Read ბიბლია სიბრძნე ზირაქისა წინათქმა 4 Bible Online

სიბრძნე ზირაქისა წინათქმა 4 - ბიბლია bible

სიბრძნე ზირაქისა წინათქმა 4

¹შვილო, გაიკითხე გლახაკი და ლოდინით ნუ დაღლი მთხოვნელის თვალს.

²ნუ დაამწუხრებ მშიერის სულს და ნუ შეაურვებ კაცს მის გასაჭირში.

³მბორგავ გულს ნუღარ შეაჭირვებ და მთხოვნელს მიცემას ნუ დაუგვიანებ.

⁴ჩაგრულს, შეწევნას რომ გთხოვს, უარს ნუ ეტყვი და გლახაკისგან პირს ნუ იბრუნებ.

⁵მათხოვარს თვალს ნუ აარიდებ და თავს ნუ დააწყევლინებ კაცს,

⁶რადგანაც იმის ვედრებას, ვინც გამწარებული სულით დაგწყევლის, შეისმენს მისი დამბადებელი.

⁷თავაზიანად მოიქეცი საკრებულოში და თავი მოიდრიკე მთავრის წინაშე.

⁸ყური უგდე გლახაკს და მშვიდად, ალერსით მიუგე მას.

⁹იხსენი ჩაგრული მჩაგვრელის ხელიდან და სულმოკლეობას ნუ გამოიჩენ განსჯისას.

¹⁰ობლებს მამის მაგივრობა გაუწიე და მეუღლესავით იზრუნე მათ დედაზე, და იქნები ძე უზენაესისა, მშობელ დედაზე მეტად რომ შეგიყვარებს შენ.

¹¹სიბრძნემ აამაღლა თავისი ძენი და შეეწია მის მაძიებელთ.

¹²სიბრძნის მოყვარეს სიცოცხლე უყვარს და მისთვის ცისკრის ჟამს წამომდგარნი სიხარულით აღივსებიან.

¹³სიბრძნის მფლობელი დიდებას დაიმკვიდრებს და, სადაც უნდა მივიდეს, უფლის კურთხევა არ მოაკლდება.

¹⁴სიბრძნის მსახურნი წმიდას მსახურებენ და მისი მოყვარულნი უფალსაც უყვარს.

¹⁵სიბრძნის მორჩილი წარმართებს განსჯის და ვინც მას მიეახლება, სასოებით იცხოვრებს.

¹⁶ვინც სიბრძნეს ირწმუნებს, კიდევაც დაიმკვიდრებს, და მისი შთამომავალნი გახდებიან სიბრძნის მფლობელნი.

¹⁷თავდაპირველად ზიგზაგოვან გზებზე გაჰყვება კაცს, შიშსა და ძრწოლაში ამყოფებს და თავისი წვრთნით გასტანჯავს მას, ვიდრე არ დარწმუნდება მასში და თავის მცნებათა განსაცდელში არ გაატარებს.

¹⁸შემდეგ კი წრფელ გზაზე შეეგებება და თავისი საიდუმლოს გამოცხადებით გაახარებს.

¹⁹თუ გზას ასცდა, მიატოვებს მას და მისსავ დაცემას ჩაუგდებს ხელში.

²⁰დაუკვირდი დროს და ბოროტისაგან დაიცავ თავი, რომ შენივე სულის არ შეგრცხვეს.

²¹რადგანაც არის სირცხვილი, რომელსაც ცოდვა მოსდევს, და სირცხვილი, რომელიც მადლია და დიდება.

²²ნუ თვალთმაქცობ შენი სულის წინაშე და ნუ გრცხვენია შენდა საზიანოდ.

²³საჭიროების ჟამს ლაგამს ნუ ამოსდებ სიტყვას.

²⁴რადგანაც სიბრძნე სიტყვით იცნობა, ცოდნა კი — ენა-მეტყველებით.

²⁵ნუ ეურჩები ჭეშმარიტებას და შენი უმეცრებისა გრცხვენოდეს.

²⁶ნუ გრცხვენია აღიარო შენი ცოდვები და ნუ შეაჩერებ მდინარის დენას.

²⁷ნუ დაემორჩილები უგუნურ კაცს და ძლიერისკენ ნუ მიგირბის თვალი.

²⁸სიკვდილამდე იღვაწე სიმართლისათვის და უფალი ღმერთი ირბძოლებს შენთვის.

²⁹ნუ იქნები კადნიერი საუბარში, ხოლო საქმეში — მცონარა და დაუდევარი.

³⁰ნუ იქნები ლომივით შენს ჭერქვეშ და შენიანების მიმართ — შარიანი.

³¹ნუ გექნება ხელი გაწვდილი მისაღებად და მომუჭული — გასაცემად.