Read ბიბლია სიბრძნე ზირაქისა წინათქმა 27 Bible Online

სიბრძნე ზირაქისა წინათქმა 27 - ბიბლია bible

სიბრძნე ზირაქისა წინათქმა 27

¹მრავალმა სცოდა წვრილმანის გამო და სიმდიდრის მძებნელი თვალს არიდებს.

²მიჯრით მიწყობილ ქვებს შორის ლურსმანი ჩაერჭობა, აღებ-მიცემობაში კი ცოდვა იჭრება.

³ვინც მტკიცედ არ მკვიდრდება უფლის შიშში, მისი სახლი მალე დაიქცევა.

⁴ცხრილის ქნევისას ნაწმენდი რჩება, ასევე კაცის უწმინდურება — მისი მსჯელობისას.

⁵თიხის ჭურჭელი ქურაში გამოიცდება, კაცი კი — მის საუბარში.

⁶როგორ უვლიან ხეს — ნაყოფი წარმოაჩენს; ადამიანის გულის ზრახვებს კი — მისი სიტყვა.

⁷საუბრის დაწყებამდე ნუ აქებ კაცს, რადგან ესაა მისი გამომცდელი.

⁸თუ გულმოდგინედ ეძებ სიმართლეს, კიდევაც ჰპოვებ, და შეიმოსავ მას, როგორც დიდების სამოსს.

⁹როგორც ლომი უსაფრდება მსხვერპლს, ასევე ცოდვა — უსამართლობის ჩამდენთ.

¹⁰ჩიტები თავიანთ მსგავსთა გვერდით სხდებიან; და სიმართლე იმისკენ მიიქცევა, ვინც მასში იწაფავს თავს.

¹¹ღვთისმოსავის საუბარი ყოველთვის სიბრძნეა, უგუნური კი მთვარესავით იცვლება.

¹²უმეცრებთან დროს ნუ დაკარგავ, არამედ გონიერთა შორის იტრიალე.

¹³ბრიყვების საუბარი გაუსაძლისია, მათი სიცილი კი — ცოდვით თავშექცევა.

¹⁴ხშირად მოფიცართა ლაყბობა ყალყზე გიყენებს თმას, მათი კამათი კი სმენას გიხშობს.

¹⁵ქედმაღალთა დავა სისხლისღვრაა და მათი ლანძღვა — სმენისათვის აუტანელი.

¹⁶ხვაშიადის გამმხელი ნდობას დაკარგავს და სულიერ მეგობარს ვეღარა ჰპოვებს.

¹⁷გიყვარდეს მეგობარი და უერთგულე, ხოლო თუ მის საიდუმლოს გაამჟღავნებ, უკან ნუღარ აედევნები.

¹⁸რადგან როგორც კაცი კლავს მტერს, ასევე მოკალი მოყვასის მეგობრობაც.

¹⁹თითქოს ჩიტი გაგეშვას ხელიდან, ისე დაკარგე მეგობარი და ვეღარ დაიბრუნებ.

²⁰მაშ, ნუღარ მისდევ, რადგანაც დაგშორდა და გაგექცა, როგორც შველი — ხაფანგს.

²¹შეიძლება ჭრილობის შეხვევა და ჩხუბის შემდეგ — შერიგებაც, მაგრამ ვინც საიდუმლო გაამჟღავნა, შერიგებას ნუღარ მოელის.

²²თვალის ჩამკვრელი ხრიკებს აწყობს და ვერც ვერავინ შეუშლის ხელს.

²³შენს თვალწინ ენას დაითაფლავს და აღტაცებული დარჩება შენი სიტყვებით, მაგრამ ზურგს უკან გიმუხთლებს და შენს სიტყვებში საცთურსა ჰპოვებს.

²⁴ბევრი რამ მძულს, მაგრამ მასავით — არავინ, და უფალიც მოიძულებს მას.

²⁵ვინც მაღლა აგდებს ქვას, თავის თავზევე დასაცემად აგდებს; მზაკვრული დარტყმა პირს უხსნის ჭრილობას.

²⁶ვინც ორმოს თხრის, თვითონვე ჩავარდება მასში და მახის დამგებიც თვითონვე გაებმება შიგ.

²⁷ბოროტმოქმედს უკანვე მიუბრუნდება ბოროტი და ვერც გაიგებს საიდან დაატყდა თავს.

²⁸ქედმაღლის საქმე დაცინვაა და ლანძღვა-გინება, მაგრამ შურისგება ჩასაფრებული ლომივით მოელის მას.

²⁹ღვთისმოსავთა დაცემის მოხარულნი მახეში გაებმებიან და სასტიკი ტანჯვა სიკვდილამდე მოადნობს მათ.

³⁰რისხვა და ბოღმა სიბილწეა და ცოდვილის ხვედრი.