Read ბიბლია სიბრძნე ზირაქისა წინათქმა 33 Bible Online

სიბრძნე ზირაქისა წინათქმა 33 - ბიბლია bible

სიბრძნე ზირაქისა წინათქმა 33

¹უფლის მოშიშს თავს არ დაატყდება უბედურება და თვით განსაცდელშიაც დაიხსნის ღმერთი.

²ბრძენკაცი არ შეიძულებს სჯულს, ხოლო ვინც თვალთმაქცობს მის წინაშე, გრიგალში მოხვედრილ ხომალდსა ჰგავს.

³გონიერი კაცი იწამებს სჯულს, და სჯული სარწმუნოა მისთვის, როგორც ურიმის პასუხი.

⁴მოამზადე სიტყვა და მოგისმენენ, შეუწონე ცოდნას და გაეცი პასუხი.

⁵ეტლის ბორბალია ბრიყვის გული და მბრუნავი ღერძი — მისი აზრები.

⁶ფიცხ ულაყსა ჰგავს მქირდავი მეგობარი: ვინც არ უნდა მოახტეს, ჭიხვინებს.

⁷რითი სჯობს ერთი დღე მეორეს, თუკი წელიწადის ყოველი დღე მზის სინათლითა ნათობს?

⁸უფლის სიბრძნემ გაყო ისინი, მან განასხვავა ალოსთავნი და დღესასწაულნი.

⁹ზოგი მათგანი აამაღლა და წმიდაჰყო, ზოგი კი სადაგ დღეთა რიცხვს მიაკუთვნა.

¹⁰ყოველი ადამიანი მიწისგანაა და მიწისგანვე შეიქმნა ადამიც.

¹¹მაგრამ ყოვლისმცოდნე უფალმა დაყო ისინი და ერთმანეთისაგან განასხვავა მათი გზები.

¹²ზოგი მათგანი აკურთხა და აამაღლა, ზოგი წმიდაჰყო და მიიახლა, ზოგი კი დაწყევლა და დაამდაბლა და ადგილიდან დაძრა ისინი.

¹³როგორც თიხაა მექოთნის ხელში, როგორც უნდა, ისე რომ ზელს მას, ასეა ადამიანიც შემოქმედის ხელში, თავისი მსჯავრით რომ მიაგებს მას მისაგებელს.

¹⁴როგორც ბოროტებას უპირისპირდება სიკეთე, სიკვდილს კი — სიცოცხლე, ასევე ღვთისმოსავს — ცოდვილი.

¹⁵ასევე აღიქვი შემოქმედის ყოველი საქმე, წყვილ-წყვილად რომ იჩენენ თავს და უპირისპირდებიან ერთმანეთს.

¹⁶მე უკანასკნელმა ვიმუშაკე ფხიზლად, როგორც მცვრეველმა — მკრეფელთა კვალზე.

¹⁷უფლის კურთხევით მაინც ვიმარჯვე და მკრეფავებივით ავავსე საწნახელი.

¹⁸იცოდეთ, მხოლოდ ჩემთვის როდი დავშვერი, არამედ ყველასათვის, ვინც ცოდნას ეძებს.

¹⁹მისმინეთ, ერის მთავარნო, და საკრებულოს წინამძღვარნო, ყურად იღეთ:

²⁰ნურც ცოლ-შვილს, ნურც ძმას და მეგობარს ნუ დაისვამ თავზე; შენს სიცოცხლეში ნუ მისცემ სხვას შენს ქონებას, თუ არ გინდა სატირლად და სანანებლად გაგიხდეს საქმე.

²¹სანამ ცოცხლობ და პირში სული გიდგას, ნურავის დაუთმობ შენს ადგილს.

²²რადგანაც უმჯობესია შვილები გთხოვდნენ, ვიდრე შენ უყურებდე შვილებს ხელებში.

²³ყველა შენს საქმეში ითავკაცე და ნუ შებღალავ შენს ღირსებას.

²⁴შენი სიცოცხლის დამლევს და აღსასრულის ჟამს გაანაწილე მემკვიდრეობა.

²⁵საკვები, ჯოხი და ტვირთი — სახედარს; პური, წვრთნა და საქმე კი — მსახურს.

²⁶დაასაქმე მონა და მოისვენებ, ხელებს გაუხსნი და თავს აიშვებს.

²⁷ხარის ქედს უღელი და აპეურები მოდრეკენ, ცბიერ მსახურს კი — ხუნდები და წყლულები.

²⁸საქმე მიუჩინე, რომ არ გაზარმაცდეს, რადგანაც ბევრი სიავის სათავეა მცონარება.

²⁹დაასაქმე, როგორც შეეფერება, ხოლო თუ არ დაგემორჩილა, მძიმე ბორკილები დაადე.

³⁰მაგრამ ნურავის მოსთხოვ მეტისმეტს და ნურც განუსჯელად აკეთებ რასმე.

³¹თუ გყავს მსახური, შენსავით იყოს, რადგანც სისხლით გყავს შეძენილი.

³²თუ გყავს მსახური, ძმასავით მოექეცი, რადგანაც დაგჭირდება, როგორც შენი სული.

³³თუ შეურაცხყოფ, ადგება და გაიქცევა; სად, რომელ გზაზე დაუწყებ ძებნას?