Read ბიბლია სიბრძნე ზირაქისა წინათქმა 29 Bible Online

სიბრძნე ზირაქისა წინათქმა 29 - ბიბლია bible

სიბრძნე ზირაქისა წინათქმა 29

¹ვინც სესხს აძლევს მოყვასს, წყალობას გასცემს და ვინც ხელს უმართავს მას, მცნებათა დამცველია.

²როდესაც უჭირს, ასესხე მოყვასს და თავადაც დროზე დაუბრუნე ვალი.

³სიტყვის პატრონი იყავი, უერთგულე მას და ყოველთვის იპოვი, რაც გჭირდება.

⁴ბევრმა მიიჩნია სესხი ნაპოვნად და შავ დღეში ჩაყარა ხელის გამმართავნი.

⁵ვიდრე მიიღებდეს, ხელებს დაუკოცნის მწყალობელს, ახლობლის ფულზე ლაპარაკისას ხმას დაიდაბლებს, გადახდისას კი ვადას გააჭიანურებს, დაუდევრად უპასუხებს და დროს მოიმიზეზებს.

⁶თუ გადახდაზე მიდგა საქმე, ნახევარს ძლივს მიუტანს და იმასაც დაამადლის; ხოლო თუ გადახდის თავი არა აქვს, გამსესხებელს დაუკარგავს თავისი ფული და სრულიად უმიზეზოდ მტერიც კი შეუძენია, რადგანაც ლანძღვით აიკლებენ და სიძულვილს მიაგებენ პატივისცემის სანაცვლოდ.

⁷ამგვარი ვერაგობის გამო ბევრი თავს არიდებს სესხის გაცემას, რომ ტყუილად არ იზარალოს.

⁸და მაინც, ღარიბის მიმართ სულგრძელი იყავ და მოწყალებას ნუ დაუგვიანებ.

⁹მცნების გულისთვის შეეწიე გლახაკს და გაჭირვებულს ხელცარიელს ნუ გაისტუმრებ.

¹⁰ნუ დაზოგავ ვერცხლს ძმის და მეგობრის გულისთვის და ნუ გასწირავ მას ლოდის ქვეშ დასაჟანგავად.

¹¹შენი საუნჯე ისე შეინახე, როგორც გამცნო უზენაესმა; და ოქროზე მეტ სარგებელს მოგიტანს.

¹²რის გაცემასაც სამოწყალოდ აპირებ, შენს საგანძურში დადე და შეგეწევა უბედობისას.

¹³მტკიცე ფარსა და ბასრ შუბზე უკეთ დაგიცავს მტრებისაგან.

¹⁴კეთილი კაცი თავმდებად დაუდგება მოყვასს, უტიფარი კი მიატოვებს.

¹⁵ნუ დაუკარგავ თავმდებობის მადლს, რადგან სიცოცხლე არ დაიშურა შენთვის.

¹⁶თავმდების კეთილდღეობას დააქცევს ცოდვილი და უმადური თავის მხსნელს მიატოვებს.

¹⁷თავმდებობამ ბევრი შეძლებული კაცი დაღუპა და ზღვის ტალღასავით წალეკა.

¹⁸სახლიდან გაყარა მხნენი და უცხო ტომებში ახეტიალა.

¹⁹თავმდებობის მტვირთველი და მოგებას დახარბებული ცოდვილი თავს ვერ დააღწევს მსჯავრს.

²⁰შეძლებისამებრ შეეწიე მოყვასს და ფრთხილად იყავი, რომ შენც გასაჭირში არ ჩავარდე.

²¹სიცოცხლისათვის მთავარია წყალი და პური, სამოსელი და სახლი, სიშიშვლის დამფარველი.

²²ღატაკს თავისი ქოხი ერჩიოს უცხოთა უხვ სუფრაზე ღრეობას.

²³ცოტას ისევე დასჯერდი, როგორც ბევრს და აღარ დაგაყვედრიან, როგორც გადამთიელს.

²⁴მწარეა კარდაკარ მოხეტიალის სიცოცხლე; სადაც შეგიხიზნებენ, კრინტსაც ვერ დასძრავ.

²⁵რომც ასვა და აჭამო ვინმეს, არც დაგიმადლებს, მწარე სიტყვას პირში მოგახლის:

²⁶„მოდი აქ, გადამთიელო, სუფრა გამიწყვე, და თუ რამე გაქვს, მიმასპინძლე!“

²⁷„აბა, აიბარგე, გადამთიელო, ადგილი და უთმე საპატიო კაცს: ძმა მესტუმრა და სახლი მჭირდება.“

²⁸რა სამძიმოა მგრძნობიარე კაცისთვის, როცა ჭერსა და სესხს ამადლიან.