Read ბიბლია სიბრძნე ზირაქისა წინათქმა 17 Bible Online

სიბრძნე ზირაქისა წინათქმა 17 - ბიბლია bible

სიბრძნე ზირაქისა წინათქმა 17

¹უფალმა მიწისაგან შექმნა ადამიანი და მასვე დაუბრუნა იგი.

²დღეთა განსაზღვრული რიცხვი და დრო მიუზომა მათ და უბოძა ხელმწიფება ყოველივე მიწიერზე.

³მათი ბუნებისამებრ შემოსა ძალით და ხატად თვისად შექმნა ისინი.

⁴ჩაუნერგა მათი შიში ყველა ხორციელს, რათა ემბრძანებლა ცხოველებსა და ფრინველებზე.

⁶მისცა მათ აზრი, ენა და თვალის ჩინი, ყურები და გული, რათა შეეცნო ყოველი.

⁷აღავსო ისინი ცოდნითა და გონიერებით და უჩვენა მათ კეთილი და ბოროტი.

⁸დაადგა თვალი მათ გულებს, რათა საკუთარ საქმეთა სიდიადე ეჩვენებინა მათთვის,

¹⁰მისი წმიდა სახელის სადიდებლად და საუწყებლად მისი დიადი საქმეებისა.

¹¹წინ დაუდო მათ ცოდნა და ცხოვრების წესი დაუმკვიდრა.

¹²საუკუნო აღთქმა დაუდო და თავისი მსჯავრი უჩვენა მათ.

¹³იხილეს მათმა თვალებმა სიდიადე დიდებისა და მისი ხმის დიდება ისმინეს მათმა ყურებმა.

¹⁴უთხრა მათ: „ერიდეთ ყოველგვარ უსამართლობას“ და ამცნო თვითოეულს მოვალეობა მოყვასის მიმართ.

¹⁵მათი გზები მარადჟამ მის წინაშეა და ვერ დაემალებიან მის თვალებს.

¹⁷ყველა ხალხს დაუდგინა წინამძღოლი, ხოლო უფლის წილხვდომილი ისრაელია.

¹⁹მათი ყოველი საქმე მზესავით მის წინაშეა და მისი თვალი გამუდმებით დამზერს მათ გზებს.

²⁰არ გამოეპარება მათი უსამართლობანი; და მათი ყოველი ცოდვა უფლის წინაშეა.

²²კაცის შეწყალება მისთვის არის როგორც ბეჭედი; და თვალის გუგასავით დაიცავს ადამიანის მადლს.

²³შემდგომ ამისა აღდგება, კუთვნილს მიაგებს მათ და რაც გაუციათ, მათსავე თავზე მოაწევს.

²⁴ხოლო ვინც ინანებს, მიუტევებს და გაამხნევებს, ვისაც დაშრეტია დათმენის ძალა.

²⁵მიიქეც უფლის მიმართ და დაუტევე ცოდვანი, ევედრე მას და შეამცირე შეცოდებანი.

²⁶ამაღლდი უზენაესის მიმართ, განეშორე უსამართლობას და მთელი არსებით შეიძულე სიბილწე.

²⁷ვინ აქებს უფალს ჯოჯოხეთში ცოცხალთა და მის მადიდებელთა ნაცვლად?

²⁸მკვდარი, როგორც არარსებული, როგორღა შეასხამს ქებას? მხოლოდ ცოცხალი და ტანმრთელი ადიდებს უფალს.

²⁹რა დიდია უფლის გულმოწყალება და რა ადვილად მიუტევებს მისკენ მიქცეულთ!

³⁰ყოვლისმძლე როდია ადამიანი, რადგანაც უკვდავი არ არის ადამის შვილი.

³¹რა არის მზეზე უნათლესი? მაგრამ თვით ისიც კი ბნელდება. ასევე ბოროტს იზრახავს ხორცი და სისხლი.

³²ღმერთი დამზერს მაღალ ცათა ძალებს, ხოლო ყოველი კაცი მიწაა და ფერფლი.