნოებით, რადგანაც უკვდავი იქნება სათნოების ხსოვნა, რადგან ღმერთიც აღიარებს და ადამიანიც.

²ვიდრე ჩვენთანაა, მას ბაძავენ, ხოლო როცა გაგვეცლება, მისკენ ილტვიან, და საუკუნო სოფელში გვირგვინით შუბლშემკული ზეიმობს, როგორც უბიწო ღვაწლით ბრძოლის მომგები.

³უღვთოთა ნაყოფიერება უსარგებლოა და მემრუშეთა ამონაყარი ღრმად ვერ გაიდგამს ფესვს და ვერც მკვიდრად დაეფუძნება.

⁴ერთხანს კიდევაც რომ გაშალოს რტონი, უნიადაგოს ქარი შეარყევს და აღმოიფხვრება გრიგალისაგან.

⁵მოტყდება უმწიფარი ტოტი, ფუჭი იქნება მისი ნაყოფი, მკვახე და ყოვლად უვარგისი.

⁶უსჯულო ძილში შობილნი მშობელთა სიძვის მოწმენი არიან მათი განკითხვისას.

⁷მართალი კი, ნაადრევადაც რომ აღესრუ-ლოს, სიმშვიდეს დაიმკვიდრებს.

⁸რადგანაც საპატიო სიბერეს დღეგრძელობა როდი განაპირობებს და არც წელთა რიცხვით განიზომება.

⁹სიბრძნე ჭაღარაა კაცთათვის და უბიწო ცხოვრება — სიბერის ასაკი.

¹⁰ვინც ღვთივსასურველი იყო, შეიყვარა უფალმა, და ვინც ცოდვილთა შორის ცხოვრობდა, მათ განარიდა,

¹¹რათა ბოროტებას არ შეეცვალა მისი გონება ან მზაკვრობას არ შეეცდინა მისი სული.

¹²რადგანაც ბიწიერების ხიბლი ჩრდილავს სიკეთეს და უბოროტო გონებას რყვნის ვნებათა ღელვა.

¹³ვინც მოკლე ხანში ეზიარა სრულქმნილებას, წელთა სიმრავლეს მიაღწია.

¹⁴ღვთივსასურველი იყო მისი სული და ამიტომაც განარიდა მალე უკეთურობის წიაღს; ხალხმა იხილა ეს და ვერ მიხვდა, აზრადაც არ მოსვლია,

¹⁵რომ უფლის მადლი და წყალობა მის რჩე-ულებს ეკუთვნის და რომ ის თავის წმიდებზე ზრუნავს.

¹⁶მართალი თავისი სიკვდილით მსჯავრსა სდებს ცოცხალ უღვთოებს, ხოლო მისი ნაადრევად სრულქმნილი სიჭაბუკე — უსჯულოს ხანგრძლივ სიბერეს.

¹⁷ამრიგად, ისინი იხილავენ ბრძენის აღსასრულს, მაგრამ ვერ მიხვდებიან, რა ისურვა მისთვის უფალმა ან რად დაიფარა იგი.

¹⁸იხილავენ და შეურაცხყოფენ, უფალს კი სასაცილოდ არ ეყოფა ისინი.

¹⁹რის შემდეგაც იქცევიან შეურაცხ ცხედრებად და საუკუნო სირცხვილად მკვიდრთა შორის, რადგან უფალი პირქვე დაამხობს ხმაჩაწყვეტილთ, ძირფესვიანად შეარყევს მათ, მარად ტანჯულნი იქნებიან როგორც ყამირი და წარიხოცება მათი ხსოვნა.

²⁰განკითხვისას შიშით წარსდგებიან თავიანთი ცოდვების გამო და მათივე უსჯულოებანი ამხილებენ მათ.