Read ბიბლია ეს. 3 Bible Online

ეს. 3 - ბიბლია bible

ეს. 3

¹რადგან აჰა, უფალი ცაბაოთი აცლის იერუსალიმსა და იუდას საყრდენს და დასაყრდენს, ყოველგვარ პურის საყრდენსა და ყოველგვარ წყლის საყრდენს,

²მამაცსა და მებრძოლს, მსაჯულსა და ჯადოსანსა და უხუცესს,

³ერგასისთავსა და წარჩინებულს, მრჩეველსა და დახელოვნებულ ხუროთმოძღვარს, და გამოცდილ ჯადოქარს.

⁴და დავაყენებ ყმაწვილთ მათ მთავრებად და ჩვილნი იმთავრებენ მათზე.

⁵და შეავიწროებს ხალხი ერთმანეთს, და თითოეული თავის მოყვასს. გაუთავხედდება ყმაწვილი მოხუცს და მდაბალი — პატივცემულს.

⁶როცა ჩაეჭიდება კაცი თავის ძმას „სამოსელი გაქვს, გახდი ჩვენი უფროსი და იყოს ეს ნგრევა შენს ხელქვეშ!“

⁷უპასუხებს ის იმ დღეს ასე: „არ ვიქნები მე უფროსი, როცა ჩემს სახლში არც პურია და არც სამოსელი, ნუ დამაყენებთ მე ხალხის უფროსად!“

⁸რადგან წაბორძიკდა იერუსალიმი და დაეცა იუდა, რადგან მათი ენა და მათი მოქმედება უფლის წინააღმდეგაა, რომ განარისხონ თვალნი მისი დიდებისა.

⁹მათი სახის გამომეტყველება მოწმობს მათ წინააღმდეგ და თავიანთ ცოდვებს ამჟღავნებენ სოდომივით; არც ფარავენ; ვაი მათ სულებს! რადგან თავიანთ თავთ უზღავენ ბოროტს.

¹⁰აქებდეთ მართალს, რადგან კარგია, რადგან ნაყოფს თავიანთი მოქმედებისას შეჭამენ ისინი.

¹¹ვაი ბიწიერ ბოროტმოქმედს, რადგან მიეზღვება მას მისი ხელების ნამოქმედარის მიხედვით.

¹²ჩემი ხალხია მისი შემავიწროვებელი, ჩვილნი და ქალნი მთავრობენ მასზე; ჩემო ხალხო, შენი წინამძღვარნი გაცთუნებენ შენ და ამრუდებენ ბილიკებს შენი გზისა.

¹³დგება უფალი შესაბრძოლებლად და დადგება ხალხთა განსასჯელად.

¹⁴უფალი სამსჯავროზე მოვა მისი ხალხის „თქვენ ააოხრეთ ვენახი და ღარიბების ნაძარცვი თქვენს სახლებშია.

¹⁵რატომ ავიწროებთ ჩემს ხალხსა და აჭირვებთ ღარიბ-ღატაკთ?“ სიტყვა უფლისა, უფალ ცაბაოთისა.

¹⁶და თქვა უფალმა: და დადიან ყელმოღერებულნი და თვალთა თამაშით, გამოდიან ცუნცულით და თავიანთ ფეხთა მოსართავთა ჟღარუნით,

¹⁷გაუქაჩლებს თხემს უფალი სიონის ასულთ; და გამოაჩენს უფალი მათ სიშიშვლეს.“

¹⁸იმ დღეს შემოაცლის უფალი ფეხის მოსართავთა ბრწყინვალებას და თმის ბადეებს და ნახევარმთვარეებს,

¹⁹საყურეებს, სამაჯურებსა და საბურველებს,

²⁰თავსაბურავებს და კოჭის ძეწკვებს, დასტანგებს და ბაფთებს, სურნელის კოლოფებს და თილისმებს,

²¹ბეჭდებსა და ცხვირის რგოლებს,

²²მოხდენილ ტანსაცმელსა და ფარდაგებს, ხელმანდილებსა და ქისებს,

²³გამჭვირვალეებს და ძვირფას ქსოვილებს, დოლბანდებსა და თხელ მოსასხამებს;

²⁴და იქნება სუნამოს ნაცვლად ხრწნა, სარტყლის ნაცვლად — წყლული, ვარცხნის ნაცვლად — თავის სიქაჩლე, კოხტა სარტყლის ნაცვლად — ძაძის სარტყელი, სილამაზის ნაცვლად — დაღი.

²⁵შენი ვაჟკაცნი მახვილით დაეცემიან და შენი მამაცები — ბრძოლაში.

²⁶და იქვითინებენ და იგლოვებენ მისი ბჭენი; და გამოცარიელებული დაჯდება მიწაზე.