Read ბიბლია სიბრძნე ზირაქისა წინათქმა 20 Bible Online

სიბრძნე ზირაქისა წინათქმა 20 - ბიბლია bible

სიბრძნე ზირაქისა წინათქმა 20

¹არის უდროო მხილება და არის დუმილი, გონიერების ნიშანი.

²მხილება სჯობს გულისწყრომას.

³ვინც თავის შეცდომას აღიარებს, ნაკლებ ევნება.

⁴რაღა საჭურისი, რომელიც ცდილობს ნამუსი ახადოს ქალწულს და რაღა ის, ვისაც სურს ძალით აღასრულოს სამართალი.

⁵ზოგის დუმილი სიბრძნის ნიშანია, ზოგი კი საძულველია ყბედობის გამო.

⁶ზოგი დუმს, რადგან პასუხი არ მოეძებნება, ზოგი კი დუმს, რადგანაც სათანადო დროს უცდის.

⁷ბრძენი დრომდე არ იტყვის სიტყვას, პატივმოყვარე და უგუნური კი დროს არ დაგიდევს.

⁸საზიზღარია ყბედი, ხოლო ვინც ძალით მიიტაცებს სიტყვის უფლებას — საძულველი.

⁹ზოგჯერ კაცს წარმატებაც ვნებს, ზოგჯერ კი დანაკარგიც შენაძენია.

¹⁰არის საჩუქარი, რომელიც არას გარგებს და არის საჩუქარი, რომელიც ორმაგად სასარგებლოა.

¹¹არის დიდება, რომელიც ამცირებს და დამცირება, რომელიც ამაღლებს ადამიანს.

¹²ზოგი მცირეთი ბევრს ყიდულობს და ზოგი შვიდმაგს იხდის მცირედში.

¹³ბრძენი ორიოდე სიტყვითაც შეგაყვარებს თავს, ბრიყვს კი ფუჭად ჩაუვლის მადლი.

¹⁴უგუნურის წყალობა არას გარგებს, რადგანაც ერთის ნაცვლად ბევრი თვალი აქვს.

¹⁵ცოტას მოგცემს და ბევრს დაგაყვედრის, გზირივით პირდაღებული: დღეს ნასესხებს ხვალ უკან მოგთხოვს; საძულველია ამგვარი კაცი.

¹⁶ბრიყვი ამბობს: არც მეგობარი მყავს და არც მადლიერი ჩემი სიკეთისათვისო. მისი პურის მჭამელნი მის ძვირს იტყვიან. რა ხშირად გახდება რამდენის დასაცინი.

¹⁷მიწაზე წაფორხილება სჯობს ენის წაბორძიკებას. ასე უფრო მალე დაეცემიან ბოროტნი.

¹⁸უმადლო კაცი უადგილო არაკია, მუდამ პირზე რომ აკერიათ უკეთურთ.

¹⁹ბრიყვის პირით თქმულ არაკს აზრი არა აქვს, რადგანაც უდროო დროს არის ნათქვამი.

²⁰ზოგს გაჭირვება არ აძლევს ცოდვის ჩადენის ნებას, და თუ სული მოითქვა, არ შეინანებს.

²¹ზოგი სიმხდალის გამო იღუპავს სულს, ზოგი კი — უგუნურის წინაშე.

²²ზოგი სირცხვილის გამო რაღაცას ჰპირდება მეგობარს და სულ ტყუილად იკიდებს მტრად.

²³სიცრუე ადამიანის ბიწია; უზრდელი მუდამ ცრუობს.

²⁴ქურდი სჯობს მუდამ ცრუმეტყველს, თუმცა წარწყმედაა ორივეს ხვედრი.

²⁵ცრუ კაცს თავისი საქციელი არცხვენს და მისი სირცხვილი მასთანაა მარადჟამ.

²⁶ბრძენი სიტყვებით ამაღლდება და გონიერი კაცი დიდებულთა წყალობას დაიმსახურებს.

²⁷მიწის მუშაკი თავის ზვინს ამაღლებს და დიდებულთა მაამებელს უსამართლობაც მიეტევება.

²⁸ძღვენი და საჩუქარი ბრძენთაც კი უბრმავებს თვალს და პირში ამოდებული ლაგამივით უშლიან ხელს მხილებისას.

²⁹დაფარული სიბრძნე და დაფლული განძი — ან ერთი და ან მეორე ვის რას არგია?

³⁰სიბრიყვის მფარავი კაცი სჯობს თავისი სიბრძნის მფარავს.