Read ბიბლია სიბრძნე ზირაქისა წინათქმა 23 Bible Online

სიბრძნე ზირაქისა წინათქმა 23 - ბიბლია bible

სიბრძნე ზირაქისა წინათქმა 23

¹უფალო, ჩემი სიცოცხლის მამაო და მეუფეო, ნუ მიმაგდებ მათ ნებაზე და ნუ დაუშვებ, რომ დავეცე მათ მიერ.

²ვინ მიუჩენს წკეპლას ჩემს ზრახვებს და სიბრძნის მოძღვარს — ჩემს გულს, რომ არ დაინდონ ჩემი ქცევა და ჩემი შეცოდებანი;

³რომ არ იმრავლოს ჩემმა უმეცრებამ და არ იმატონ ჩემმა ცოდვებმა; რომ არ დავემხო წინააღმდგომთა წინაშე და არ იხაროს ჩემზე მტერმა.

⁴უფალო, ჩემი სიცოცხლის ღმერთო და მამაო, განარიდე ჩემს მზერას ამპარტავნება,

⁵და განმაშორე გულისთქმა.

⁶ნუ დამიმონებს ღორმუცელობა და ვნებათაღელვა, ნუ მიმცემ უტიფარ სულს.

⁷ისმინეთ, შვილებო, როგორ დაიურვოთ თქვენი ბაგე; ვინც ყურად იღებს, ბოროტს განერიდება.

⁸შემცოდეს თავისივე ბაგე ატყვევებს და ავსიტყვა და თავგასული მისი მეოხებით წაიფორთხილებს.

⁹ნუ მიაჩვევ ფიცს შენს ბაგეს და ჩვევად ნუ გაიხდი წმიდის სახელის ხსენებას.

¹⁰რადგან როგორც მონას, წამდაუწუმ რომ სჯიან, არ დაელევა იარები, ასე გამუდმებით მოფიცარი და წმიდის სახელის მახსენებელიც ვერ განიწმიდება ცოდვისაგან.

¹¹ხშირ-ხშირად მოფიცარი უსჯულოებით აღივსება და მის სახლს არ ასცდება შოლტი; თუ სცოდა, მისი ცოდვა მასთანვე იქნება; თუ ფიცი არად ჩააგდო, მისი ცოდვა გაორმაგდება, ხოლო თუ ტყუილად დაიფიცა, თავს ვერ იმართლებს და მის სახლს თავს დაატყდება უბედურება.

¹²არის სიტყვა სიკვდილით მოსილი; ნურც სმენია იაკობის სამემკვიდრეოს. რადგანაც ღვთისმოსავნი თავს არიდებენ მას, რომ ცოდვაში არ ჩაიდგან ფეხი.

¹³ნუ მიაჩვევ ბაგეს ბილწსიტყვაობას, რადგანაც მასშია ცოდვის მიზეზი.

¹⁴გახსოვდეს დედ-მამა, როცა დიდებულთა შორის ზიხარ, რათა თავი არ დაგავიწყდეს მათ წინაშე და, ჩვეულებისამებრ, სისულელე არ ჩაიდინო, თორემ ინატრებ: ნეტავი არ დავბადებულიყავიო, და გაჩენის დღეს დაიწყევლი.

¹⁵ლანძღვა-გინებას მიჩვეული ადამიანი მთელი სიცოცხლის მანძილზე ვერ გამოსწორდება.

¹⁶ორი თვისება ამრავლებს ცოდვას, მესამე კი რისხვას დაგატეხს თავზე.

¹⁷აღგზნებული სული, როგორც ანთებული ცეცხლი, მანამ არ ჩაქრება, სანამ არ დაიშრიტება. ხორციელ გულისთქმას აყოლილი კაცი მანამ არ დაცხრება, სანამ ცეცხლი არ დაფერფლავს.

¹⁸თავისი სარეცლის მიმართ შემცოდე კაცი ფიქრობს: „ვინ მიყურებს? ირგვლივ წყვდიადია და კედლებიც მიფარავენ, ასე რომ, ვერავინ მხედავს, მაშ რისი უნდა მეშინოდეს? უზენაესი აღარ გაიხსენებს ჩემს ცოდვებს.“

¹⁹მხოლოდ კაცის თვალი აშინებს და არ კი იცის, რომ უფლის თვალი მზეზე ათასჯერ ნათელია, კაცის ყველა გზას დამზერს და დაფარულიც არ დაემალება.

²⁰მისთვის ყველაფერი ცნობილი იყო შესაქმემდეც და შესაქმის შემდეგაც.

²¹შემცოდე ქალაქის ქუჩებში დაისჯება და იქ შეიპყრობენ, სადაც არ ელის.

²²ასევე ქალიც, მეუღლეს რომ მიატოვებს და სხვისაგან გააჩენს მემკვიდრეს.

²³რადგან, ჯერ ერთი, უზენაესის კანონს ეურჩება; და მეორეც, ქმრის წინაშე სცოდა; მესამეც, იმრუშა და სხვა კაცისაგან შვა შვილები.

²⁴საკრებულოს წინაშე გამოიყვანენ და გამოიძიებენ მისი შვილების ამბავს.

²⁵მისი ნაშიერი ფესვს ვერ გაიდგამს და ნაყოფს ვერ გამოიღებს მისი რტოები.

²⁶საწყევრად დატოვებს ხსოვნას და არ წარიხოცება მისი სირცხვილი.

²⁷დანარჩენები კი მიხვდებიან, რომ ვერაფერი შეედრება უფლის შიშს და არაფერია უფრო ტკბილი, ვიდრე მისი მცნებების დაცვა.