Read ბიბლია სიბრძნე ზირაქისა წინათქმა 11 Bible Online

სიბრძნე ზირაქისა წინათქმა 11 - ბიბლია bible

სიბრძნე ზირაქისა წინათქმა 11

¹თვინიერს სიბრძნე აამაღლებს და დიდებულთა შორის მიუჩენს ადგილს.

²ნუ აქებ კაცს სილამაზისათვის და ნურც გარეგნობის გამო აძაგებ.

³ნუ იქადი სასალუქო სამოსით და დიდების დღეს ნუ ამაღლდები, რადგანაც საკვირველია უფლის საქმენი და კაცთათვის დაფარულნი არიან ისინი.

⁴პატარაა ფუტკარი მფრინველთა შორის, მაგრამ უტკბესია მისი ნაყოფი.

⁵მრავალი მბრძანებელი მსხდარა მიწაზე, იმას კი, ვიზედაც არ ფიქრობდნენ, გვირგვინი ედგა.

⁶მრავალ ძალმოსილს დაუთმენია შეურაცხყოფა, და სახელოვანნი სხვის ხელში ჩავარდნილან.

⁷ნუ ჰგმობ, ვიდრე არ გამოიძიებ, ჯერ დაფიქრდი და შემდეგ შერისხე.

⁸ვიდრე არ მოისმენ, ნუ უპასუხებ და სიტყვას შუა ნუ გააწყვეტინებ.

⁹ნუ დაობ საქმეზე, შენ რომ არ გეხება, და ნუ ზიხარ ცოდვილთა სამსჯავროში.

¹⁰შვილო, ხელს ნუ მიჰყოფ მრავალ საქმეს, რადგან საქმეთა სიმრავლეში უბრალო ვერ დარჩები; თუ მათ გამოუდგები, ვერ დაეწევი და გაქცევითაც ვერ გაექცევი.

¹¹ზოგი შრომობს, ოფლს ღვრის და ჩქარობს, მაგრამ მაინც უგვიანდება.

¹²ზოგი ზანტია, შეწევნის მოიმედე, ძაბუნი და ღარიბ-ღატაკი, მაგრამ კეთილი თვალით გადმოხედა უფალმა და ფეხზე დააყენა დამდაბლებული.

¹³მაღლა ააწევინა თავი და მრავალი განცვიფრდა მის გამო.

¹⁴სიკეთე და სიავე, სიცოცხლე და სიკვდილი, სიღარიბე და სიმდიდრე — უფლისგანაა.

¹⁷უფლის საბოძვარი ღვთისმოსავთ ეძლევათ და მისი კურთხევა სიკეთედ გაჰყვებათ საუკუნოდ.

¹⁸ზოგი თავისი წინდახედულობისა და მომჭირნეობის წყალობით მდიდრდება, და ეს ნაწილია მისი ჯილდოსი.

¹⁹როდესაც იტყვის: სიმშვიდე ვპოვე და ახლა ჩემი სიკეთით ვტკბები. მაგრამ არ იცის, როდის მოვა დრო, როცა თავის მონაგებს სხვებს დაუტოვებს, თვითონ კი აღესრულება.

²⁰მტკიცედ მისდიე შენს აღთქმას, ნუ უღალატებ და შენს საქმეს შეაბერდი.

²¹ნუ გაგაკვირვებს ცოდვილის საქმე. გწამდეს უფლისა და შენი საქმის ერთგული დარჩი, რადგანაც ადვილია უფლის თვალში უცაბედი და ანაზდეული გამდიდრება გლახაკისა.

²²უფლის კურთხევა საზღაურია ღვთისმოსავთათვის, რომელსაც მალე ააყვავებს მისი წყალობა.

²³ნუ იტყვი, რაღა მჭირდება, ამას იქით რა უნდა შევიძინოო?

²⁴ნუ იტყვი, ესეც მეყოფა, ამიერიდან რაღა ბოროტს უნდა ველოდე?

²⁵ბედნიერების დღეს დავიწყებას ეძლევა უბედურება და უბედურების დღეს აღარ ახსოვთ ბედნიერება.

²⁶უფლისთვის ადვილია აღსასრულის დღეს მისი საქმისამებრ მიაგოს ადამიანს.

²⁷წუთიერი ტანჯვა ბედნიერებას გვავიწყებინებს, და ადამიანის აღსასრულისას გაცხადდება მისი საქმენი.

²⁸აღსასრულამდე ნურავის მიიჩნევ ნეტარად; ადამიანი მის ნაშობთაგან შეიცნობა.

²⁹ყველას ნუ შეიყვან სახლში, რადგანაც ურიცხვია მზაკვრობა ცბიერისა.

³⁰რაღა ჩასაფრაბული ბაზი და რაღა მზვაობრის გული, მზირივით რომ უთვალთვალებს შენს უმწეობას;

³¹სიკეთის ბოროტებად მქცეველი უსაფრდება და ჩირქსა სცხებს რჩეულთ.

³²ცეცხლის ნაპერწკლისაგან მრავლდება ნაკვერჩხალი, და ცოდვილი კაცი ჩასაფრებულია სისხლის საღვრელად.

³³ერიდე ბოროტს, უკეთურების მოქმედს, რომ საუკუნოდ ლაფში არ ამოგსვაროს.

³⁴შეიხიზნე უცხო და შფოთს ვერ ასცდები, შენიანებს გაგიუცხოებს.