Read ბიბლია ეს. 32 Bible Online

ეს. 32 - ბიბლია bible

ეს. 32

¹აჰა, სამართლიანად იმეფებს მეფე და მთავარნი სიმართლით იმთავრებენ.

²და თითოეული იქნება, როგორც საფარავი ქარში და თავშესაფარი თავსხმაში; როგორც წყლის ნაკადულები გვალვიანში, როგორც ჩრდილი კლდისა გამოფიტულ მიწაზე.

³და თვალს არ მოაცილებენ დამნახველნი, და მსმენელთა ყურნი გაიგონებენ.

⁴და თავქარიანთა გული მიხვდება ჭეშმარიტებას, და ბლუთა ენა ნათლად ალაპარაკდება.

⁵აღარ მოიხსენიებენ არამზადას კეთილშობილად და ძუნწზე არ იტყვიან სულგრძელს,

⁶რადგან მდაბალი სიმდაბლეს ლაპარაკობს, და მისი გული სიავეს სჩადის, რათა მოიქცეს მლიქვნელურად რათა გამოაცარიელოს მშიერის სული, და მწყურვალს სასმელი მოაკლოს.

⁷ძუნწის იარაღი ბოროტეულია; მზაკვრულს განიზრახავს იგი, რომ დააპუროს ღარიბნი სიცრუის სიტყვებით, და ღატაკი, როცა ის სიმართლეს ლაპარაკობს.

⁸ქველი კი სიქველით განიზრახავს და სიქველეზე იდგება.

⁹უზრუნველო ქალებო, ადექით, ისმინეთ ჩემი ხმა; უდარდელო ასულნო, ყური დაუგდეთ ჩემს ნათქვამს.

¹⁰ერთ წელიწადში, რამდენიმე დღეში შეძრწუნდებით, უდარდელო ქალებო, რადგან აღარ იქნება რთველი, ხილის კრეფა არ დადგება.

¹¹გეშინოდეთ, უზრუნველნო, შეძრწუნდით, უდარდელნო, გაიხადეთ და გაშიშვლდით და ძაძა შემოირტყით წელზე.

¹²ძუძუებზე ირტყით საამური ყანების

¹³ჩემი ხალხის მიწაზე ნარი და ეკალი ამოვა, როგორც ყველა მხიარულ სახლზე მოზეიმე ქალაქში.

¹⁴რადგან დაგდებულია სასახლე, ციხე-სიმაგრე და კოშკი გამოქვაბულებად იქცნენ უკუნისამდე — კანჯართა სალაღობოდ, ფარათა სამწყემსად,

¹⁵სანამ არ გადმოიღვრება ჩვენზე სული მაღლიდან და უდაბნო ბაღნარად არ იქცევა და ბაღნარი ტყედ არ შეირაცხება.

¹⁶და დაივანებს უდაბნოში სამართალი და სამართლიანობა ბაღნარში დასახლდება.

¹⁷და იქნება სამართლიანობის საქმე მშვიდობად, და სამართლიანობის სამსახური სიმშვიდედ და უსაფრთხოებად უკუნისამდე.

¹⁸და დასახლდება ჩემი ხალხი მშვიდობის ბინაში, საიმედო სავანეებში და უზრუნველ სამყოფლებში.

¹⁹და იქნება სეტყვა ტყის დაცემისას და ქალაქი დაბლობზე დაეშვება.

²⁰ნეტარნი ხართ, ყველა წყლის პირზე რომ თესავთ, ხარისა და სახედრის ფეხს რომ ათავისუფლებთ.