Read ბიბლია ეს. 52 Bible Online

ეს. 52 - ბიბლია bible

ეს. 52

¹გაიღვიძე, გაიღვიძე, შეიმოსე შენი ძალა, სიონო! შეიმოსე შენი ბრწყინვალების სამოსი, იერუსალიმო, წმიდა ქალაქო, რადგან მეტად აღარ შემოვა შენში წინადაუცვეთელი და უწმიდური.

²ჩამოიბერტყე მტვერი, ადექი, დატყვევებულო იერუსალიმო, გაიხსენი შენი კისრის ჯაჭვები, დატყვევებულო სიონის ასულო!

³რადგან ასე თქვა უფალმა: „მუქთად იყავით თქვენ გაყიდულნი და ვერცხლით ვერ გამოისყიდებით.“

⁴რადგან ასე თქვა უფალმა ღმერთმა: „ეგვიპტეში ჩავიდა ჩემი ერი ერთ დროს, რომ ეცხოვრა იქ, აშური კი არაფრისთვის ჩაგრავდა მას.

⁵ახლა კი, რა დამრჩენია აქ?“ — ამბობს უფალი, — „თუ ჩემი ხალხი მუქთად არის წაყვანილი, მისი განმგებელნი ღმუიან,“ — ამბობს უფალი, — „და მუდამ, ყოველდღე, იბღალება ჩემი სახელი.

⁶ამიტომ შეიტყობს ჩემი ერი ჩემს სახელს, ამიტომ შეიტყობს იმ დღეს, რომ მე ვარ ის, ვინც ამბობს: ‘აქა ვარ!’“

⁷რა მშვენიერია მთებზე ფერხნი მახარობლისა, მშვიდობის მაუწყებლისა, სიკეთის მახარობლისა, ხსნის მაუწყებლისა, რომელიც ეუბნება სიონს: „გამეფდა შენი ღმერთი!“

⁸ხმა შენი გუშაგებისა — აღავლენენ ისინი ხმას, ერთად იმღერებენ, რადგან თავისი თვალით დაინახავენ უფლის დაბრუნებას სიონში.

⁹მხიარულად შემოსძახეთ, იმღერეთ ერთად, იერუსალიმის ნანგრევებო, რადგან ანუგეშა უფალმა თავისი ერი, გამოისყიდა იერუსალიმი.

¹⁰გაიშიშვლა უფალმა თავისი წმიდის მკლავი ყველა ხალხის თვალწინ და დაინახავს დედამიწის ყოველი კიდე ჩვენი ღმერთის მიერ ხსნას.

¹¹გაშორდით, გაშორდით, გადით იქიდან, უწმიდურს არ შეეხოთ, გამოდით მისი წიაღიდან, განიწმიდეთ, უფლის ჭურჭლების მტვირთველნო.

¹²მაგრამ აჩქარებით არ გამოხვალთ და არც ლტოლვილივით ივლით, რადგან თქვენს წინ ივლის უფალი, და თქვენს უკან მცველად — ისრაელის ღმერთი.

¹³აჰა, წარემართება ჩემს მსახურს, აღიმართება, აიწევა და დიდად ამაღლდება.

¹⁴როგორც განცვიფრდნენ მრავალნი, შენი მნახველნი, რადგან დამახინჯებული იყო მისი პირისახე და მისი იერი ადამის ძისას არ ჰგავდა.

¹⁵ასე შეაშფოთებს ის ბევრ ხალხებს, მეფენი მოკუმავენ მის გამო პირს, რადგან დაინახავენ იმას, რაც არ უამბიათ მათთვის, და რაც არ სმენიათ, იმას გაიგებენ.