Read ბიბლია სიბრძნე ზირაქისა წინათქმა 46 Bible Online

სიბრძნე ზირაქისა წინათქმა 46 - ბიბლია bible

სიბრძნე ზირაქისა წინათქმა 46

¹ძლიერი იყო ბრძოლაში იესო, ნავეს ძე, და წინასწარმეტყველებაში მოსეს მემკვიდრე; თავისი სახელის შესაბამისად, დიდი იყო უფლის რჩეულთა ხსნისას, როცა შურს იძიებდა მის წინააღმდეგ აღძრულ მტრებზე, რათა სამკვიდრო დაებრუნებინა ისრაელისთვის.

²როგორი დიდება მოიხვეჭა, როცა აღმართა ხელი და ქალაქის წინააღმდეგ იშიშვლა ხმალი.

³მასზე უწინ ვინ იდგა მასავით მტკიცედ? რადგანაც საღვთო ბრძოლებს იხდიდა.

⁴განა მისი ხელით არ შეჩერდა მზე და ერთი დღე ორად არ იქცა?

⁵მან უხმო უზენაეს მეუფეს, როცა ყოველი მხრიდან ავიწროებდნენ მტრები, და შეისმინა მისი თხოვნა დიდმა უფალმა, მძლეთა-მძლე ძალით რომ ჩამოსტყორცნა სეტყვის ლოდები,

⁶თავს დააყარა მის წინააღმდეგ მეომარ ხალხს და მთის ფერდობზე მოსრა ისინი, რათა შეეცნოთ წარმართებს მთელი მისი საჭურველის ძალა, რადგანაც უფლის შემწეობით იბრძოდა იგი,

⁷კვალდაკვალ რომ მიჰყვებოდა თავის უფალს. მოსეს დროსაც გამოიჩინეს სიქველე მან და ქალებმა, იეფუნეს ძემ, წინ რომ აღუდგნენ კრებულს, ცოდვას განარიდეს ხალხი და ჩაახშეს უკეთური დრტვინვა.

⁸ეს ორნიღა დარჩნენ ექვსასი ათასი ქვეითიდან, რათა შეეყვანათ ხალხი თავიანთ სამკვიდრო ქვეყანაში, სადაც მოედინება რძე და თაფლი.

⁹მისცა უფალმა ქალებს ძალა, რომელიც სიბერემდე შეინარჩუნა, რათა ასულიყო ზეგანზე და მის შთამომავლობას დაემკვიდრებინა იგი;

¹⁰რათა დაენახა ისრაელის ყველა ძეს, რაოდენ სასიკეთოა უფლის კვალდაკვალ სიარული.

¹¹ასევე მსაჯულნიც, თავ-თავიანთი სახელის მიხედვით, რომელთა გულიც არ შებღალულა და არ განდგომიან უფალს; კურთხეულ იყოს მათი ხსოვნა.

¹²ამოყვავილდნენ მათი ძვლები თავიანთი საფლავებიდან და მათი სახელი სადიდებლად გადაეცეს შვილებს.

¹³უფლის მიერ საყვარელმა სამოელმა, უფლისავე წინასწარმეტყველმა, დააარსა სამეფო და მირონი სცხო თავისი ხალხის წინამძღოლთ.

¹⁴უფლის სჯულით განიკითხავდა ხალხს და მოხედა უფალმა იაკობს.

¹⁵ჭეშმარიტი წინასწარმეტყველი იყო თავისი რწმენით და მის სიტყვებში იცნობოდა სარწმუნო ხილვა.

¹⁶ყოვლისმძლე უფალს უხმო, მტრებისგან ყოველმხრივ შევიწროებულმა, და შესწირა ჩვილი ბატკანი.

¹⁷იქუხა ზეცით უფალმა და გრგვინვით ამცნო თავისი ხმა.

¹⁸შემუსრა ცორელთა წინამძღოლნი და ფილისტიმელთა ყველა მთავარი.

¹⁹საუკუნო მიძინების წინ აღიარა უფლისა და მისი მირონცხებულის წინაშე, რომ არათუ ქონება, ხამლიც კი არ აუღია ხორციელისგან; და არც არავის დასცდენია მისი საყვედური.

²⁰მიძინების შემდეგაც იწინასწარმეტყველა და მეფეს აუწყა მისი აღსასრული; წინასწარმეტყველებით აიმაღლა ხმა სამარიდან, რათა წარეხოცა ხალხის უსჯულოება.