Read ბიბლია სიბრძნე ზირაქისა წინათქმა 28 Bible Online

სიბრძნე ზირაქისა წინათქმა 28 - ბიბლია bible

სიბრძნე ზირაქისა წინათქმა 28

¹შურისმგებელს სანაცვლოს მიაგებს უფალი, რომელიც არ დაივიწყებს მის ცოდვებს.

²მიუტევე შენს მოყვასს უსამართლობა, რათა ლოცვისას შენც მოგეტეოს შენი ცოდვები.

³ადამიანი ადამიანზე მრისხანებს და უფლისაგან კი ეძებს განკურნებას.

⁴ადამიანს თავისი მსგავსი არ ებრალება და საკუთარ ცოდვათა მიტევებისთვის კი ლოცულობს.

⁵თვით ხორციელი დაბოღმილია და ვინღა გაწმენდს ცოდვებისაგან?

⁶გახსოვდეს აღსასრული და მოეშვი მტრობას; გახსოვდეს ხრწნა და სიკვდილი და აღასრულე მცნებანი.

⁷გახსოვდეს მცნებანი და ნუ ურისხდები მოყვასს; გახსოვდეს უზენაესის აღთქმა და შეიძულე უგუნურება.

⁸ერიდე ჩხუბს და შეიმცირებ ცოდვებს, რადგანაც ჩხუბს გულფიცხი კაცი ტეხს.

⁹ცოდვილი კაცი მეგობრებში შფოთს თესავს და შუღლს ჩამოაგდებს იქ, სადაც მშვიდობა სუფევს.

¹⁰როგორიცაა შეშა, ისეთი დაინთება ცეცხლიც; როგორიცაა ჩხუბის საბაბი, ისეთი ატყდება ჩხუბიც; როგორიცაა კაცის ძალა, ისეთივეა მისი რისხვაც, და რაც მეტი სიმდიდრის პატრონია, მით უფრო მრისხანებს იგი.

¹¹ფიცხელი შუღლი ცეცხლს აღაგზნებს, ფიცხელ ჩხუბში კი სისხლი დაიღვრება.

¹²ნაპერწკალს შეუბერავ და გაღვივდება, დააფურთხებ და ჩაქრება; ორივე შენი პირიდან გამოდის.

¹³წყეულიმც იყოს ორპირი და ცილისმწამებელი, რადგანაც ბევრი მშვიდობიანი ხალხი დაღუპეს.

¹⁴მესამე ენამ ბევრს გამოუთხარა ძირი და ხალხიდან ხალხში დაუწყო დევნა, მკვიდრად ნაშენები ქალაქები დააქცია და დიდებულთა სახლები დაამხო.

¹⁵მესამე ენამ სათნო ქალები განდევნა და თავიანთი ნაღვაწი დააკარგვინა.

¹⁶ვერ ჰპოვებს მოსვენებას მისი მსმენელი და ვერ ეღირსება სიმშვიდეს.

¹⁷შოლტის ცემა იარას აჩენს, ენით ცემა კი ძვლებს შემუსრავს.

¹⁸მრავალნი მოისრნენ მახვილით, მაგრამ უმეტესნი — ენით.

¹⁹ნეტავი იმას, ვინც თავი დაიცვა მისგან, განერიდა მის სიშმაგეს, არ ათრია მისი უღელი და მისი ბორკილით არ შეიბოჭა.

²⁰რადგანაც მისი უღელი რკინის უღელია და მისი ბორკილი — სპილენძისა.

²¹სიკვდილი მძვინვარეა — სიკვდილი მისი და თვით ჯოჯოხეთიც უმჯობესია მასზე.

²²ხელი არა აქვს ღვთისმოსავებთან და ვერ დადაგავს მათ თავისი ალით.

²³უფლისგან განდგომილთ კი დასცემს, მათ შორის იფეთქებს და აღარ ჩაქრება; ლომივით თავს დაესხმის და ჯიქივით მუსრს გაავლებს მათ.

²⁴მაშ, ძეძვი შემოავლე შენს ავლადიდებას და შეკარი შენი ოქრო-ვერცხლი.

²⁵სასწორ-საზომი მიუჩინე შენს სიტყვებს, კარი შეაბი და ურდულით ჩაკეტე პირი.

²⁶ფრთხილად იყავი, რომ შენი სიტყვით არ წაიფორხილო და ბოროტმზრახველის წინ არ დაეცე.