Read ბიბლია სიბრძნე სოლომონისა 9 Bible Online

სიბრძნე სოლომონისა 9 - ბიბლია bible

სიბრძნე სოლომონისა 9

¹„მამა-პაპათა ღმერთო და წყალობის უფალო, შენი სიტყვით რომ შეჰქმენი ყოველი,

²და შენი სიბრძნით დაჰბადე ადამიანი, რათა მბრძანებლობდეს შენს მიერ გაჩენილ ქმნილებებს,

³სიწმიდით და სიმართლით განაგებდეს ქვეყანას და წრფელი სულით სჯიდეს სამართალს,

⁴მიბოძე შენი თანამოსაყდრე სიბრძნე და ნუ გამომრიცხავ შენს მსახურთაგან,

⁵რადგანაც მონა ვარ შენი და ძე შენი მხევლისა; კაცი უმწეო და დღემოკლე; არმცოდნე მსჯავრისა და სჯულისა.

⁶რადგანაც თვით ყველაზე სრულქმნილიც კი ადამიანის ძეთა შორის არარად შეირაცხება შენი სიბრძნის გარეშე.

⁷შენ ამირჩიე შენი ხალხის მეფედ და შენსავ ძეთა და ასულთა მსაჯულად.

⁸მიბრძანე, ტაძარი ამეგო შენს წმიდა მთაზე და სამსხვერპლო — შენს სამკვიდრებელ ქალაქში, მსგავსებად წმიდა კარვისა, დასაბამითვე რომ განამზადე.

⁹შენთან არს სიბრძნე, რომლისთვისაც ცნობილია შენი საქმენი, რომელიც თან გახლდა, როცა ქმნიდი სამყაროს და რომელმაც იცის, რა ეამება შენს თვალს, ან რაა სწორი შენი მცნებების მიხედვით.

¹⁰მოავლინე იგი წმიდა ცათაგან და შენი დიდების ტახტიდან წარმოგზავნე, რათა შეეწიოს ჩემს შრომას და შემაცნობინოს, რა არის შენი მოსაწონი.

¹¹და რაკი ყოვლისმცოდნეა, ბრძნულად წარმართავს ჩემს საქმეს და დამიფარავს თავისი დიდებით.

¹²შეწყნარებულ იქნებიან ჩემი საქმენი, სამართლიანად განვსჯი შენს ერს და მამაჩემის ტახტის ღირსი გავხდები.

¹³რომელ კაცთაგანს შეუძლია ჩასწვდეს ღვთის ზრახვას, ან ვინ შეიცნობს მის ნებას?

¹⁴რადგანაც მერყევია მოკვდავთა ფიქრი და მათი აზრი — უნდილი.

¹⁵ხრწნადი ხორცი ამძიმებს სულს და ეს მიწიერი კარავი ტვირთად აწევს ფიქრით სავსე გონებას.

¹⁶ძლივს ვხვდებით იმას, რაც მიწაზეა და გვიჭირს იმისი წვდომა, რაც ხელთა გვაქვს, ცისას კი ვინ რას გაიგებს?

¹⁷ან შენს ნებას ვინ შეიცნობდა, სიბრძნე რომ არ გებოძებინა და ზეგარდმო არ მოგევლინა შენი წმიდა სული?

¹⁸ასე გასწორდნენ მიწიერთა გზები, კაცნი მიხვდნენ, რა არის შენი მოსაწონი, და სიბრძნის წყალობით გადარჩნენ.“