Read ბიბლია სიბრძნე ზირაქისა წინათქმა 40 Bible Online

სიბრძნე ზირაქისა წინათქმა 40 - ბიბლია bible

სიბრძნე ზირაქისა წინათქმა 40

¹დიდი გაჭირვების გადატანა უწერია ყოველ ადმიანს, და მძიმეა ადამის ძეთა უღელი დედის მუცლიდან მათი გამოსვლის დღიდან იმ დღემდე, როცა ყოველთა დედას უბრუნდებიან.

²საშინელია მათთვის ფიქრი იმაზე, თუ რა მოელით და თავზარსა სცემთ აღსასრულის დღე,

³ტახტზე მორჭმით მჯდომარიდან მოყოლებული მიწად და მტვრად დამდაბლებულამდე,

⁴ძოწეულით მოსილი გვირგვინოსნიდან ჯვალოთი შემოსილამდე; ყველას გულშია რისხვა, ეჭვი, შფოთი და ღელვა, სიკვდილის შიში, მტრობა და მძვინვარება.

⁵სარეცელზე მოსვენებით მწოლარესაც ღამის ძილი უშფოთებს გონებას.

⁶მცირე ხნით ან საერთოდ ვერ ჰპოვებს სიმშვიდეს და ძილშიაც ისევე ფხიზლობს, როგორც დღისით, მოჩვენებებით შეძრწუნებული ბრძოლის ველიდან ოტებულის მსგავსად.

⁷უსაფრთხოების ჟამს გაიღვიძებს და უკვირს, რომ არაფერია საშიში.

⁸ამ დღეშია ყველა ხორციელი, ადამიანიდან პირუტყვამდე, მაგრამ ცოდვილებს შვიდმაგად უმძიმთ.

⁹სიკვდილი და სისხლი, შუღლი და მახვილი, უბედურება და შიმშილი, ურვა და შოლტი,

¹⁰ყოველივე ეს შექმნილია უსჯულოთათვის და წარღვნაც მათ გამო მოხდა.

¹¹ყოველივე, რაც მიწიდანაა, მიწადვე მიიქცევა; წყლისმიერი კი ზღვას უბრუნდება.

¹²ყოველგვარი ქრთამი და უსამართლობა წარიხოცება, რწმენა კი იდგება საუკუნოდ.

¹³უსამართლოთა ავლადიდება ნაკადივით დაიწრიტება, და როგორც გრგვინვა თავსხმისას, გადაიქუხებს.

¹⁴ხელგაშლილი გაიხარებს, ბრალეულნი კი საბოლოოდ წარწყმდებიან.

¹⁵უღვთოთა ნაშიერნი ვერ გაიმრავლებენ რტოებს, და უწმინდური ფესვები სალ კლდეშია გადგმული.

¹⁶წყლისა და მდინარის ნაპირთა ისლი ყველა ბალახზე უწინარეს აღმოიფხვრება.

¹⁷მადლი სამოთხესავით კურთხეულია და მოწყალება საუკუნოდ რჩება.

¹⁸საამურია თვითკმარისა და მაშვრალის სიცოცხლე, მაგრამ განძის მპოვნელისა ორივეზე უმჯობესია.

¹⁹შვილების ყოლა და ქალაქის შენება უკვდავყოფენ სახელს, მაგრამ უმწიკვლო ცოლი გიჯობს ერთსაც და მეორესაც.

²⁰ღვინო და მუსიკა გულს ახარებენ, მაგრამ სიბრძნის სიყვარული ჩრდილავს ორივეს.

²¹სალამური და ბარბითი სიტკბოს ჰმატებენ სიმღერას, მაგრამ ტკბილი ენა ორივეზე უმჯობესია.

²²სილამაზე და მომხიბვლელობა სასურველია თვალისათვის, მაგრამ ჯეჯილის სიმწვანე ორივეზე უამესია.

²³მეგობარი და ამხანაგი ხანდახან ხვდებიან ერთმანეთს, ცოლ-ქმარი კი განუყრელია.

²⁴ძმები და მფარველები — გასაჭირის ჟამს, მაგრამ მოწყალება ორივეზე უფრო მხსნელია.

²⁵ოქრო და ვერცხლი განამტკიცებს ნაბიჯს, მაგრამ კეთილი რჩევა ორივეზე საიმედოა.

²⁶სიმდიდრე და ძალა ამაღლებენ გულს, მაგრამ უფრო მეტად — შიში უფლისა; უფლის მოშიშს არაფერი მოაკლდება და არც შემწეობის ძებნა სჭირდება.

²⁷უფლის შიში კურთხეული სამოთხეა და ყოველგვარ დიდებაზე უკეთ იფარავს მოშიშს.

²⁸შვილო, ნუ იცხოვრებ მათხოვრის ცხოვრებით, რადგანაც მათხოვრობა სიკვდილზე უარესია.

²⁹რა ცხოვრებაა მისი ცხოვრება, ვისაც სხვისი სუფრისკენ გაურბის თვალი, — სულს შეიბილწავს სხვისი ხორაგით; გონიერი და ზრდილი კაცი კი ამის ნებას არ მისცემს თავს.

³⁰ურცხვის პირში მოწყალების თხოვნა თითქოს ტკბება, მაგრამ ცეცხლივით უდაგავს შიგანს.