Read ბიბლია სიბრძნე ზირაქისა წინათქმა 38 Bible Online

სიბრძნე ზირაქისა წინათქმა 38 - ბიბლია bible

სიბრძნე ზირაქისა წინათქმა 38

¹იმდენი პატივი მიაგე მკურნალს, რამდენადაც გჭირდება, რადგანაც უფალმა შექმნა იგი.

²ვინაიდან მკურნალობა უზენაესისაგან არის და ნიჭიც მეუფისგან ეძლევა მას.

³ცოდნა აამაღლებს მკურნალს და დიდებულთა შორის მოუხვეჭს პატივს.

⁴უფალმა მიწისაგან შექმნა წამლები და გონიერი კაცი არ უგულებელყოფს მათ.

⁵განა ხისაგან არ დატკბა წყალი, რათა საცნაური გამხდარიყო ძალა უფლისა?

⁶ხალხსაც იმიტომ მისცა ცოდნა, რომ მის სასწაულთა გამო ედიდებინათ იგი.

⁷მათი წყალობით მკურნალობს და ტკივილებს უამებს ხალხს, და მეწამლეც მათგან ამზადებს ნაზავს.

⁸არასოდეს დასრულდება მისი ქმედება და მისი მეოხებით სუფევს მშვიდობა დედამიწაზე.

⁹შვილო, დაუდევრად ნუ მოექცევი შენს სნეულებას, არამედ უფალს შეევედრე და ის განგკურნავს.

¹⁰განუდექ ცთუნებას, ხელი გაისწორე და ყოველგვარი ცოდვისაგან განიწმიდე გული.

¹¹მიეცი კეთილსურნელება, სამახსოვრო მსხვერპლად — გამტკიცული ფქვილი, და მსუყე-ყავ შესაწირავი, როგორი შეძლებაც გაქვს.

¹²მიეცი ადგილი მკურნალს, რადგან ისიც უფალმა შექმნა, და ნუ განიშორებ, ვინაიდან გჭირდება იგი.

¹³არის დრო, როცა შენი განკურნება მათ ხელშია.

¹⁴რადგან ისინიც უფალს ევედრებიან, შეგვეწიე, რომ მოვუფონოთ სნეულს და სიცოცხლე შევუნარჩუნოთო.

¹⁵ვინც თავისი შემოქმედის წინაშე სცოდავს, დაე, ჩავარდეს მკურნალის ხელში.

¹⁶მიცვალებულს ცრემლი აფრქვიე, შვილო, მოთქმით იტირე, როგორც ტირის სიმწრით შეძრული, საკადრისად შემოსე და დაუმარხავს ნუ დატოვებ.

¹⁷მწარე იყოს გოდება და ცხელი — ცრემლი; იგლოვე, როგორც მას შეშვენის ერთი თუ ორი დღე, რომ აირიდო ცილისწამება; და გაიქარვე დარდი.

¹⁸რადგანაც დარდი სიკვდილსაც იწვევს და გულისწუხილი ძალის დამშრეტია.

¹⁹უბედურებისაგან განუყრელია მწუხარება და გულის მომკვლელია ღატაკის ყოფა.

²⁰გულით ნუ მიეცემი მწუხარებას, გახსოვდეს აღსასრული და განირიდე იგი.

²¹ნუ დაივიწყებ ამას, რადგანაც დაბრუნება შეუძლებელია, ვერც მკვდარს არგებ რასმე და თავს კი გაიტანჯავ.

²²გახსოვდეს, რომ მისი ხვედრი არც შენ აგცდება; გუშინ — მისი, დღეს — შენი.

²³მკვდრის გასვენების შემდეგ ნუღარ შეაწუხებ მის ხსოვნას; როდესაც სული ამოხდება, თავი ინუგეშე და ნუღარ სწუხხარ.

²⁴წიგნიერი ცოდნის შეძენას მოცალეობის ხელსაყრელი ჟამი სჭირდება, და მხოლოდ საქმეთაგან თავისუფალი თუ ეზიარება სიბრძნეს.

²⁵როგორ გახდება ბრძენი, ვისაც გუთანი უჭირავს, თავს იწონებს შოლტის ტყლაშუნით, ხარებს მიერეკება, მთელი ცხოვრება მათსავით შრომობს და მხოლოდ მოზვრები აკერია პირზე?

²⁶მისი საფიქრალი კვლების გავლებაა და საზრუნავი — ხბორების საკვები.

²⁷იგივე ითქმის ყველა ხუროსა თუ ხუროთმოძღვარზე, ვერც დღისით და ვერც ღამით რომ ვერ მოუცლია; ბეჭდის თვლების მთლელი მხოლოდ იმას ცდილობს, რომ უფრო ნატიფად და ნაირფერად იყოს ნათალი და ღამეების თეთრად მთეველმა დროულად დაასრულოს საქმე.

²⁸ასევეა მჭედელიც, გრდემლთან მიმჯდარი და რკინის ნაკეთობაზე ჩაფიქრებული; ცეცხლის კვამლი უფიტავს სხეულს, ნიადაგ ებრძვის ქურის მხურვალებას, ყურთასმენას უხშობს უროს ბაგუნი, თვალი კი ყალიბზე უჭირავს, მისი საფიქრალი ისაა, რომ მალე დაასრულოს ნაკეთობა და, ღამეების მთეველმა, სრულყოფილად შეამკოს იგი.

²⁹ასეა მეთუნეც, თავის საქმეს რომ უზის და ფეხებით აბრუნებს ბორბალს, თავს დაჰკანკალებს საქმეს და მთელი თავისი ნახელავი აღრიცხული აქვს;

³⁰ხელით ზელს თიხას, ხოლო ფეხებით მის სიმკვრივეს არბილებს; ერთი სული აქვს, როდის მორჩება მოჭიქვას, რომ ბოლოს ღუმელი გაწმინდოს და გაასუფთაოს.

³¹ყველას თავისი მარჯვენის იმედი აქვს და თითოეული ბრძენია თავის საქმეში.

³²მათ გარეშე ვერ აშენდება ქალაქი, ვერც ხალხი დასახლდება და იცხოვრებს იქ.

³³მაგრამ მათ არც სახალხო საბჭოში უხმობენ და არც სხდომებზე იწვევენ; არც მსაჯულის სავარძელში სხედან და არც მსჯავრის გამოტანაზე მსჯელობენ,

³⁴არც კანონებში იქექებიან, არც განაჩენი გამოაქვთ და არც იგავთა აზრს ჩხრეკენ, მაგრამ საფუძველს კი უყრიან ამქვეყნიურ ყოფას და — ხელი მოგვიმართეო, შესთხოვენ ღმერთს.