Read ბიბლია სიბრძნე სოლომონისა 6 Bible Online

სიბრძნე სოლომონისა 6 - ბიბლია bible

სიბრძნე სოლომონისა 6

¹მაშ, მისმინეთ და შეიგნეთ, მეფენო, ისწავლეთ მთელი დედამიწის მსაჯულნო!

²ყურად იღეთ, მრავალთა მბრძანებელნო, ქედმაღლურად რომ დაჰყურებთ ხალხებს!

³უფალმა მოგანიჭათ ძალაუფლება, უზენაესმა — მეუფება; ის გამოიძიებს თქვენს საქმეებს და თქვენს ზრახვებსაც გამოსცდის.

⁴რადგანაც მისი სამეფოს მსახურნი იყავით, მაგრამ სამართლიანად არ განსაჯეთ, არც სჯული აღასრულეთ და არც ღვთის ნებისამებრ წარმართეთ თქვენი ნაბიჯი.

⁵თავზარდამცემად გამოგეცხადებათ მალე, რადგანაც მკაცრი იქნება აღზევებულთა მსჯავრი.

⁶საწყალი კაცი შეწყალების ღირსია, ძლიერთ კი მკაცრად მოეკითხებათ.

⁷რადგანაც ყოველთა მეუფე არავის მოარიდებს სახეს და არც მათ სიდიადეს შეუშინდება: მან შექმნა დიდიც და პატარაც და ერთია მისი ზრახვა ყველასთვის.

⁸თუმცა ძალმოსილთ მკაცრი გამოცდა ელით.

⁹ასე რომ, მბრძანებელნო, თქვენდამია მომართული ჩემი სიტყვები, რათა ეზიაროთ სიბრძნეს და არ დაეცეთ.

¹⁰რადგანაც სიწმიდის სიწმიდით შემნახველნი განიწმიდებიან და გამართლებას ჰპოვებენ მასში განსწავლულნი.

¹¹მაშ, დაეწაფეთ ჩემს სიტყვებს, შეიყვარეთ და შეიძენთ ცოდნას.

¹²ნათელი და უჭკნობია სიბრძნე, მის მოყვარულთათვის ადვილად საჭვრეტი და მისი მძებნელნი ჰპოვებენ მას.

¹³წინასწარაც კი ეცხადება მისი შეცნობის მოსურნეთ.

¹⁴ვინც დილიდანვე ისწრაფვის მისკენ, არ დაიღლება, თავის კართანვე იპოვის ჩამომჯდარს.

¹⁵მისი წვდომის სურვილი გონების სრულქმნილებაა და ვინც მისთვის ფხიზლობს, მალე დააღწევს თავს საზრუნავს.

¹⁶რადგან სიბრძნე თვითონვე ეძებს იმას, ვინც მისი ღირსია, კეთილმოსურნედ ეცხადება გზაზე და მის ყოველ ფიქრს წინ ეგებება.

¹⁷სიბრძნის დასაბამი სწავლის უჭეშმარიტესი სურვილია, ხოლო სწავლაზე ზრუნვა — მისი სიყვარული.

¹⁸სიყვარული კი ისაა, რომ დაიცვა მისი კანონები, ხოლო კანონთა დაცვა უკვდავების საწინდარია.

¹⁹უკვდავება კი ღმერთთან გვაახლოებს.

²⁰ამიტომაც მეუფებამდე გვამაღლებს სიბრძნის წყურვილი.

²¹ამიტომ, ტახტით და სკიპტრით რომ ხარობთ, ხალხთა მბრძანებელნო, პატივი მიაგეთ სიბრძნეს, რათა წარუვალი იყოს თქვენი მეფობა.

²²მაგრამ რა არის სიბრძნე, ან საიდან იღებს დასაბამს? გაგიცხადებთ საიდუმლოს, არ დაგიმალავთ; ვეცდები გამოვიკვლიო თვით მისი პირველსაწყისი, ნათელი მოვფინო მისი შემეცნების არსს და გვერდი არ ავუაროთ ჭეშმარიტებას.

²³შურით ჩამომდნართან ერთად არ დავადგები გზას, რადგანაც შურიანი ვერ ეზიარება სიბრძნეს.

²⁴ბრძენთა სიმრავლე სამყაროს ხსნაა, გონიერი მეფე კი — ხალხის კეთილდღეობა.

²⁵ასე რომ, ჩასწვდით ჩემს სიტყვებს და ეს სარგო იქნება თქვენთვის.