Read ბიბლია სიბრძნე ზირაქისა წინათქმა 3 Bible Online

სიბრძნე ზირაქისა წინათქმა 3 - ბიბლია bible

სიბრძნე ზირაქისა წინათქმა 3

¹შვილებო, მისმინეთ მამას, და ისე მოიქეცით, რომ იხსნათ თავი.

²რადგანაც უფალმა შვილებზე აამაღლა მამა და დედის მსჯავრი დაამტკიცა მათზე.

³მამის პატივისმცემელი ცოდვათაგან განიწმიდება.

⁴რაღა დედის მადიდებელი და რაღა საუნჯის მომხვეჭი!

⁵მამის პატივისმცემელი შვილებში იხარებს და მისი ლოცვის დღეს შეისმინება.

⁶მამის მადიდებელი დღეგრძელი იქნება და უფლის მორჩილი სიმშვიდეს მოჰფენს დედას;

⁷ისე ემსახურება მშობლებს, როგორც ბატონებს.

⁸სიტყვით და საქმით პატივი მიაგე მამას, რათა მისი კურთხევა გადმოვიდეს შენზე.

⁹რადგანაც მამის კურთხევა განამტკიცებს, დედის წყევლა კი დააქცევს შვილების სახლს.

¹⁰ნუ განდიდდები მამაშენის უპატიობით, რადგანაც პატივს ვერ მოგიტანს მამის აუგი.

¹¹რადგანაც კაცის დიდება მამის პატივისცემაა და შვილებისთვის სირცხვილია შეურაცხყოფილი დედა.

¹²სიბერეში შეეწიე მამაშენს, შვილო, და ნუ დაამწუხრებ მას სიცოცხლეში.

¹³გონებამაც რომ უღალატოს, მოწყალე იყავ და ნუ შეურაცხყოფ მთელი შენი ძალით.

¹⁴რადგანაც მამის შეწყალება არ დაგეკარგება და, ცოდვების მიუხედავად, აშენდები.

¹⁵შენი ურვის დღეს გაგიხსენებენ, და როგორც ყინული სიცხისაგან, დადნება შენი ცოდვები.

¹⁶მამის მიმტოვებელი ღვთისმგმობია და დედის გამამწარებელი დაწყევლილია უფლის მიერ.

¹⁷მშვიდად წარმართე, შვილო, შენი საქმე, და შეგიყვარებს ღვთის სათნო კაცი.

¹⁸რამდენადაც დიდი ხარ, იმდენად დაიმდაბლე თავი, და ჰპოვებ მადლს უფლის წინაშე.

¹⁹რადგანაც დიდია უფლის ძალმოსილება და თვინიერთაგან იდიდება იგი.

²⁰ნუ მიელტვი იმას, რაც მეტისმეტად ძნელია შენთვის, და რაც შენს ძალას აღემატება, ნუ შეეჭიდები.

²¹დაუკვირდი იმას, რაც გემცნო, რადგანაც დაფარული ფუჭია შენთვის.

²²ბევრი საქმე გაქვს და ზედმეტს ნუ მიჰყოფ ხელს; იმაზე მეტიც გამოგეცხადა, რისი წვდომაც კაცს ძალუძს.

²³რადგანაც მრავალი აცთუნა ზრახვამ და ცბიერმა ოცნებამ შეარყია გონება მათი.

²⁴გულქვა საბოლოოდ ბოროტს მოიმკის, და საფრთხის მოყვარე განსაცდელში ჩაიგდებს თავს.

²⁵გულქვას წუხილი შეაურვებს და ცოდვილი ცოდვას მიუსართავს ცოდვას.

²⁶გამოცდა ვერ კურნავს ქედმაღალს, რადგანაც სიავის ნერგს ფესვი გაუდგამს მასში.

²⁷გონიერი გული იგავს ჩასწვდება და ბრძენისთვის სასურველია მსმენელი ყური.

²⁸მოგიზგიზე ცეცხლს წყალი ჩააქრობს და მოწყალება წარეცხავს ცოდვას.

²⁹ვინც სანაცვლოს მიაგებს მწყალობელს, მომავლისათვის ზრუნავს და დაცემის ჟამს საყრდენსა ჰპოვებს.