Read ბიბლია სიბრძნე ზირაქისა წინათქმა 13 Bible Online

სიბრძნე ზირაქისა წინათქმა 13 - ბიბლია bible

სიბრძნე ზირაქისა წინათქმა 13

¹ვინც ფისს მიეკარება, გაისვრება, და ვინც ქედმაღალს დაუახლოვდება, მას დაემსგავსება.

²ნუ ასწევ ტვირთს, შენს ძალას რომ აღემატება; ნუ დაუახლოვდები შენზე ძლიერსა და მდიდარს. რა გაუვა თიხის ქოთანს სპილენძის ქვაბთან? მიეჯახება და გატყდება.

³მდიდარმა უსამართლობა ჩაიდინა და აქეთ იმუქრება; ღარიბს უსამართლოდ მოექცნენ და თვითონვე იხვეწება შეწყალებას.

⁴თუ რამეში არგიხარ, გამოგიყენებს, თუ გაღარიბდი, ზურგს შეგაქცევს.

⁵თუ რამ გაბადია, ვერ მოიშორებ; ყველაფერს დაგახარჯვინებს, თვითონ კი არხეინად იქნება.

⁶თუ რამ გიჭირს, მოგელაქუცება, შემოგცინებს და იმედს მოგცემს, სიტყვით მოგეფერება და გკითხავს, ხომ არაფერი გიჭირსო?

⁷თავისი მასპინძლობით შეგარცხვენს, ვიდრე ორჯერ თუ სამჯერ არ გაგძარცვავს, რათა ბოლოს იცინოს შენზე. შემდეგ კი, თუ დაგინახა, გვერდს აგიქცევს და მხოლოდ თავსღა დაგიქნევს შენთან შეხვედრისას.

⁸მაშ, უფრთხილდი, რომ არ შეცდე და შენი სიბრიყვით თავი არ დაიმცირო.

⁹როცა ძლიერი მიგიპატიჟებს, თავი აარიდე და მაშინ უფრო მიგიწვევს.

¹⁰თავს ნუ მოაბეზრებ, რომ ხელი არა გკრას, და ნურც მეტისმეტად განუდგები, რომ არ დაგივიწყოს.

¹¹ნუ მისცემ თავს იმის ნებას, რომ თანასწორივით ელაპარაკო, ნუ ენდობი მის სიტყვამრავლობას, რადგანაც გრძელი საუბრით გაცთუნებს და თითქოს ხუმრობით გამოგცდის.

¹²ვინც უწყალოა თავის მიმართ და ენაზე კბილის დაჭერა არ შეუძლია, თავს ვერ დაიცავს სიავისა და ბორკილისაგან.

¹³ფრთხილად და გულისყურით იყავი, რადგან შენს უბედურებასთან ერთად დააბიჯებ.

¹⁴ყველა ცხოველს თავისი მსგავსი უყვარს და ყველა კაცს — თავისი ახლობელი.

¹⁵ყოველი ხორციელი თავისი მოდგმისას ირჩევს და ადამიანიც თავისი მსგავსისკენ ისწრაფის.

¹⁶რა აქვს საერთო მგელს კრავთან? ანდა შემცოდეს — ღვთისმოსავთან?

¹⁷რა ჩამოაგდებს მშვიდობას ძაღლსა და აფთარს შორის? ან მდიდარსა და ღარიბს შორის?

¹⁸ლომების მოსანადირებელი ვირები არიან უდაბნოში, ხოლო მდიდართა საძოვარი — ღარიბნი.

¹⁹საძულველია თავმდაბლობა ქედმაღლისათვის, ხოლო მდიდრისთვის — ღარიბი.

²⁰მდიდარმა თუ წაიფორხილა, მეგობრები შეაშველებენ ხელს, დაცემულ ღარიბს კი მეგობრებიც ზურგს შეაქცევენ.

²¹გასაჭირში ჩავარდნილ მდიდარს მრავალი შემწე ჰყავს; სისულელეც რომ წამოროშოს, გაამართლებენ. ღარიბს კი, თუ გაუჭირდა, მგმობელნი არ დაელევა; გზიანი სიტყვაც რომ თქვას, ყურს არ ათხოვებენ.

²²მდიდრის ხმის ამოღებისთანავე ყველა დუმდება; მის სიტყვას ღრუბლებამდე აზიდავენ. ღარიბმა თუ კრინტი დასძრა, იტყვიან, ეს ვინ გდიაო? თუ წაიფორხილა, მოიძულებენ.

²³კარგია სიმდიდრე, რომელსაც ცოდვისა არა სცხია რა. ცუდია სიღარიბე ღვთისმგმობლის თვალში.

²⁴კაცის გული სახეს შეუცვლის მას — ან სასიკეთოდ, ან საბოროტოდ.

²⁵გულის ნიშანი ბედნიერებაში — მხიარული სახეა, იგავთა თხზვა კი — შავბნელ ფიქრთა მაუწყებელი.