Read ბიბლია სიბრძნე ზირაქისა წინათქმა 10 Bible Online

სიბრძნე ზირაქისა წინათქმა 10 - ბიბლია bible

სიბრძნე ზირაქისა წინათქმა 10

¹ბრძენი მსაჯული აღზრდის თავის ხალხს და გონივრულ მმართველობას დაამყარებს.

²როგორიცაა მმართველი ისეთნივე არიან მისი მსახურნი. როგორიცაა ქალაქის თავი, ისეთნივე არიან მისი მცხოვრებნიც.

³უვიცი მეფე დაღუპავს თავის ხალხს, ამა ქვეყნის ძლიერთა გონიერებით კი ქალაქი აყვავდება.

⁴უფლის ხელთაა ქვეყნის მეუფება და საჭირო კაცს დროულად მოუვლენს მას.

⁵უფლის ხელთაა კაცის ბედ-იღბალი და მწიგნობრის სახეზე თავის დიდებას აღბეჭდავს იგი.

⁶ყოველი უსამართლობის გამო ნუ განურისხდები მოყვასს და ნურავის შეურაცხყოფ საქმით.

⁷ქედმაღლობა საძულველია უფლისთვისაც და კაცისთვისაც, უსამართლობა კი დანაშაულია ორივეს წინაშე.

⁸მეუფება ერთი ხალხის ხელიდან მეორისაში გადადის ყოველგვარი უსამართლობის, თავგასულობის და ანგარების გამო.

⁹რას ქედმაღლობს მტვერი და ფერფლი? აკი სიცოცხლეშივე იხრწნება მისი შიგნეული.

¹⁰ხანგრძლივი ავადმყოფობა აყმუვნებს ექიმს; დღეს მეფე, ხვალ კი სიკვდილის კერძი.

¹¹როდესაც კაცი კვდება, მისი მემკვიდრენი ხდებიან ქვეწარმავალნი, მატლნი და მხეცნი.

¹²მზვაობის სათავე კაცის განშორებაა უფლისაგან და მისი გულის განდგომა მისივე შემოქმედისგან.

¹³რადგანაც ცოდვის სათავე მზვაობაა და მზვაობარი სიბილწეს ათხევს. ამიტომაც ურიცხვ განსაცდელს უმზადებს ღმერთი და საბოლოოდ დაღუპავს კიდეც.

¹⁴უფალმა დაამხო მზვაობართა ტახტი და მათ ადგილას თვინიერნი დასხა.

¹⁵უფალმა ძირფესვიანად აღმოფხვრა ხალხები და მათ ნაცვლად ქედმოდრეკილნი დანერგა.

¹⁶უფალმა შემუსრა ხალხთა ქვეყნები და თვით მიწის საძირკვლამდე დაამხო ისინი.

¹⁷გაახმო, მოსრა ზოგიერთი და მიწის პირისაგან აღგავა მათი სახსენებელი.

¹⁸ადამიანთათვის არ შექმნილა ქედმაღლობა და არც მძვინვარება რისხვისა — ქალის ნაშობთათვის.

¹⁹რომელია პატიოსანი მოდგმა? ადამიანის მოდგმა. რომელია პატიოსანი მოდგმა? უფლის მოშიშთა. რომელია უპატიოსნო მოდგმა? ადამიანის მოდგმა. რომელია უპატიოსნო მოდგმა? მცნების დამრღვევთა.

²⁰ძმათა შორის უფროსია პატივდებული, ისევე, როგორც მოშიშნი უფლისა — უფლის თვალში.

²¹მდიდრის, დიდებულისა თუ უპოვარის ქება-დიდება უფლის შიშია.

²²უსამართლობაა დაამცირო გონიერი ღატაკი და უმართებულოა ცოდვილის ქება.

²³პატივდებულია დიდებულიც, მსაჯულიც და მბრძანებელიც, მაგრამ არცერთი არაა უფლის მოშიშზე უმეტესი.

²⁴ბრძენ მსახურს თავისუფალნი მსახურებენ და მცოდნისათვის უცხოა დრტვინვა.

²⁵ბრძნობას ნუ იჩემებ საქმის კეთებისას და ნუ იქადი გაჭირვების ჟამს.

²⁶მაშვრალი, რომელსაც ყველაფერი ბლომადა აქვს, სჯობს, უქნარა ბაქიას, ლუკმა პურიც რომ არ გააჩნია.

²⁷შვილო, თვინიერებით განადიდე სული და ღირსებისამებრ მიაგე პატივი.

²⁸ვინ გაამართლებს, ვინც საკუთარი სულის წინაშე სცოდა? ვინ განადიდებს თავისი სიცოცხლის შეურაცხმყოფელს?

²⁹უპოვარს პატივს სცემენ ცოდნისათვის, მდიდარს კი — მისი სიმდიდრის გამო.

³⁰სიღარიბეში პატივდებული რამდენად უფრო საპატიო იქნება სიმდიდრეში? ხოლო სიმდიდრეში უპატიო რამდენად უფრო უპატიო იქნება სიღარიბეში?