Read ბიბლია ეს. 29 Bible Online

ეს. 29 - ბიბლია bible

ეს. 29

¹ვაი, არიელ, არიელ, დავითის სადგომო ქალაქო! მოუმატეთ წელს წელი, იბრუნონ დღესასწაულებმა.

²და მე შევაჭირვებ არიელს, და იქნება ურვა და ტირილი და მეყოლება არიელივით.

³და დავბანაკდები შენს ირგვლივ, გარს შემოგარტყამ სანგარს და წინ აღგიმართავ გოდლებს.

⁴დამცირდები, მიწიდან ილაპარაკებ და მტვრიდან ყრუდ გამოვა შენი ნათქვამი, და როგორც ხმა მუცლითმეზღაპრისა, მიწიდან იქნება შენი ხმა და მტვრიდან იჩურჩულებს შენი ნათქვამი.

⁵მტვერ-ბუქივით იქნება სიმრავლე შენი მტრებისა და ანიავებული ბზესავით — სიმრავლე სასტიკთა; და უცებ მოხდება, წამისყოფაში.

⁶მოგინახულებს ცაბაოთ უფალი ქარიშხლით, გრიგალითა და შემჭმელი ცეცხლის ალით.

⁷იქნება სიზმარივით, ღამის მოჩვენებასავით ყველა მის წინააღმდეგ გალაშქრებული, მის სიმაგრეთა წინააღმდეგ, და მისი შემაწუხებელნი,

⁸იქნება, როგორც მშიერს ესიზმრება — აჰა, ჭამს იგი; გამოიღვიძებს და ცარიელია მისი კუჭი. და როგორც მწყურვალს ესიზმრება — აჰა, სვამს იგი, გამოიღვიძებს და დაქანცულია და სულს სწყურია ისევ; ასე მოუვა ყველა ხალხს, გალაშქრებულს სიონის მთის წინააღმდეგ.

⁹შეყოვნდით და გაოცდით, მოაჩვენეთ მთვრალნი არიან და არა ღვინისაგან, ირწევიან და არა სასმელისაგან.

¹⁰რადგან მოგაღვარათ უფალმა ძილქუშის სული და დახუჭა თქვენი თვალები — წინასწარმეტყველნი, თქვენი წინამძღოლნი — მხილველნი დააბნელა.

¹¹და იქნება თქვენთვის მთელი ეს ხილვა, როგორც სიტყვები დაბეჭდილი წიგნისა, რომელსაც აძლევენ წიგნის მცოდნეს, ეუბნებიან: „წაიკითხე ეს.“ მაგრამ ის ამბობს: „არ შემიძლია, რადგან დაბეჭდილია.“

¹²და აძლევენ წიგნს იმას, რომელმაც არ იცის წიგნი, და ეუბნებიან: „წაიკითხე ეს.“ მაგრამ ის პასუხობს: „არ ვიცი წიგნი“.

¹³და თქვა უფალმა: „იმის გამო, რომ მომიახლოვდა ეს ხალხი თავისი პირით და თავისი ბაგით პატივს მცემს მე, მისი გული კი შორს არის ჩემგან, — მათი მოშიშობა ჩემს წინაშე ადამიანთა ნასწავლ მცნებად იქცა,

¹⁴ამიტომ, აჰა, კვლავ გავაოცებ ამ ხალხს გასაოცარი საოცრებებით; და დაიკარგება მის ბრძენთა სიბრძნე, და მის გონიერთა გონება დაიმალება.“

¹⁵ვაი მათ, რომელნიც უფლისაგან და ბნელშია მათი საქმენი და ამბობენ: „ვინ გვხედავს ჩვენ?“ და: „ვინ გვიცნობს ჩვენ?“

¹⁶ოი, თქვენი უკუღმართობა! განა მექოთნე და თიხა ერთია? რომ ნაკეთობამ თქვას თავის გამკეთებელზე, და ქმნილებამ თქვას თავის შემქმნელზე: „არაფერი გაეგებაო?“

¹⁷სულ ცოტაც და განა ლიბანი ნაყოფიერ მინდვრად არ იქცევა? და ნაყოფიერი მინდორი ტყედ არ ჩაითვლება?

¹⁸ყრუები მოისმენენ იმ დღეს წიგნის სიტყვებს და წყვდიადიდან და სიბნელიდან ბრმების თვალები იხილავენ.

¹⁹წამებულნი უფრო მეტ სიხარულს ჰპოვებენ უფალში, და ღატაკი ხალხი ისრაელის წმიდაში გაიხარებს.

²⁰რადგან არარად იქცევა დაუნდობელი, და მოისპობა ყველა დამცველი ურჯულოებისა,

²¹სიტყვით რომ აცთუნებენ ადამიანს და კარიბჭესთან მამხილებელს მახეს უგებენ, მართალს უგზოუკვლოდ ახეტიალებენ.

²²ამიტომ ასე თქვა უფალმა, იაკობის სახლის ღმერთმა, რომელმაც გამოისყიდა აბრაამი: „ამიერიდან არ იქნება იაკობი შერცხვენილი

²³რადგან როდესაც დაინახავს თავის შვილებს, წმიდად ჰყოფენ ჩემს სახელს; და განწმედენ იაკობის წმიდას, და ისრაელის ღმერთის შეეშინდებათ.

²⁴სულით ცთომილნი გონს მოეგებიან და მდრტვინავნი ჭკუას ისწავლიან.“