Read ბიბლია სიბრძნე ზირაქისა წინათქმა 22 Bible Online

სიბრძნე ზირაქისა წინათქმა 22 - ბიბლია bible

სიბრძნე ზირაქისა წინათქმა 22

¹ჭუჭყიან ქვას ჰგავს ზარმაცი და ყველა დასცინის მის უგვანობას.

²ხარის ნეხვსა ჰგავს ზარმაცი, ვინც კი აიღებს, ხელს იფერთხავს.

³მამას არცხვენს უზრდელი ვაჟი, უზრდელი ქალი კი ამცირებს.

⁴გონიერი ასული ქმარს შეიძენს, ურცხვი კი მშობლების სადარდელია.

⁵თავხედი ქალი ქმარსაც არცხვენს და მამასაც, და ორივენი შეიძულებენ.

⁶უდროო დროს ნათქვამი სიტყვა გლოვის ჟამს სიმღერასა ჰგავს, წკეპლით წვრთნა კი ყოველთვის ჭკუის სასწავლებელია.

⁹გინდ ბრიყვისათვის გისწავლებია და გინდ ნამსხვრევების შეწებება, ან ღრმად მძინარის გაღვიძება გიცდია.

¹⁰გინდ ბრიყვისათვის გიამბნია რამე და გინდ მთვლემარესთვის; ბოლოს მაინც იკითხავს, რა მოხდაო?

¹¹იტირე მკვდარი, რომ გამოაკლდა სინათლეს და იტირე ბრიყვიც, რადგან გონება აკლია; ნაკლებად იტირე მკვდარი, რადგანაც განისვენა, ბრიყვის სიცოცხლე კი სიკვდილზე უარესია.

¹²მკვდარი შვიდ დღეს იგლოვე, ბრიყვი და უღვთო კი — ყოველდღე, ვიდრე ცოცხალია.

¹³უგუნურთან ნუ ამრავლებ სიტყვას და უმეცართან ნუ იარები; ეკრძალე, რათა მასთან შეჯახებით არ შეისვარო, ერიდე, თუ გსურს ჰპოვო სიმშვიდე და მისმა უტვინობამ არ შეგაწუხოს.

¹⁴რა არის ტყვიაზე მძიმე? და რა არის მისი სახელი, თუ არა ბრიყვი?

¹⁵ქვიშის, მარილის ან რკინის ზოდის ზიდვა უფრო ადვილია, ვიდრე უგუნურის ატანა.

¹⁶როგორც სახლის მტკიცედ შეკრული ხის სარტყელი არ დაირღვევა მიწისძვრისას, ასე გონივრულ რჩევას დაყრდნობილი გულიც არ შედრკება განსაცდლის ჟამს.

¹⁷გონივრულ რჩევას დაყრდნობილი გული თითქოს ჩუქურთმაა, გლუვ კედელზე ამოკვეთილი.

¹⁸როგორც მაღალი საბჯენები ვერ უძლებენ ქარს, ასე ბრიყვული განსჯით შემკრთალი გულიც ვერ გაუძლებს შიშს.

¹⁹ნატკენი თვალი ცრემლებსა ღვრის, ნატკენი გულიდან გრძნობა იღვრება.

²⁰ნასროლი ქვა ჩიტებს აფრთხობს, მეგობრის მაგინებელი მეგობრობას არღვევს.

²¹თუ მეგობარზე იშიშვლე ხმალი, სასოს ნუ წარიკვეთ, შეგიძლია უკანვე ჩააგო.

²²თუ მეგობრის წინააღმდეგ გახსენი პირი, ნუ გეშინია, შეგიძლია კვლავ შეურიგდე. მხოლოდ ძაგება, ქედმაღლობა, საიდუმლოს გამჟღავნება და მზაკვრული ბოროტმოქმედება ჩამოგაშორებს ყველა მეგობარს.

²³მოყვასის ნდობა მაშინ მოიხვეჭე, როცა მას უჭირს, რათა მასთან ერთად გიხაროდეს მისი კეთილდღეობა. უერთგულე განსაცდელის ჟამს, რათა მის მემკვიდრეობაში წილი დაიდო.

²⁴ცეცხლის გაჩენამდე ღუმელს კვამლი და ალმური ასდის, ასე სისხლის ღვრას წინ უსწრებს ლანძღვა-გინება.

²⁵მეგობრის დაცვას არ ვითაკილებ და მის წინაშე არ დავიმალები.

²⁶თუკი მის გამო ბოროტი რამ შემემთხვა, ვინც კი გაიგებს, ყველა მოერიდება.

²⁷ვინ მიუჩენს მცველს ჩემს ბაგეს ან გონიერების ბეჭედს ვინ დაასვამს მას, რომ მათი მეოხებით არ დავეცე და არ დამღუპოს ჩემმავე ენამ.