Read ბიბლია სიბრძნე ზირაქისა წინათქმა 2 Bible Online

სიბრძნე ზირაქისა წინათქმა 2 - ბიბლია bible

სიბრძნე ზირაქისა წინათქმა 2

¹შვილო, თუ სამსახურად მიეახლები უფალს, განსაცდელისთვის გაამზადე სული.

²მოთოკე გული, მოთმინებით აღიჭურვე და განსაცდელის ჟამს ნუ აჩქარდები.

³მიეახლე ღმერთს და არ განშორდე, რათა ამაღლდე საბოლოოდ.

⁴უდრტვინველად მიიღე ყველაფერი, რაც შეგემთხვევა, და სულგრძელობით დაითმინე დამცირებანი.

⁵რადგანაც ოქრო ცეცხლში გამოიცდება, უფლის სათნონი კი — მორჩილების ქურაში.

⁶ერწმუნე მას და დაგიფარავს, სწორი გზით იარე და გქონდეს მისი იმედი.

⁷უფლის მოშიშნო, მის წყალობას ელოდეთ და ნუ განუდგებით, რომ არ დაეცეთ.

⁸უფლის მოშიშნო, გწამდეთ მისი და არ დაგეკარგებათ თქვენი საზღაური.

⁹უფლის მოშიშნო, სიკეთის, საუკუნო სიხარულისა და წყალობის იმედი გქონდეთ.

¹⁰გადახედეთ ძველ თაობებს და იხილეთ: ვის სწამდა უფალი და შერცხვენილ იქნა? ვინ იყო მისი მოშიში და მიტოვებულ იქნა? ანდა ვინ უხმო უფალს და მან უგულებელყო?

¹¹რადგან უფალი მლმობელია და მოწყალე, ცოდვათა მიმტევებელი და მხსნელი გაჭირვების ჟამს.

¹²ვაი, გულმხდალთა და ხელძაბუნთ, ორი გზით მოარულ ცოდვილთ.

¹³ვაი, დაუძლურებულ გულს, რადგან არა სწამს, და ამიტომაც არ იქნება დაცული.

¹⁴ვაი, მოთმინებადაკარგულნო, რას იზამთ, როცა მოგაკითხავთ უფალი?

¹⁵უფლის მოშიშნი ურწმუნონი არ იქნებიან მისი სიტყვების მიმართ, და უფლის მოყვარულნი დაიცავენ მის გზას.

¹⁶უფლის მოშიშნი მის წყალობას ეძიებენ და მისი მოყვარულნი გაძღებიან სჯულით.

¹⁷უფლის მოშიშინი თავიანთ გულებს გაამზადებენ და მის წინაშე მოიდრეკენ ქედს.

¹⁸ჩავვარდეთ უფლის ხელში და არა კაცთა ხელში, ვინაიდან როგორიცაა მისი სიდიადე, იმგვარივეა მისი წყალობა.