Read ბიბლია სიბრძნე ზირაქისა წინათქმა 18 Bible Online

სიბრძნე ზირაქისა წინათქმა 18 - ბიბლია bible

სიბრძნე ზირაქისა წინათქმა 18

¹ყველაფერი შექმნა მარად ცოცხალმა.

²მხოლოდ უფალი შეირაცხება მართლად.

⁴არავის განაცხადებინებს თავის საქმეებს; ვინ ჩასწვდება მის სიდიადეს?

⁵ვინ გაზომავს ძალას მისი სიდიადისა? ვინ გამოთქვამს მის მოწყალებას?

⁶ვერც რას მიუმატებ და ვერც გამოაკლებ, გამოუკვლეველია საკვირველებანი უფლისა.

⁷კაცი მაშინ იწყებს, როცა ასრულებს, და როცა ჩერდება, გაჭირვება მაშინ იწყება მისი.

⁸რა არის კაცი, ან რას გამოელის იგი? რა არის მისი სიკეთე ან ბოროტება?

⁹დიდია ადამიანის დღეთა რიცხვი — ასი წელი.

¹⁰მაგრამ როგორც წყლის წვეთი ან ქვიშის მარცვალი ზღვაში, ასევე უბადრუკია მისი წლები მარადისობასთან შედარებით.

¹¹ამიტომაც სულგრძელია უფალი კაცთა მიმართ და თავის წყალობას მიაფენს მათ.

¹²ხედავს და იცის, რარიგ სავალალოა მათი აღსასრული, ამიტომაც ამრავლებს თავის წყალობას.

¹³კაცის წყალობა მის მოყვასზე ვრცელდება, უფლის წყალობა კი — ყველა ხორციელზე.

¹⁴შეიწყალებს მისი შეგონების შემწყნარებელთ და იმათ, მის კანონს რომ მიელტვიან.

¹⁵ქველმოქმედებისას საყვედურს ნუ იტყვი, შვილო, რისამე გაცემისას კი — გულსატკენ სიტყვას.

¹⁶სიცხეს ცვარ-ნამი აგრილებს და მოწყალებას სჯობია სიტყვა.

¹⁷ამიტომ სიტყვა უმეტესია კეთილ ძღვენზე. მადლიან კაცს კი არცერთი არ დაელევა.

¹⁸უგუნურს უმადური ყვედრება სჩვევია, შურიანის ძღვენი კი თვალებსა შრეტს.

¹⁹ვიდრე სიტყვას იტყოდე, მოიფიქრე და ვიდრე სენი შეგეყრებოდეს, თავს მიხედე.

²⁰ვიდრე განგსჯიდნენ, დაუკვირდი შენს თავს და განკითხვისას შეგიწყალებენ.

²¹ვიდრე დაუძლურდებოდე მოიდრიკე ქედი და ცოდვისგან უკუიქეც.

²²ეცადე დროზე აღასრულო აღთქმა და უკანასკნელ ამოსუნთქვამდე ნუ გადასდებ მის აღსრულებას.

²³ლოცვის დაწყებამდე მოამზედე თავი და ნუ ემსგავსები იმას, ვინც გამოსცდის უფალს.

²⁴გახსოვდეს რისხვა აღსასრულის დღეს და ჟამი შურისგებისა, როცა უფალი პირს იბრუნებს.

²⁵სიმაძღრისას შიმშილის ჟამი გახსოვდეს, სიღატაკისა და გაჭირვებისას კი — სიმდიდრის ჟამი.

²⁶დილიდან საღამომდე იცვლება დრო და ყველაფერი მსწრაფლწარმავალია უფლის წინაშე.

²⁷ბრძენკაცი ყოველთვის წინდახედული იქნება და ცოდვის ჟამს არ გამოიჩენს დაუდევრობას.

²⁸ყველა გონიერი შეიცნობს სიბრძნეს და ქებას შეასხამენ მის მომხვეჭსაც...

²⁹სიტყვაში გაწაფულნი თავადაც განიბრძნობიან და წვიმასავით მოავლენენ ბრძნულ შეგონებებს.

³⁰ნუ სდევ გულისთქმას და დაიოკე სურვილი.

³¹თუ განცხრომის ძებნად მიაქცევ სულს, მტრების სასაცილოდ იქცევი.

³²ნუ ტკბები ფუფუნებით და ღრეობებს ნუ გადაჰყვები.

³³ნუ ილხენ ნასესხები ფულით, როცა ქისა ცარიელი გაქვს, რომ სიღატაკეში არ ჩავარდე.