Read ბიბლია სიბრძნე ზირაქისა წინათქმა 12 Bible Online

სიბრძნე ზირაქისა წინათქმა 12 - ბიბლია bible

სიბრძნე ზირაქისა წინათქმა 12

¹სიკეთის ქმნისას იცოდე, ვისთვის იქმ და მოგეგება მადლი სიკეთის წილ.

²კეთილი უყავ ღვთისმოსავს და ჰპოვებ სანაცვლოს, მისგან თუ არა, უზენაესისგან მაინც.

³არ იქნება სიკეთე მისთვის, ვინც გამუდმებით სჩადის ბოროტს და სიხარულით არ გასცემს მოწყალებას.

⁴მიეცი ღვთისმოსავს და ნუ შეეწევი ცოდვილს.

⁵კეთილი უყავ თვინიერს და ნურაფერს გაიმეტებ მკრეხელისათვის, დაუჭირე და ნუ მისცემ პურს, რათა არ გძლიოს მისი წყალობით, რადგანაც ორმაგ ბოროტებას მოგაგებს იმ სიკეთისათვის, რასაც მისთვის მოიმოქმედებ.

⁶რადგანაც უზენაესმა მოიძულა ცოდვილნი და ღვთისმგმობთ სანაცვლოს მიაგებს.

⁷მიეცი კეთილს და შემცოდეს ნუ შეეწევი.

⁸მეგობარი არ იცნობა ბედნიერებაში და მტერი არ დაიფარება უბედობაში.

⁹ადამიანის ბედნიერებისას მისი მტრები წუხან, უბედობისას კი მეგობარიც მიატოვებს.

¹⁰ნურასოდეს ენდობი მტერს, რადგანაც სპილენძივით ჟანგდება მისი სიავე.

¹¹თავიც რომ დაიმდაბლოს და ქედწახრილმა იაროს, ყურადღებით ადევნე თვალი და ერიდე მას; იყავი როგორც კრიალა სარკე მის წინაშე და დაინახავ, რომ ბოლომდე როდი გაწმენდილა ჟანგისაგან.

¹²ნუ დაიყენებ გვერდით, რომ არ დაგამხოს და შენი ადგილი არ დაისაკუთროს; ნუ მოისვამ მხარმარჯვნივ, რომ შენი სავარძელი არ მოისურვოს, თორემ ბოლოს ჩასწვდები ჩემს სიტყვებს და სინანულით გაიხსენებ ჩემს შეგონებას.

¹³ვინ შეიწყალებს დაგესლილი გველის შემლოცველს, ან იმას, ვინც მხეცს მიეახლა?

¹⁴ან შემცოდესთან ერთად მავალს და მისი ცოდვების მოზიარეს?

¹⁵ერთხანს კი დარჩება შენთან, მაგრამ თუ შეყოყმანდი, ვეღარ მოითმენს.

¹⁶მტერი თავისი ბაგით გატკბობს, მაგრამ გულში კი იმას იზრახავს, რომ ბნელ ხაროში ჩაგაგდოს. მტერი ცრემლებით დაგიტირებს, მაგრამ სისხლით ვერ გაძღება, თუ დრო იპოვა.

¹⁷თუ უბედურება დაგატყდა თავს, შენზე უწინ გაჩნდება იქ და, თითქოს შენი შველა სურსო, ფეხს დაგიდებს.

¹⁸თავის ქნევას მოჰყვება, ხელებს შემოჰკრავს, ბევრს იჩურჩულებს და სახეს შეიცვლის.