Read ბიბლია ეს. 31 Bible Online

ეს. 31 - ბიბლია bible

ეს. 31

¹ვაი მათ, ვინც ეგვიპტეს სთხოვს შემწეობას, ცხენებს მიენდვნენ და ეტლებზე ამყარებენ იმედს, რადგან მრავლადაა, და მხედრებზე, რადგან ფრიად ძლიერნი არიან. ისრაელის წმიდას კი არ მიაპყრეს მზერა და უფალი არ მოიკითხეს.

²მაგრამ ისიც ბრძენია და მოაწევს უბედურებას და თავის სიტყვებს არ აუქმებს; და აღუდგება ბიწიერთა სახლს და ავისმოქმედთა შემწეობას.

³მაგრამ ეგვიპტელნი ადამიანები არიან და არა ღმერთები, და მათი ცხენები ხორცია და არა სული; უფალი მოიღერებს თავის ხელს და წაბორძიკდება შემწე, და დაეცემა შეწევნილიც, და ყველანი ერთად დაიღუპებიან.

⁴რადგან ასე მითხრა მე უფალმა: „როგორც ლომი და როგორც ლომის ბოკვერი ბრდღვინავს თავის ნადავლზე, თუნდაც მოუხმონ მის წინააღმდეგ მთელ მწყემსობას, მათი ხმებისაგან არ დაფრთხება და მათი ხმაურის გამო არ შედრკება, ასე ჩამოვა უფალი ცაბაოთი სიონის მთისათვის და მისი ბორცვისათვის საომრად.“

⁵როგორც ჩიტები დასტრიალებენ ბარტყებს, ისე დაიცავს უფალი ცაბაოთი იერუსალიმს, დაიცავს და უშველის, დაინდობს და გადაარჩენს.

⁶მიუბრუნდით იმას, ვისაც გაუღრმავეთ განდგომა, ისრაელის ძენო.

⁷რადგან იმ დღეს მოიძულებს თითოეული თავისი ვერცხლისა და ოქროს კერპებს, თქვენმა ხელებმა რომ გაგიკეთეს ცოდვისათვის.

⁸დაეცემა აშური მახვილით არა კაცისა, და მახვილი არა ადამიანისა შეჭამს მას. და მახვილს გაექცევა იგი და მისი ჭაბუკები ხარკად იქცევიან.

⁹„და მისი კლდე შიშისაგან გადაივლის და მისი მთავრები დროშაზე დაფრთხებიან“, ბრძანებს უფალი, ვისი ცეცხლიც სიონშია და ღუმელი — იერუსალიმში.