Read ბიბლია სიბრძნე ზირაქისა წინათქმა 21 Bible Online

სიბრძნე ზირაქისა წინათქმა 21 - ბიბლია bible

სიბრძნე ზირაქისა წინათქმა 21

¹შვილო, სცოდე? ნუღარა სცოდავ და ძველი ცოდვების მიტევებისათვის ილოცე.

²გაექეც ცოდვას, როგორც გველს, რადგანაც თუ მიუახლოვდები, გიკბენს. მისი კბილები ლომის კბილებია, სულს რომ ხდიან ადამიანებს.

³ყოველი უსჯულოება ორლესული მახვილია: მისი ნაიარევი არ იკურნება.

⁴დაშინება და ძალადობა იავარყოფენ სიმდიდრეს: ასე იავარიყოფა ქედმაღლის სახლი.

⁵ღატაკის ბაგით წარმოთქმული ვედრება ღმერთის ყურს აღწევს და მას მალევე მიეგება სამართალი.

⁶მხილების მოძულე ცოდვილის კვალს მისდევს, უფლის მოშიში კი გულით ინანიებს.

⁷ენით ძლიერი შორითვე იცნობა, მაგრამ გონიერი ხედავს, სად წაიბორძიკებს იგი.

⁸სხვისი ფულით თავისი სახლის მაშენებელი თითქოს ქვებს აგროვებს საკუთარი სამარხისათვის.

⁹უსჯულოთა ყრილობა ძენძის გროვაა და ცეცხლის ალია მისი ბოლო.

¹⁰ცოდვილთა გზა ქვებითაა მოკირწყლული, მაგრამ მის ბოლოს ჯოჯოხეთის უფსკრულია.

¹¹სჯულის დამცველი თავისი აზრის ბატონ-პატრონია, უფლის შიშს კი სიბრძნე აგვირგვინებს.

¹²უნიჭო ვერ განისწავლება, მაგრამ ზოგჯერ სიმწარეს ამრავლებს ნიჭი.

¹³ბრძენის ცოდნა წყალდიდობასავით იზრდება და მისი რჩევა სიცოცხლის წყაროა.

¹⁴ბრიყვის გული გატეხილი ჭურჭელია, ვერავითარ ცოდნას ვერ დაიჭერს.

¹⁵გონიერი მოისმენს ბრძნულ სიტყვას, მოიწონებს და შეითვისებს; თავქარიანი მოისმენს, დაიწუნებს და ზურგს უკან მოისვრის.

¹⁶ბრიყვის ნათქვამი ტვირთია გზაზე, გონიერის ბაგეზე კი სიტკბოსა ჰპოვებ.

¹⁷გონიერი კაცის სიტყვას საკრებულო ეძებს და მისი ნათქვამი გულში აღიბეჭდება.

¹⁸რაცა დანგრეული სახლია, იგივეა სიბრძნე ბრიყვისთვის, და უაზრო სიტყვებია უგუნურის ცოდნა.

¹⁹რაც ბორკილია ფეხზე და ჯაჭვი — მარჯვენა ხელზე, იგივეა წვრთნა უჭკუოსათვის.

²⁰ბრიყვი ხმამაღლა ხარხარებს, ჭკვიანი კი წყნარად იღიმის.

²¹წვრთნა ოქროს სამკაულია გონიერისთვის და ძვირფასი სალტე — მარჯვენა მკლავზე.

²²ბრიყვის ფეხი უცხოს სახლში შესვლას ეშურება, მრავალნაცადი კაცი კი კრძალვით შედგება მის წინ.

²³ბრიყვი კარიდან იჭყიტება სახლში, ზრდილი კაცი კი გარეთა დგას.

²⁴უზრდელი კარს აეკვრის და აყურადებს, ზრდილს კი ამწუხრებს ამგვარი უტიფრობა.

²⁵ბრიყვთა ბაგენი სხვის ნათქვამს იმეორებენ, გონიერთა სიტყვები კი სასწორზე იწონება.

²⁶ყბედის გული მის ბაგეზეა, ბრძენის ბაგე კი — მის გულში.

²⁷უღვთო, სატანას რომ წყევლის, თავისსავე სულს იწყევლის.

²⁸მაბეზღარი სულს იბილწავს და თავს აძულებს თავის მეზობლებს.