Read ბიბლია სიბრძნე ზირაქისა წინათქმა 48 Bible Online

სიბრძნე ზირაქისა წინათქმა 48 - ბიბლია bible

სიბრძნე ზირაქისა წინათქმა 48

¹აღდგა ელია წინასწარმეტყველი, როგორც ცეცხლი, და მწველი იყო მისი სიტყვა, როგორც ლამპარი.

²შიმშილი მოუვლინა მათ და შეამცირა მათი რიცხვი თავისი გულმოდგინებით.

³უფლის სიტყვით ჩაგმანა ზეცა და სამგზის ჩამოიტანა ცეცხლი.

⁴როგორ იდიდე, ელია, შენი სასწაულებით და ვინ დაიქადოს შენი მსგავსებით?

⁵შენ აღადგინე მიცვალებული მკვდრეთით და საიქიოდან უზენაესის სიტყვით.

⁶შენ დაამხე დასაღუპად მეფენი და დიდებულნი თავიანთი სარეცლებიდან.

⁷შემ მოისმინე სინაზე მათი მხილება და ხორებზე — შურისგების მსჯავრი.

⁸შენ სცხე მეფეებს ნაცვლისგებად და წინასწარმეტყველთ, რათა ყოფილიყვნენ შენი მონაცვლენი.

⁹შენ აგიტაცა ცეცხლის გრიგალმა, რათა დაესვი ცეცხლოვანი ცხენების ეტლზე.

¹⁰შენ დაგებედა დროულად გემხილებინა ცოდვილნი, რათა დაგეცხრო უფლის რისხვა, ვიდრე სიშმაგეს მიაღწევდა, შვილის მიმართ მოგექცია მამის გული და აღგედგინა ტომნი იაკობისა.

¹¹ნეტარ არიან შენი მხილველნი, სიყვარულში განსვენებულნი და ჩვენც სიცოცხლით ვცხონდებით.

¹²ელია იყო, გრიგალში რომ დაინთქა, და ელისე აღივსო მისი სულით. არასდროს არ შემკრთალა არცერთი მთავრის წინაშე და ვერც ვერავინ მოადრეკინა ქედი.

¹³ვერც ვისიმე სიტყვით იძლია და თვით განსვენების შემდეგაც წინასწარმეტყველებდა მისი ცხედარი.

¹⁴როგორც სიცოცხლეში მოახდინა სასწაულნი, სიკვდილის შემდეგაც ასევე საკვირველი იყო მისი საქმენი.

¹⁵მაიც არ მოინანია ხალხმა და არ განირიდა ცოდვები, ვიდრე ტყვედ არ წაასხეს თავისი ქვეყნიდან და მთელი დედამიწის ზურგზე არ მიმოიფანტნენ.

¹⁶ძალზე ცოტა ხალხიღა დარჩა და მთავარი — დავითის შთამომავალი. მხოლოდ ზოგი იქცეოდა, როგორც ჯერ არს, ზოგმა კი ამრავლა ცოდვები.

¹⁷ხიზკიამ გაამაგრა თავისი ქალაქი და წყალი შეიყვანა შიგ, წერაქვით გათხარა კლდე და ააგო წყალსაცავი.

¹⁸მის დროს გამოილაშქრა სანხერიბმა და წარმოგზავნა რაბშაკე, რომელმაც ხელი აღმართა სიონზე და ქედმაღლურად იქცეოდა თავგასული.

¹⁹მაშინ შეძრწუნდა მათი გული და ხელი; იტანჯებოდნენ, როგორც ქალი მშობიარობის ტკივილებით გაწამებული.

²⁰ხელაპყრობით უხმეს გულმოწყალე უფალს; წმიდამაც უმალ ისმინა მათი ზეცით და ესაიას ხელით იხსნა ისინი.

²¹მუსრი გაავლო აშურელთა ლაშქარს და მისმა ანგელოზმა მოსრა ისინი.

²²რადგანაც ეზეკია ისე იქცეოდა, როგორც ნებავს უფალს, და მტკიცედ ადგა მამამისის — დავითის გზას, როგორც ამცნო წინასწარმეტყველმა ესაიამ, დიდმა და სარწმუნომ თავისი ხილვებით.

²³მის დროს იყო, რომ უკუიქცა მზე და შეჰმატა მეფეს სიცოცხლის დღენი.

²⁴თავისი დიადი ზეშთაგონებით იხილა ჟამთა დასასრული და ანუგეშა სიონში მგლოვიარენი.

²⁵იუწყებოდა მომავალს უკუნისამდე და დაფარულს — ვიდრე გაცხადდებოდა იგი.