Read ბიბლია სიბრძნე ზირაქისა წინათქმა 16 Bible Online

სიბრძნე ზირაქისა წინათქმა 16 - ბიბლია bible

სიბრძნე ზირაქისა წინათქმა 16

¹ნუ გსურს უმაქნის შვილთა სიმრავლე და ნურც უსჯულო ვაჟებით ხარობ.

²მათი სიმრავლე ნუ გაგახარებს, თუკი არა აქვთ შიში უფლისა.

³ნუ მიენდობი მათ სიცოცხლეს და ნუ დაეყრდნობი მათ სიმრავლეს, რადგანაც ზოგჯერ ერთი სჯობს ათასს და უშვილოდ გადაგება — უსჯულო შვილთა ყოლას.

⁴რადგანაც ერთი გონიერისაგან ქალაქი აშენდება, უსჯულოთა ტომი კი უდაბნოდ იქცევა.

⁵ბევრი ამგვარი რამ იხილეს ჩემმა თვალებმა და ამაზე უარესიც მოუსმენიათ ჩემს ყურებს.

⁶ცოდვილთა საკრებულოში ცეცხლი იფეთქებს, ურჩ ხალხში კი რისხვა აბრიალდება.

⁷უფალმა არ შეიწყნარა ძველი ბუმბერაზნი, თავიანთი ძალის იმედით რომ განუდგნენ მას.

⁸არც ლოტის სახლეული დაინდო, მისი ამპარტავნობისთვის მოძულებული.

⁹არ შეიწყალა წარწყმედის ხალხი, თავისი ცოდვებით მოქადული.

¹⁰არც ექვსასი ათასი კაცი, გულქვაობამ რომ შეკრიბა ერთად.

¹¹ერთიც რომ იყოს ქედფიცხელი, საკვირველი იქნებოდა დაუსჯელად მისი დარჩენა, რადგანაც უფლის ხელთაა წყალობაცა და რისხვაც, შეწყალებაც შეუძლია და რისხვის თავზე დატეხაც.

¹²რამდენად დიდიცაა მისი გულმოწყალება, იმდენადვე დიდია მისი მხილებაც, და მისი საქმისამებრ განსჯის კაცს.

¹³ვერსად წაუვა ცოდვილი ნაძარცვით და ფუჭად არ ჩაივლის მორწმუნის მოთმინება.

¹⁴ადგილს მიუჩენს ყველა მოწყალებას და თვითეულს მისი საქმისამებრ მიეზღვება.

¹⁵ნუ იტყვი: უფალს დავემალები, ზესკნელიდან ვინ გამიხსენებსო? ამდენ ხალხში ვინ შემამჩნევს, რა არის ჩემი სული უსაზღვრო სამყაროში?

¹⁸აჰა, ზეცა და ზეცა ზეცისა, უფსკრული და დედამიწა თანაბრად ირყევიან მისი წვევისას.

¹⁹მთებიცა და საფუძველიც დედამიწისა თანაბრად ძრწიან და ირყევიან მისი მოხედვისას.

²⁰ამის გაგება არ ძალუძს გულს, ანკი მის გზებს ვინ გაიაზრებს?

²¹როგორც ქარი, კაცის თვალისთვის უხილავი, მისი საქმეების უმეტესობაც დაფარულია.

²²ვინ გვაუწყოს მისი სამართლის საქმენი? ან ვინ დაელოდება მათ? რადგანაც შორსაა აღთქმა.

²³ასე ფიქრობს გულით ღატაკი და უგუნური, შეცთომილიც ასევე ფიქრობს.

²⁴მისმინე, შვილო, ესწრაფე ცოდნას, გულისყური მიაპყარ ჩემს სიტყვებს.

²⁵დაწვრილებით განვმარტავ სწავლას და ზედმიწევნით გადმოგცემ ცოდნას.

²⁶დასაბამიერია მისი საქმენი და როცა შექმნა, ნაწილებად დაჰყო ისინი.

²⁷საუკუნოდ მოაწესრიგა თავისი ქმნილებანი, დასაბამიდან შორეულ მომავლამდე. არც სწყურიათ, არც იღლებიან, არც თავიანთ ქმედებას წყვეტენ.

²⁸არცერთი არ ავიწროებს თავის მეზობელს და არც არასდროს ეურჩება უფლის სიტყვას.

²⁹შემდგომ ამისა უფალმა გადმოხედა მიწას და თავისი სიკეთით აღავსო იგი.

³⁰ყოველი ჯურის ცხოველით დაფარა მისი ზედაპირი და ბოლოს მისკენვე მიიქცევა ყოველი.