Read ბიბლია სიბრძნე ზირაქისა წინათქმა 6 Bible Online

სიბრძნე ზირაქისა წინათქმა 6 - ბიბლია bible

სიბრძნე ზირაქისა წინათქმა 6

¹ნუ აღზევდები შენს ფიქრებში, ხარივით რომ არ აიქნას შენი სული.

²შეჭამ შენს ფოთლებს, დაღუპავ ნაყოფს და დარჩები გამხმარ ხესავით.

³ბოროტი სული დაღუპავს პატრონს და მტრების საცინად აქცევს.

⁴ტკბილი ბაგე მეგობრებს იმრავლებს, ამოდმოუბარი ენა კი — კეთილგანწყობას.

⁵მშვიდობისმყოფელნი გიმრავლოს, ხოლო მრჩევლად ერთი გყავდეს ათასში.

⁶თუ მეგობრის შეძენა გსურს, განსაცდელში შეიძინე და მალე ნუ მიენდობი.

⁷რადგანაც ზოგი მეგობარი თავისთვის ზრუნავს და ზურგს შეგაქცევს გასაჭირში.

⁸ზოგი მეგობარი მტრად გექცევა და იბრძოლებს შენს დასამცირებლად.

⁹ზოგი მეგობარი პურსა ჭამს შენთან, მაგრამ გაჭირვების ჟამს მხარში არ ამოგიდგება.

¹⁰შენსავით იქნება შენს მოკეთეებში და წრფელად ისაუბრებს შენიანებთან.

¹¹მაგრამ თუ დაკნინდები, განდგება და თვალით აღარ დაგენახება.

¹²ერიდე მტრებს და წინდახედული იყავი მეგობრებთან.

¹³ერთგული მეგობარი მტკიცე სიმაგრეა, გინდ ის გიპოვია და გინდ საუნჯე.

¹⁴ერთგულ მეგობარს ვერავინ შეცვლის, მისი სიკეთე არ განიზომება.

¹⁵ერთგული მეგობარი სიცოცხლის მკურნალია; უფლის მოშიშნი შეიძენენ მას.

¹⁶უფლის მოშიში მეგობრობას ისე წარმართავს, რომ როგორიც თვითონაა, ისეთივე იყოს მისი მოყვასიც.

¹⁷შვილო, სიყრმიდანვე დაუდე გული სწავლას და ჭაღარის შერთვამდე შეიძენ სიბრძნეს.

¹⁸მხვნელ-მთესველივით მიჰყავი ხელი მას და დაელოდე მის კეთილ ნაყოფს.

¹⁹რადგანაც ერთხანს ქანცი გაგიწყდება მასზე ზრუნვაში, მაგრამ მალე იგემებ მის ნაყოფს.

²⁰სასტიკია უმეცართათვის და უგუნური ვერ გაძლებს მის გვერდით.

²¹საჯილდაო ქვასავით დასძლევს მას და ისიც დაუყოვნებლივ შეეცდება მის გადაგდებას.

²²სიბრძნე ამართლებს თავის სახელს და მრავალს როდი განეცხადება.

²³მისმინე, შვილო, ყურად იღე ჩემი შეგონება და ნუ უარყოფ ჩემს რჩევას.

²⁴მისი ბორკილი დაიდე ფეხზე და მისი ჯაჭვი — ქედზე.

²⁵მხარი შეუდგი და ციმციმ წაიღე, ნუ დაგამძიმებს მისი ბორკილი.

²⁶მიეახლე მთელი სულით და მთელი შენი ძალით მისდიე მის გზას.

²⁷მაშ, იკვლიე და იძიე, მხოლოდ ასე შეიცნობ მას. და როცა დაეუფლები, ნუღარ მიატოვებ

²⁸რადგანაც ბოლოს მასში ჰპოვებ შვებას და სიხარულად გექცევა იგი.

²⁹მისი ბორკილი მტკიცე საფარველი იქნება შენთვის, ხოლო მისი ჯაჭვი — სამოსი დიდებისა.

³⁰რადგანაც მისი ბორკილი ოქროს სამკაულია, ხოლო მისი ჯაჭვი — იაკინთისაგან წნული.

³¹შეიმოსავ მას, როგორც დიდების სამოსს და სიხარულის გვირგვინს დაიდგამ.

³²შვილო, თუ მას ისურვებ, განისწავლები, და თუ სულს მიუძღვნი მას, მრავლისმცოდნე იქნები.

³³თუ სიყვარულით მიაპყრობ ყურს, ჩასწვდები მას, და თუ სმენად იქცევი, ბრძენი გახდები.

³⁴იარე მხცოვანთა საკრებულოში; ვინც ბრძენია, მას მიეახლე. ყური უგდე საღვთო ამბებს და ბრძნული იგავები არ გამოგეპაროს.

³⁵თუ სწავლულს ნახავ, დილაუთენია ეწვიე, დაე, შენმა ფეხმა გაცვითოს მისი ზღურბლი.

³⁶დაუფიქრდი უფლის ბრძანებებს და დღენიადაგ სწავლობდე მის მცნებებს. ის განამტკიცებს შენს გულს და მოგაწყურებს სიბრძნეს.