Read ბიბლია სიბრძნე ზირაქისა წინათქმა 51 Bible Online

სიბრძნე ზირაქისა წინათქმა 51 - ბიბლია bible

სიბრძნე ზირაქისა წინათქმა 51

¹გმადლობ, უფალო და მეუფეო, და გაქებ, ღმერთო, მხსნელო ჩემო, მადლობას ვწირავ შენს სახელს.

²რადგანაც შენ იყავ ჩემი მფარველი და მეოხი, შენ იხსენ ჩემი სხეული დაღუპვისაგან, ცილისმწამებელი ენის მახისა და სიცრუის მთხზველ ბაგეთაგან; შენვე იყავი ჩემს წინააღმდეგ აღძრულთაგან ჩემი მხსნელი და მფარველი.

³შენი ულევი წყალობისა და სახელის ძალით განმარიდე ჩემს ჩასანთქმელად გამზადებულ კბილთა ღრჭიალს, ჩემი სულის მძებნელთა ხელს და ურიცხვ სატანჯველს, რაც განვიცადე,

⁴ყოველი მხრიდან შემხუთველ ცეცხლს და ალის ბრიალს, რომელშიაც არ დავიფერფლე,

⁵ჯოჯოხეთის წიაღის სიღრმეს, უწმინდურ ენას და ცრუ მონაჩმახს,

⁶ისევე, როგორც უსამართლო ენის ცილისწამებას მეფის წინაშე. ჩემი სული სიკვდილად იყო მიწურვილი და ჩემი სიცოცხლე — ჯოჯოხეთს მიახლებული.

⁷გარს შემომერტყნენ და არ ჩანდა მხსნელი, თვალით ვეძებდი კაცთა შორის მწეს და მეოხს, მაგრამ ამაოდ.

⁸მაშინ გავიხსენე შენი წყალობა, უფალო, და საქმენი შენნი დასაბამიდან რომ შველი, ვისაც შენი იმედი აქვს და იხსნი მტრების ხელიდან.

⁹აღვავლინე ვედრება ჩემი მიწიდან და გთხოვე, სიკვდილისგან მიხსენი-მეთქი.

¹⁰და ვუხმე უფალს, მამას ჩემი უფლისას, არ მივეტოვებინე გასაჭირში, როცა არსით ჩანდა ხსნა მზვაობართაგან. დაუცხრომლად ვადიდებ შენს სახელს და სამადლობელს გიგალობ.

¹¹რადგანაც შეისმინე ჩემი ვედრება, გადამარჩინე წარწყმედას და უკეთური დროებისგან მიხსენი.

¹²ამიტომაც გაქებ, გადიდებ და ვაკურთხებ სახელს უფლისას.

¹³ჯერ კიდევ ჭაბუკი, ვიდრე ხეტიალს მოვყვებოდი, აშკარად ვეძებდი სიბრძნეს ჩემს ლოცვაში.

¹⁴მასზე ვლოცულობდი ტაძრის წინაშე და ბოლომდე მისი მძებნელი ვიქნები.

¹⁵როგორც შეთვალებულ მტევანს, ისე შეჰხაროდა მას ჩემი გული; სწორი გზა ირჩია ჩემმა ფეხმა და სიჭაბუკიდანვე მის კვალს ვადექი.

¹⁶ოდნავადაც რომ მიმეპყრო ყური, უხვად მეძლეოდა და მრავალ შეგონებას ვპოვებდი ჩემთვის.

¹⁷მისი წყალობით მივაღწიე წარმატებას, ამიტომაც ვადიდებ მას, ვინც მომცა სიბრძნე.

¹⁸გადავწყვიტე მას გავყოლოდი, სიკეთეს ველტვოდი და არ გავწბილებულვარ.

¹⁹ჩემი სული მხნედ შეეჭიდა სიბრძნეს და სჯულსაც ზედმიწევნით ვასრულებდი. მაღლა აღვაპყარ ხელი და დავიტირე უმეცრება ჩემი.

²⁰მისკენ მივიქეც სულით და სიწმიდეში ვპოვე იგი. იმთავითვე მას მივუძღვენ გული და ამიტომაც არ მიმატოვებს.

²¹მის საძებნელად შეიძრა ჩემი შიგანი და ამიტომაც შევიძინე კეთილი განძი.

²²უფალმა ენა მიბოძა ჯილდოდ და ენით შევაქებ მას.

²³მომიახლოვდით, უსწავლელნო, და ჩემს სკოლაში დაიდეთ ბინა.

²⁴რატომ უნდა დარჩეთ დიდხანს უმისოდ, რადგანაც თქვენს სულებს სწყურია იგი.

²⁵გავხსენი პირი და წარმოვთქვი: „შეიძინეთ იგი უვერცხლოდ;

²⁶მის უღელქვეშ მოიდრიკეთ ქედი და თქვენმა სულმა მიიღოს ცოდნა. სულ ახლოს შეიძლება იპოვოთ იგი.

²⁷ხომ თქვენივე თვალითა ხედავთ: მცირედ დავშვერი და დიდი სიმშვიდე კი ვპოვე სანაცვლოდ.

²⁸შეიძინეთ ცოდნა, თუნდაც დიდძალი ვერცხლის ფასად, და მისი წყალობით შეიძენთ უამრავ ოქროს.

²⁹იხაროს თქვენმა სულმა მისი წყალობით და ნუ გრცხვენიათ აქოთ იგი.

³⁰დროულად აკეთეთ თქვენი საქმე, და ისიც დროზე მოგაგებთ სანაცვლოს.“