Read ბიბლია სიბრძნე ზირაქისა წინათქმა 39 Bible Online

სიბრძნე ზირაქისა წინათქმა 39 - ბიბლია bible

სიბრძნე ზირაქისა წინათქმა 39

¹მხოლოდ ის, ვინც თავის სულს უძღვნის უზენაესის სჯულზე ფიქრს, ხელს მიჰყოფს წინაპართა სიბრძნის ძიებას და წინასწარმეტყველებაში გაიწაფავს თავს;

²შეითვისებს სახელოვან კაცთა თქმულებებს და იგავთა ნართაულ აზრს ჩაუღრმავდება;

³გამოიკვლევს ანდაზების ფარულ არსს და იგავთა გამოცანების წვდომას ეცდება;

⁴დიდებულთა შორის იმსახურებს და წარუდგება წინამძღოლს; უცხო ტომთა მხარეში იმოგზაურებს, რადგანაც სიკეთეც და ბოროტებაც განუცდია კაცთა შორის;

⁵თავის გულს იქით წარმართავს, რომ დილაადრიან მიიქცეს უფლის მიმართ, რომელმაც შექმნა იგი; უზენაესის წინაშე ილოცებს და სავედრებლად გახსნის ბაგეებს, რათა ცოდვათა მიტევება შესთხოვოს მას;

⁶თუ დიადი უფალი ინებებს, აღივსება გონების სულით, თავისი სიბრძნის სიტყვებს აწვიმებს და ლოცვისას ადიდებს უფალს.

⁷კეთილად წარმართავს თავის ნებას და გონებას და ეცდება გაიცხადოს უფლის საიდუმლონი;

⁸გამოაბრწყინვებს განსწავლით შეძენილ ცოდნას და უფლის აღთქმისეული სჯულით იამაყებს;

⁹მრავალნი შეაქებენ მის ცოდნას და არ დაივიწყებენ უკუნისამდე; არ წაიშლება მისი ხსოვნა და მისი სახელი ცოცხლად გადაეცემა თაობებიდან თაობებს;

¹⁰ხალხები ადიდებენ მის სიბრძნეს და საკრებულო გვახარებს მის ქებას;

¹¹სიცოცხლეში ათასებზე უფრო დიდ სახელს მოიხვეჭს და არც სიკვდილის შემდეგ მოაკლდება დიდება.

¹²კიდევ ბევრი მაქვს სათქმელი, რაზედაც მიფიქრია; სავსე ვარ, როგორც მთვარე აღვსებისას.

¹³მისმინეთ, ღვთისმოსავო შვილებო, და გაიფურჩქნეთ წყლის პირას გაშლილი ვარდივით;

¹⁴ლიბანის ნაძვივით აფრქვიეთ კეთილსურნელება, აყვავდით, როგორც შროშანი, მოჰფინეთ სურნელი და იგალობეთ საგალიბელი; ყოველი საქმით აკურთხეთ უფალი;

¹⁵განადიდეთ მისი სახელი, მადლი მიაგეთ ქება-დიდებით, ბაგეთა გალობით და ბარბითთა ხმობით, მადლობისას კი ასე წარმოთქვით:

¹⁶„რა მშვენიერია უფლის ყოველი საქმე, რა დროულად აღსრულდება ყოველი ბრძანება მისი.“ ნუ იტყვი: „ეს რა არის?“ ან: „რისთვის არის?“ რადგანაც თავის დროზე გაირკვევა ყოველი.

¹⁷მისი სიტყვისამებრ, ზვინივით დადგა წყალი; და მის ბაგეთა წარმონათქვამით გაჩნდა წყალთა შესაკრებელი.

¹⁸მისი ბრძანებითაა ყველაფერი, რაც თვითონ მოსწონს, და ვერავინ დააკნინებს მისი მაცხოვრების ძალას.

¹⁹მის წინაშეა ყველა ხორციელის საქმე, და ვერაფერი დაემალება მის თვალს.

²⁰უკუნითი უკუნისამდე განჭვრეტს ყველაფერს და არა არის რა მისთვის საოცარი.

²¹ნუ იტყვი: „რა არის ეს?“ ან: „რისთვის არის?“ რადგანაც ყველაფერი ისე შეიქმნა, როგორც ჯერ არს.

²²კურთხევა მისი მდინარესავით ფარავს და წარღვნასავით არწყულებს ხმელეთს.

²³თუმცა მის რისხვასაც განიცდიან ხალხები, როგორც ოდესღაც, მლაშობად რომ აქცია წყლები.

²⁴ღვთისმოსავთათვის სწორია მისი გზები, უსჯულოთათვის კი — დამაბრკოლებელი.

²⁵დასაბამითვე კეთილთათვის შექმნა სიკეთე, უკეთურთათვის კი — ბოროტება.

²⁶აი, რა არის არსებითი ადამიანის სიცოცხლისათვის: წყალი და ცეცხლი, რკინა და მარილი, ხორბლის ფქვილი და რძე, თაფლი და ყურძნის წვენი, ზეთი და სამოსი;

²⁷ყოველივე ეს ღვთისმოსავთა სასიკეთოდაა, ცოდვილთ კი საზიანოდ ექცევა.

²⁸ზოგი ქარი ნაცვლის მისაგებად ქრის და თავისი მძვინვარებით ამძაფრებს თავისსავე ძალას; ვერაფერი დაუდგება წინ მის კვეთებას, თანდათანობით რომ აცხრობს თავისი შემოქმედის რისხვას.

²⁹ცეცხლი და სეტყვა, შიმშილი და სიკვდილი — ყოველივე ეს სანაცვლოს მისაგებადაა შექმნილი.

³⁰მხეცთა ღოჯები და მორიელნი, ქვეწარმავალნი და მახვილი ნაცვალს მიაგებენ უსჯულოთ მათ დასაღუპად.

³¹სიხარულით ასრულებენ უფლის ბრძანებას, თუ საჭიროა, მზად არიან მიწაზე, და როცა დრო მოაწევს, არ გადავლენ მის სიტყვას.

³²ამიტომაც იმთავითვე გადავწყვიტე, კარგად ავწონ-დავწონე და შემდეგ დავწერე,

³³რომ მშვენიერია უფლის ყოველი საქმე, და თავის დროზე გვიბოძებს ყველაფერს, რაც საჭიროა.

³⁴მაშ, ნუ იტყვი: ეს ამაზე უარესიაო; რადგანაც თავის დროზე სასიკეთოდ იქცევა ყოველი.

³⁵აწ კი იგალობეთ მთელი გულით და ბაგით, აკურთხეთ უფლის სახელი.