Read ბიბლია სიბრძნე ზირაქისა წინათქმა 31 Bible Online

სიბრძნე ზირაქისა წინათქმა 31 - ბიბლია bible

სიბრძნე ზირაქისა წინათქმა 31

¹სიფხიზლე სიმდიდრის გამო ხორცს გალევს და მასზე ზრუნვა ძილს უფრთხობს კაცს.

²ფხიზელი ზრუნვა თვალს არ მოგახუჭინებს და მძიმე სენი თეთრად გათენებინებს ღამეს.

³მდიდარი დაშვრა სიმდიდრის მოხვეჭაში და ახლა მშვიდად ტკბება თავისი კეთილდღეობით.

⁴ღარიბი დაშვრა ცხოვრების სიდუხჭირეში და მოსვენების ჟამსაც ღარიბად რჩება.

⁵ოქროს მოყვარე ვერ გამართლდება და ვისაც მოგებაზე ელევა სული, გზა-კვალი აერევა.

⁶მრავალი დაეცა ოქროს გულისთვის და მათსავე თვალწინ იყო მათი დაცემა.

⁷ოქრო მახეა მათთვის, ვისაც თვალს სჭრის, და ყველა უგუნური შიგ გაებმება.

⁸ნეტა იმ მდიდარს, რომელიც უბიწო დარჩა და არ დახარბებია ოქროს.

⁹ვინ არის? ნეტარად შევრაცხავთ, რადგანაც სასწაული მოახდინა თავის ხალხში.

¹⁰ვინ აცთუნა ოქრომ და უმწიკვლო დარჩა? ეს იყოს მისი სიქადული. ვის შეეძლო ცოდვის ჩადენა და არ ჩაიდინა? ბოროტი ექნა და არა ქნა?

¹¹ურყევი იქნება მისი სიმდიდრე და მისი მოწყალება იუწყება საკრებულოში.

¹²მდიდრულ სუფრას უზიხარ? პირს ნუ დააღებ და წამოიძახებ: სუფრაც ამას ჰქვიაო.

¹³გახსოვდეს, არაფერია ხარბ თვალზე უკეთური, არც მასზე გაუმაძღარი შექმნილა რამე; ამიტომაც მისტირის ყველაფერს, რასაც კი ხეცავს.

¹⁴საითაც გაიხედავ, ხელს ნუ გაიწვდი, რომ ლანგარზე მეზობლის ხელს არ შეეხალო.

¹⁵მოყვასზე შენი თავის მიხედვით იმსჯელე და ყველა საქმეს დაუფიქრდი.

¹⁶ჭამე, როგორც კაცს შეშვენის, რასაც გთავაზობენ, და ნუ იღმურძლები, რომ არ შეგიძულონ.

¹⁷პირველმა ანებე თავი ჭამას, ზრდილობის გამო, და ნუ იქნები ხარბი, რომ თავი დააღწიო საცთურს.

¹⁸თუ მრავალთა შორის უზიხარ სუფრას, პირველი ნუ გაიწვდი ხელს.

¹⁹ზრდილი კაცი მცირედსაც დასჯერდება, ამიტომაც არა წუხს სულთქმით თავის საწოლზე.

²⁰ვინც ზომიერად ჭამს, ტკბილად სძინავს, ადრე დგება და მასთანაა მისივე სული. ღორმუცელას კი უძილობა, გულზიდება და მუცლის გვრემა სტანჯავს.

²¹სმა-ჭამამ თუ დაგამძიმა, სუფრიდან ადექი და შეისვენე.

²²მისმინე, შვილო, ყური მათხოვე და ბოლოს ჩახვდები ჩემს სიტყვებს. ყველა საქმეში წინდახედულება გამოიჩინე და არანაირი სენი არ შეგეყრება.

²³პურადს ბაგენი დალოცავენ და მოწმობა მისი სიკეთისა სარწმუნოა.

²⁴პურაძვირზე ქალაქი დრტვინვას მოჰყვება და მოწმობა მისი სიძუნწისა მართებულია.

²⁵ღვინოს ნუ მიეძალები, რადგანაც მას ბევრი დაუღუპავს.

²⁶ფოლადის სიმტკიცეს ქურა გამოსცდის, ქედმაღალთა გულებს კი — ღვინო ჩხუბში.

²⁷სიცოცხლისათვის სარგოა ღვინო თუ ზომიერად სვამენ; რა იქნებოდა სიცოცხლე ღვინის გარეშე? კაცთა სიხარულად შეიქმნა იგი.

²⁸გულს ალხენს და სულს ახარებს დროულად და ზომიერად შესმული ღვინო.

²⁹სულის სიმწარეა ბევრი ღვინის სმა, ჩხუბსა და აყალმაყალს რომ იწვევს.

³⁰სიმთვრალე თავისდა ჭირად აშმაგებს ბრიყვს, ძალას ართმევს და თავ-პირს ულეწავს.

³¹ნადიმობისა და ღვინის სმისას ნუ ჰყვედრი მოყვასს, მოლხენისას ნუ შეურაცხყოფ და თხოვნით ნუ შეაწუხებ.