Read ბიბლია სიბრძნე ზირაქისა წინათქმა 37 Bible Online

სიბრძნე ზირაქისა წინათქმა 37 - ბიბლია bible

სიბრძნე ზირაქისა წინათქმა 37

¹ყველა მეგობარს შეუძლია თქვას, მეგობარი ვარო, მაგრამ ზოგი მხოლოდ სახელითაა მეგობარი.

²განა სიკვდილივით სამწუხარო არ არის, როცა ამხანაგი და მეგობარი მტრად გექცევა?

³ო, ბოროტმზრახველობავ, საიდან შემოგვეპარე, რომ მთელი ხმელეთი მზაკვრობით დაგეფარა?

⁴მეგობარი ხარობს მეგობრის სიხარულით, მისი მწუხარების ჟამს მის წინააღმდეგ აღიძვრის.

⁵მეგობარი მეგობარს ეხმარება შრომაში სტომაქისთვის, ხოლო ომის დროს ფარს დასწვდება.

⁶ნუ ამოშლი მეგობარს შენი სულიდან და ნუ დაივიწყებ, როდესაც გილხინს.

⁷ყველა მრჩეველი საკუთარ რჩევას აქებს, მაგრამ ზოგი მხოლოდ თავისდა სასარგებლოდ იძლევა რჩევას.

⁸მრჩეველისაგან დაიცავ სული; ჯერ გამოიცანი, რა ნებავს: ხომ შეიძლება თავისთვის სასარგებლო რამ გირჩიოს, შენზე კი წილი ყაროს

⁹და გითხრას: „სწორ გზას ადგახარ.“ მერე კი ჩაგისაფრდეს, რომ დაინახოს, რა შეგემთხვევა.

¹⁰რჩევას ნუ ჰკითხავ ქვებუდანას და შენს მოშურნეთ დაუფარე განზრახვა.

¹¹ნუ ითათბირებ ქალთან მის რაყიფზე და ჯაბანთან — ომზე, ვაჭართან — გაცვლა-გამოცვლაზე და მყიდველთან — გაყიდვაზე, მოშურნესთან — მადლიერებაზე და უწყალოსთან — ქველმოქმედებაზე, ზარმაცთან — ამა თუ იმ საქმეზე და ერთი წლით დაქირავებულთან — სამუშაოს დასრულებაზე; არანაირი ბჭობისას არ ენდო მათ.

¹²მხოლოდ ღვთისმოსავ კაცთან იქონიე საქმე, ვისზედაც შეიტყობ, რომ მტკიცედ იცავს მცნებებს, ვისი სულიც ეთანხმება შენსას, და თუ დაეცი, შენთან ერთადვე ივალალებს.

¹³მიჰყევი შენი გულის რჩევას, რადგანაც მასზე უფრო სანდო არავინა გყავს.

¹⁴კაცის სული ზოგჯერ მეტს გვაუწყებს, ვიდრე მაღლა მსხდომი შვიდი მეთვალყურე.

¹⁵მაგრამ ამასთანავე ევედრე უზენაესს, რომ სიწრფელით წარმართოს შენი გზა.

¹⁶ყოველგვარი საქმის დასაბამი განსჯაა, ყველა მოქმედებაზე უწინარესი კი — რჩევა.

¹⁷გულის ცვალებადობის კვალი ოთხ მდგომარეობას გვიჩვენებს:

¹⁸სიკეთეს და ბოროტებას, სიცოცხლესა და სიკვდილს; ყოველთვის კი ენა მბრძანებლობს.

¹⁹ზოგი კაცი გაწაფულია, ვინ მოსთვლის, რამდენსა მოძღვრავს, მაგრამ თავისთვის კი ღმერთს არ უქნია.

²⁰ზოგი სიტყვით იჩემებს ბრძნობას, მაგრამ საძულველია და არავითარი საზრდო არ ეღირსება,

²¹რადგან უფლისგან არ მიეცა მადლი და ყოველგვარ სიბრძნეს მოკლებულია.

²²ზოგი ბრძენია თავისივე თავისთვის, და მისი ცოდნის ნაყოფი მის ბაგეზე უფრო სარწმუნოა.

²³ბრძენკაცი თავის ხალხს აღზრდის, და სანდოა მისი ცოდნის ნაყოფი.

²⁴ბრძენკაცი კურთხევით აღივსება და მას ნეტარად შერაცხავს ყველა მხილველი.

²⁵კაცის სიცოცხლე დღეების რიცხვით განისაზღვრება, მაგრამ ურიცხვია ისრაელის დღენი.

²⁶ბრძენი თავისი ხალხის ნდობას მოიხვეჭს და საუკუნოდ იცოცხლებს მისი სახელი.

²⁷შვილო, სიცოცხლეში გამოსცადე შენი სული; ნახე, რა არის მისთვის ცუდი და ერიდე მას.

²⁸რადგანაც ყველაფერი როდი რგებს ყველას და არც ყველა სულისთვისაა სასიკეთო ყოველი.

²⁹გაუმაძღარი ნუ იქნები განცხრომისას და სასმელ-საჭმელს ნუ დაეხარბები.

³⁰რადგანაც ნაყროვნება სნეულების მიზეზია და გაუმაძღრობას მუცლის გვრემა მოსდევს.

³¹ბევრი გადაჰყოლია გაუმაძღრობას, თავშეკავებული კი სიცოცხლეს იხანგრძლივებს.