Read ბიბლია სიბრძნე ზირაქისა წინათქმა 36 Bible Online

სიბრძნე ზირაქისა წინათქმა 36 - ბიბლია bible

სიბრძნე ზირაქისა წინათქმა 36

¹შეგვიწყალე, ღმერთო, სამყაროს მბრძანებელო, მოგვხედე და ყველა ხალხს მოუვლინე შენი შიში.

²აღმართე შენი ხელი უცხო ხალხებზე, რათა იხილონ შენი ძალა.

³როგორც შენი სიწმიდე ცხადყავი ჩვენში მათ თვალწინ, ასევე ცხადყავ შენი სიდიადეც მათ შორის ჩვენს თვალწინ.

⁴დაე, შეიცნონ, როგორც ჩვენ შევიცანით, რომ არ არის სხვა ღმერთი შენს გარდა, უფალო.

⁵განაახლე ნიშნები და კვლავ მოახდინე სასწაულები, განადიდე შენი ხელი და მარჯვენა მკლავი.

⁶აღმართე მძვინვარება და აფრქვიე რისხვა, შემუსრე მოშუღარი და წარხოცე მტერი.

⁷დააჩქარე დრო და გახსოვდეს ფიცი, დაე, განაცხადონ დიადი საქმეები შენნი.

⁸მძვინვარე ცეცხლმა შთანთქას, ვინც კი გადაგირჩება და მოისრან შენი ხალხის მჩაგვრელნი.

⁹შემუსრე მტრების წინამძღოლთა თავები, რომ გაიძახიან, არავინ არისო ჩვენს გარდა.

¹⁰შეკრიბე იაკობის ყოველი ტომი და შენს სამკვიდროდ აქციე, როგორც იყო დასაბამიდან.

¹¹შეიწყალე, უფალო, ხალხი, შენი სახელით წოდებული, და ისრაელი, პირმშოდ რომ შეგირაცხავს.

¹²შეიწყალე შენი სიწმიდის ქალაქი, იერუსალიმი, შენი სავანე.

¹³აღავსე სიონი შენი სიქველის ქებით და შენი ხალხი — შენი დიდებით.

¹⁴მიეც დასტური დასაბამით შენს მიერ შექმნილთ და აღმართე წინასწარმეტყველებანი შენი სახელით.

¹⁵მიეცი ჯილდო, ვისაც შენი იმედი აქვს; დაე, გამართლდნენ შენი წინასწარმეტყველნი.

¹⁶ყურად იღე, უფალო, ვედრება შენი მსახურებისა, აარონის თანახმად, რომელმაც აკურთხა შენი ხალხი.

¹⁷შეიცნოს ყველამ მთელი დედამიწის ზურგზე, რომ შენ ხარ უფალი, საუკუნეთა ღმერთი.

¹⁸კუჭი ყოველგვარ საჭმელს იღებს, მაგრამ არის საჭმელი საჭმელზე უმჯობესი.

¹⁹როგორც სასა გრძნობს გარეული ფრინველის კერძს, ისე გონიერი გული — ცრუ სიტყვებს.

²⁰ცბიერი გული მწუხარებას იწვევს, მაგრამ მრავალნაცადი კაცი სანაცვლოს მიაგებს მას.

²¹ქალი ყველა კაცს იღებს ქმრად, მაგრამ არის ქალწული ქალწულის მჯობი.

²²ქალის სილამაზე ამხიარულებს სახეს და კაცისთვის ყველაზე სასურველია;

²³თუ მისი სიტყვაც თბილია და ტკბილი, მისი ქმარი უბედნიერესია კაცთა შორის.

²⁴ვისაც ცოლი მოჰყავს, კეთილდღეობას უყრის საფუძველს, შესაფერ შემწეს და სიმშვიდის საყუდარს იძენს.

²⁵სადაც არ არის ზღუდე, იქ ქონებას იტაცებენ, ხოლო სადაც არ ტრიალებს ქალი, კაცის ხვედრი ოხვრაა და ხეტიალი.

²⁶ვინ ენდობა იარაღასხმულ ავაზაკს, ქალაქიდან ქალაქში რომ დაძრწის?

²⁷ასე კაციც, რომელსაც ბუდე არა აქვს, და სადაც დაუღამდება, იქ ეძებს სადგურს.