Read ბიბლია სიბრძნე ზირაქისა წინათქმა 35 Bible Online

სიბრძნე ზირაქისა წინათქმა 35 - ბიბლია bible

სიბრძნე ზირაქისა წინათქმა 35

¹სჯულის შემნახავი შესაწირავს ამრავლებს, მცნებათა დამცველი კი სამადლობელ მსხვერპლს სწირავს.

²მადლის მიმგები გამტკიცული ფქვილის შემწირავია, მოწყალების გამღები კი — ქების მსხვერპლისა.

³უფალს სათნო უჩანს ბოროტისაგან განშორება და შეიწყალებს უსამართლობისაგან განდგომილს.

⁴ხელცარიელი ნუ წარსდგები უფლის წინაშე, რადგანაც მცნება მოითხოვს ამას.

⁵მართლის შესაწირავი აპოხიერებს სამსხვერპლოს და მისი კეთილსურნელება უზენაესამდე აღწევს.

⁶მართალი კაცის მსხვერპლი საამოა და დავიწყებას არ მიეცემა მისი ხსოვნა.

⁷კეთილი თვალით ადიდე უფალი და ნუ დაამცრობ შენი შრომის პირველნაყოფს.

⁸სახემხიარული იყავ ყოველთვის, როდესაც გასცემ და სიხარულით შესწირე მეათედი.

⁹მიეცი უზენაესს, როგორც თვითონ გიბოძებს, და კეთილი გულით უძღვენ, რის ნებასაც გაძლევს შენი მონახვეჭარი.

¹⁰რადგან უფალი სანაცვლოს მიმზღველია და შვიდმაგს მოგაგებს.

¹¹ნუ შეამცირებ ძღვენს, თორემ არ მიიღებს, და ნურც უსამართლო მსხვერპლის იმედი გექნება.

¹²რადგანაც უფალი მსაჯულია და მისთვის უცხოა მიკერძოება.

¹³პირს არ იბრუნებს გლახაკისაგან და მის მუდარას შეისმენს.

¹⁴შეიწყნარებს ქვრივ-ობლის ვედრებას, თუ თავის სათქმელს შეღაღადებს.

¹⁵განა ქვრივს ცრემლები არ ჩამოსდის ღაწვებზე და ხმამაღლა არ უჩივის იმათ, ვინც მას ატირებს?

¹⁶ღვთისმსახურს კეთილმოწყალედ შეიწყნარებს უფალი და მისი ვედრება ღრუბლებს უწევს.

¹⁷თვინიერის ლოცვა ღრუბლებს ასცდება და მანამდე არ ინუგეშება, სანამდის უფალს არ მიაღწევს,

¹⁸და არ შეწყდება, სანამ არ მოხედავს უზენაესი, მართლად არ განსჯის და სამართალს არ აღასრულებს.

¹⁹არც უფალი დაახანებს და აღარ მოუთმენს მათ,

²⁰ვიდრე წელში არ გატეხს უწყალოდ და შურს არ მიაგებს წარმართთაც.

²¹ვიდრე არ შემუსრავს გოროზთა სიმრავლეს და უსამართლოთა კვერთხს არ დალეწავს;

²²ვიდრე სანაცვლოს არ მიაგებს კაცს მისი საქმისამებრ და კაცთა ზრახვისამებრ არ განსჯის მათ საქმეებსაც;

²³ვიდრე სამსჯავრიზე არ განსჯის თავის ხალხს და არ გაახარებს მას თავისი მოწყალებით;

²⁴რადგანაც ხსნაა წყალობა მწუხარებისას, როგორც საავდრო ღრუბელი გვალვაში.