Read ბიბლია სიბრძნე ზირაქისა წინათქმა 9 Bible Online

სიბრძნე ზირაქისა წინათქმა 9 - ბიბლია bible

სიბრძნე ზირაქისა წინათქმა 9

¹ნუ ეჭვიანობ მეუღლეზე, ცუდად ნუ წვრთნი შენსავ საზიანოდ.

²ნუ მისცემ ცოლს შენს სულს, რათა შენს უფლებას წინ არ აღუდგეს.

³ნუ გახვალ როსკიპის შესახვედრად, რათა მის მახეში არ გაება.

⁴დიდხანს ნუ დაჰყოფ მომღერალ ქალთან, რათა მისმა ხელოვნებამ არ მოგნუსხოს.

⁵ნუ უჭვრეტ ქალწულს, რათა მისმა მშვენებამ არ გაცთუნოს.

⁶ნუ მისცემ მეძავებს შენს სულს, რათა შენი მემკვიდრეობა არ დაღუპო.

⁷თვალს ნუ აცეცებ ქალაქის ქუჩებში და მის უკაცრიელ უბნებში ნუ დახეტიალობ.

⁸თვალი აარიდე ლამაზ ქალს და სხვის მშვენებას ნუ მიაშტერდები, რადგანაც ბევრი შეუცდენია ქალის სიტურფეს: ცეცხლივით ინთება მისგან სიყვარული.

⁹არამც და არამც გვერდით არ მიუჯდე გათხოვილ ქალს და მასთან ღვინის სმას ერიდე, რათა მისკენ არ მიიქცე სულით და თავი არ დაიღუპო.

¹⁰ნუ მიატოვებ ძველ მეგობარს, რადგან ახალი ვერ შეედრება მას. ახალი მეგობარი ახალი ღვინოა; როცა დაძველდება, სიხარულით შესვამ.

¹¹ნუ გშურს ცოდვილის დიდება, რადგანაც არ იცი, როგორი იქნება მისი ბოლო.

¹²ნუ მოგწონს უწმინდურთა მოსაწონი; გახსოვდეს, თვით ჯოჯოხეთამდე ვერ გამართლდებიან ისინი.

¹³შორს დაიჭირე თავი კაცისაგან, ვისაც მოკვლის უფლება აქვს, და შენ ვერ შეგაკრთობს სიკვდილის შიში, მაგრამ თუ დაუახლოვდები, არ შეცდე, რათა არ წაგართვას სიცოცხლე. იცოდე, ყოველი ფეხის ნაბიჯზე მახე გიგია და ქალაქის გალავნის ქონგურებზე მიაბიჯებ.

¹⁴შეძლებისდაგვარად გამოიცანი მოყვასნი და რჩევა ბრძენკაცთ ჰკითხე.

¹⁵გონიერ ხალხს ესაუბრე და უზენაესის სჯულს შეუწონე შენი ნათქვამი.

¹⁶სამართლიანი ხალხი გყავდეს თანამეინახედ და ღვთისმოშიშებით იდიდე.

¹⁷ნახელავი ხელოსნის ოსტატობით იქება, ხალხის მმართველის სიბრძნე კი — სიტყვით.

¹⁸ქალაქისათვის საშიშია ავყია კაცი და საძულველი — როყიოდ მეტყველი.