Read ბიბლია სიბრძნე ზირაქისა წინათქმა 26 Bible Online

სიბრძნე ზირაქისა წინათქმა 26 - ბიბლია bible

სიბრძნე ზირაქისა წინათქმა 26

¹კეთილი ცოლი ქმარს აბედნიერებს და აორმაგებს მისი დღეების რიცხვს.

²სათნო ცოლი ქმრის სიხარულია და სიმშვიდით აღავსებს მის წლებს.

³კეთილი ცოლი კეთილი ხვედრია, წილად რომ ხვდება უფლის მოშიშს.

⁴მდიდარია თუ ღარიბი, გული საგულესა აქვს, სახე კი — მუდამ მხიარული.

⁵სამი რამ აშინებს ჩემს გულს, მეოთხის გამო კი ვლოცულობ: ქალაქის მითქმა-მოთქმა; ბრბოს ამბოხი და ცილისწამება; ყოველივე ეს სიკვდილზე საზარელია.

⁶მაგრამ გულის ხეთქვაა და მწუხარება ცოლი, რომელიც სხვა ქალზე ეჭვიანობს. მისი ენის შოლტი ყველას გადასწვდება.

⁷ხარის მორყეული უღელია კაპასი ცოლი: მის მომყვანს გინდ მორიელი აგიყვანია.

⁸უბედურებაა ლოთი ცოლი: ვერ დაემალება თავის სირცხვილს.

⁹ქალის ავხორცობა თვალების ფახულით და წამწამებით გამოიცნობა.

¹⁰თავაშვებულ ქალიშვილს დარაჯი მიუჩინე, რომ დრო არ იხელთოს თავისდა საზიანოდ.

¹¹ერიდე უტიფარ თვალს და ნუ გაიკვირვებ, თუ შენს წინააღმდეგ შესცოდავს.

¹²როგორც მწყურვალი მგზავრი ეწაფება წყაროს, რომელსაც წააწყდება, ისიც ყველა პალოსთან ჩამოჯდება და ისრისთვის გახსნის კაპარჭს.

¹³მოსიყვარულე ცოლი ახარებს ქმარს და მისი გონიერება ამკვრივებს მის ძვლებს.

¹⁴თვინიერი ცოლი უფლის წყალობაა და ფასდაუდებელია ზრდილი სული.

¹⁵მადლის მადლია უმანკო ცოლი და ვერაფერი შეედრება უმწიკვლო სულს.

¹⁶როგორც ამომავალი მზე უფლის ცაზე, იგივეა კარგი ცოლის სილამაზე მის მიერ დაწკრიალებულ სახლში.

¹⁷როგორც სანთელი წმიდა სასანთლეზე, იგივეა სახის სილამაზე კენარ ტანზე.

¹⁸როგორც ოქროს სვეტი ვერცხლის კვარცხლბეკზე, იგივეა ლამაზი ფეხი, მტკიცე ტერფზე.

²⁸ორი სადარდელი აქვს ჩემს გულს, მესამე კი მაშფოთებს: ღარიბი მეომრის გაჭირვება და გონიერთა მასხარად აგდება; სამართლიანის ცოდვად მიქცევა, მახვილისთვის რომ ამზადებს უფალი.

²⁹იშვიათად, რომ ვაჭარმა გაუძლოს ცთუნებას და მიკიტანმა ცოდვისაგან დაიხსნას თავი.