Read ბიბლია სიბრძნე ზირაქისა წინათქმა 34 Bible Online

სიბრძნე ზირაქისა წინათქმა 34 - ბიბლია bible

სიბრძნე ზირაქისა წინათქმა 34

¹ფუჭი და ამაო იმედებით უგუნური სულდგმულობს, ბრიყვს კი ფრთებს ასხამენ სიზმრები.

²რაღა ჩრდილის მოხელთების მოსურნე ან ქარის მდევნელი და რაღა სიზმრების მოიმედე!

³სიზმარი სხვა არა არის რა, თუ არა უბრალო ანარეკლი: მსგავსება სახისა სახის პირისპირ.

⁴უწმინდურისაგან რანაირად გამოვა წმინდა, სიცრუისაგან კი — სიმართლე?

⁵ყოველგვარი მისნობა, მკითხაობა თუ სიზმარი ფუჭია და მშობიარესავით ოცნებებით ავსებენ გულს.

⁶თუკი შესაგონებლად არ მოგივლინა უზენაესმა, ყურადღებას ნუ მიაქცევ მათ.

⁷რადგანაც მრავალნი აცთუნეს სიზმრებმა და დაეცნენ მათი მოიმედენი.

⁸სჯული ამ სიცრუეთა გარეშეც აღსრულდება და სიბრძნე სრულიქმნება მორწმუნის პირით.

⁹მოხეტიალე კაცმა ბევრი იცის და მრავალნაცადი გონივრულს გვაუწყებს.

¹⁰გამოუცდელს ცოდნა აკლია, მოხეტიალემ კი ცოდნა გაამრავლა.

¹¹ვინ მოსთვლის, რამდენი რამ მინახავს ხეტიალისას და გაცილებით მეტი ვიცი, ვიდრე ვამბობ.

¹²ბევრჯერ ვმდგარვარ სიკვდილის პირას, მაგრამ გამოცდილებას ვუხსნივარ.

¹³უფლის მოშიშთა სული ცხონდება, რადგანაც მათი სასოებაა მათივე მხსნელი.

¹⁴უფლის მოშიში არაფერს შეუდრკება და შეუშინდება, რადგანაც უფალია მისი იმედი.

¹⁵ნეტარია უფლის მოშიშის სული! ვინ უდგას მხარში და ვინაა მისი საყრდენი!

¹⁶უფლის თვალი დაჰყურებს მის მოყვარულთ; იგია ძლევამოსილი მფარველი და მტკიცე საყრდენი, სიცხისა და შუადღის ხვატისაგან რომ გვიფარავს, წაფორხილებისას ხელის შემშველებელი და დაცემისას დამცველი.

¹⁷სულის ამამაღლებელი და თვალის მანათებელი, მკურნავი, მაცოცხლებელი და მკურთხეველი.

¹⁸საგმობია მსხვერპლი, უსამართლოდ მონახვეჭისაგან შეწირული, და შეუწყნარებელია უსჯულოთა ძღვენი.

¹⁹უზენაესი სათნოდ არ მიიჩნევს მკრეხელთა შესაწირავს და არც მსხვერპლის სიმრავლის გამო მიუტევებს ცოდვებს.

²⁰გინდ შვილი დაგიკლავს მამის წინაშე და გინდ უპოვართაგან მინატაცი შეგიწირავს მსხვერპლად.

²¹გაჭირვებულთა პური უპოვართა სიცოცხლეა, სისხლისმსმელია მისი წამრთმევი.

²²მკვლელია, ვინც საზრდოს ართმევს მოყვასს, და ვინც მოჯამაგირეს ჯამაგირს სტაცებს — სისხლისმღვრელი.

²³როდესაც ერთი აშენებს და მეორე ანგრევს, რა დარჩებათ ქანცგაწყვეტის გარდა?

²⁴როდესაც ერთი ლოცულობს და მეორე იწყევლება, ვის ხმას შეისმენს მეუფე?

²⁵ვინც განიბანება მას შემდეგ, რაც გვამს შეეხო და კვლავ შეეხება მას, რას არგებს განბანვა?

²⁶ასე, თუ კაცი თავისი ცოდვების გამო მარხულობს, მერე კი იმასვე სჩადის, ვინ შეისმენს მის ვედრებას, ან რას მოიგებს მარხულობით?