Read ბიბლია სიბრძნე სოლომონისა 7 Bible Online

სიბრძნე სოლომონისა 7 - ბიბლია bible

სიბრძნე სოლომონისა 7

¹მეც მოკვდავი კაცი ვარ, როგორც ყველანი, მიწისგან პირველნაზელის შთამომავალი და დედის საშოში ნაძერწი ხორცი,

²ათი თვის მანძილზე სისხლში შედედებული მამაკაცის თესლისა და ტკბობისაგან, რომელსაც თან ახლავს ძილი.

³ვიშვი და შევისაუნთქე ჰაერი, რომელიც საერთოა ყოველი ჩვენგანისთვის, დავენარცხე იმავე მიწას, ტანჯვის საერთო საუფლოს, და პირველად, როგორც ყველამ, ტირილით გავიღე ხმა.

⁴რუდუნებით მზრდიდნენ ჩვრებში გახვეულს,

⁵რადგანაც არცერთ მეფეს დაბადებისას არ ჰქონია სხვაგვარი დასაბამი.

⁶რადგანაც ყველა ერთნაირად შემოდის ამ ცხოვრებაში და ერთნაირადვე გადის იქიდან.

⁷ამიტომაც ვილოცე და მომეცა გონი, ვუხმე და სული სიბრძნისა გადმოვიდა ჩემზე.

⁸კვერთხსა და ტახტს ვარჩიე იგი და არად ჩავაგდე სიმდიდრე მასთან შედარებით.

⁹ვერც პატიოსანი თვალი შევადარე მას, რადგანაც მთელი ოქრო ქვიშის უბადრუკი მარცვალია მის წინაშე, ვერცხლი კი — ტალახი მის წინაშე.

¹⁰ტანის სიმრთელესა და სილამაზეზე მეტად შევიყვარე იგი, და მზის შუქს ვამჯობინე, რადგანაც უქრობია მისი ნათელი.

¹¹მან მომიტანა მთელი სიკეთე და ულევი სიმდიდრე მიძღვნა თავისი ხელით.

¹²მე მახარებდა ყველა ეს სიკეთე, რადგანაც მათ სიბრძნე უძღოდა წინ, თუმცა არ ვიცოდი, რომ ის იყო მათი მშობელი.

¹³უზაკველად მისწავლია და უშურველად გავცემ, როდი დავმალავ მის სიმდიდრეს.

¹⁴რადგანაც ამოუწურავი საუნჯეა კაცთათვის და მისი მომხვეჭნი ღმერთს უმეგობრდებიან განსწავლის ნიჭის წყალობით.

¹⁵მხოლოდ მომმადლოს ღმერთმა გონივრული განსჯისა და ღირსეულად ფიქრის უნარი იმაზე, რაც მებოძა, რადგანაც იგია სიბრძნის წინამძღვარი და ბრძენთა წარმმართველი.

¹⁶მის ხელთა ვართ ჩვენცა და ჩვენი სიტყვებიც, მთელი ცოდნაცა და გაწაფულობაც.

¹⁷მან მიბოძა არსთა უტყუარი ცოდნა, რათა ჩავწვდომოდი სამყაროს წყობას და სტიქიონთა ქმედითობას.

¹⁸დროთა დასაბამი, დასასრული და შუახანი, მზებუდობათა მონაცვლეობანი და ალოთა ცვალებადობანი,

¹⁹წლის ბრუნვა და ვარსკვლავთა წყობა,

²⁰ცხოველთა ბუნება და ნადირთა თვისებანი, ქართა ქროლვა და კაცთა ზრახვანი, მცენარეთა სხვადასხვაობა და ძალნი ფესვთანი,

²¹ყოველივე შევიცანი, დაფარულიც და გაცხადებულიც, რადგანაც განვისწავლე სამყაროს შემოქმედის სიბრძნის წყალობით.

²²რადგანაც ის არის სული გონიერი, წმიდა, მხოლოდშობილი, მრავალწილი, ნატიფი, კეთილმოძრავი, ცხადი, შეურყვნელი, ნათელი, უვნებელი, კეთილმოყვარე, დაუოკებელი,

²³ქველმოქმედი, კაცთმოყვარე, მტკიცე, ურყევი, უშფოთველი, ყოვლისმძლე, ყოვლისმხედველი, ყოველი გონიერი, გაწმედილი, ფაქიზი სულის განმწონი;

²⁴რადგანაც ყოველივე მოძრავზე უმოძრავესია სიბრძნე, ყველაფერს რომ განწონის და ყველგან შეაღწევს თავისი სიწმიდით.

²⁵ღვთიური ძალმოსილების სუნთქვაა იგი და ყოვლისმპყრობლის დიდების წმიდა ფენა, ამიტომაც ვერავითარი სიბილწე ვერ შეაღწევს მასში.

²⁶იგია საუკუნო ნათლის ათინათი, ღვთის ქმედითობის უხინჯო სარკე და ხატი მისი სიკეთისა.

²⁷ერთადერთია, მაგრამ ყოვლისმძლე; თვითმყოფი, მაგრამ ყოვლის განმაახლებელი, თაობებიდან თაობებამდე რომ გადადის წმიდა სულებში, რათა ღვთის მოყვრებად და წინასწარმეტყველებად განამზადოს ისინი.

²⁸რადგან ღმერთს მხოლოდ ის უყვარს, ვინც სიბრძნით ცხოვრობს.

²⁹რადგან ის უმშვენიერესია, ვარსკვლავთა ხომლზე უმეტესი და თვით ნათელზე უზენაესი.

³⁰რადგან ნათელი ღამით იცვლება, სიბრძნეს კი ვერ სძლევს ბოროტება.