Read ბიბლია ეს. 23 Bible Online

ეს. 23 - ბიბლია bible

ეს. 23

¹წარმონათქვამი ცორზე: იქვითინეთ, თარშიშის ხომალდებო, რადგან ცორი გაპარტახდა, აღარც სახლია, აღარც შესასვლელი. კვიპროსის ქვეყნიდან ეცნობათ ეს ამბავი.

²დადუმდით, სანაპიროს მცხოვრებნო, ციდონის ვაჭრებო, ზღვაოსნები გავსებდნენ შენ.

³და ბევრ წყლებშია შიხორის თესლი, ნილოსის სამკალი იყო მისი მოსავალი და ხალხების ბაზარი იყო იგი.

⁴გრცხვენოდეს, ციდონ, რადგან ასე თქვა ზღვამ, ზღვის სიმაგრემ: „არ მიტანჯია მე მშობიარობით, არ მიშობია და არ გამიზრდია მე ჭაბუკნი, არ აღმიზრდია ქალწულები.“

⁵როდესაც ამბავი მივა ეგვიპტემდე, აცახცახდებიან ისინი ცორის ამბის გაგონებაზე.

⁶გადადით თარშიშში! იქვითინეთ, კუნძულის მცხოვრებნო.

⁷ესაა თქვენი მხიარული ქალაქი, რომლის დასაბამი ძველთაძველია? ფეხები შორეთში დაატარებენ ხიზნად.

⁸ვინ გადაუწყვიტა ეს ცორს, რომლის სოვდაგარნი დიდებულნი არიან, ვაჭარნი — ქვეყნის ღირსეულნი?

⁹უფალმა ცაბაოთმა გადაწყვიტა შეებღალა დაემცირებინა ქვეყნის ყველა ღირსეული.

¹⁰გადაიარე შენი ქვეყანა, როგორც მდინარე, უკვე აღარაა დაბრკოლება.

¹¹მან თავისი ხელი მოიღერა ზღვაზე, შეძრა სამეფოები; უფალმა ბრძანა ქანაანზე — შეემუსრათ მისი ციხე-სიმაგრენი.

¹²თქვა მან: „აღარ იმხიარულებ მეტად, ადექი, გადაიარე კვიპროსი, მაგრამ არ იქნება შენთვის მოსვენება.“

¹³აჰა, ქალდეველთა ქვეყანა. ეს ხალხი აღარ არის. აშურმა დააფუძნა ის ველურთათვის. მათ აღმართეს საბრძოლო კოშკები, დაანგრიეს მისი სასახლენი, გადააქციეს ნანგრევებად.

¹⁴იქვითინეთ, თარშიშის ხომალდებო, რადგან თქვენი სიმაგრე შემუსვრილია.

¹⁵და მოხდება იმ დღეს, დავიწყებული იქნება ცორი სამოცდაათ წელს, ერთი მეფის ცხოვრების დღეების კვალობაზე; სამოცდაათი წლის ბოლოს დაემართება ცორს, რაც მეძავის სიმღერაშია:

¹⁶„აიღე ქნარი, შემოიარე ქალაქი, დავიწყებულო მეძავო! კარგად დაუკარი, ბევრი იმღერე, რათა გაგიხსენონ შენ!“

¹⁷და მოხდება, სამოცდაათი წლის შემდეგ მოინახულებს უფალი ცორს. და ისევ დაუბრუნდება ცორი თავის სიძვის გასამრჯელოს და ისიძვებს ქვეყნის ყველა სამეფოსთან დედამიწის ზურგზე.

¹⁸და იქნება მისი სავაჭრო და სიძვის გასამრჯელო მიძღვნილი უფლისადმი; არ დაგროვდება საგანძურებსა და საწყობებში, რადგან უფლის წინაშე მცხოვრებთათვის იქნება მისი საქონელი საძღომ საჭმელად და დიდებულ შესამოსელად.