Read ბიბლია ეს. 8 Bible Online

ეს. 8 - ბიბლია bible

ეს. 8

¹და მითხრა უფალმა: „აიღე შენთვის დიდი გრაგნილი და დაწერე მასზე ჩვეულებრივი ასოებით: მაჰერ შალალ ხაშ ბაზ (ისწრაფე ალაფობა, დააჩქარე ძარცვა!).

²„და ავიყვანე სარწმუნო მოწმენი: ურია მღვდელი და ზაქარია იებერექიაჰუს ძე.“

³და დავუახლოვდი წინასწარმეტყველ ქალს, და დაორსულდა და შვა ძე და მითხრა უფალმა: „უწოდე მას სახელად: ‘მაჰერ შალალ ხაშ ბაზ!’

⁴რადგან, სანამ ყმაწვილი შეძლებს თქვას: ‘მამა’ და ‘დედა’, დამასკოს სიმდიდრესა და სამარიის ნადავლს წაიღებენ აშურის მეფის წინაშე.“

⁵და გააგრძელა უფალმა ჩემთან ლაპარაკი:

⁶„იმის გამო, რომ ხალხმა მოიძულა და უხაროდათ რეცინი და რემალიაჰუს ძე,

⁷ამიტომ უფალი გადმოადენს მათზე — აშურის მეფეს და მთელ მის დიდებას, და აიწევს მისი ყველა კალაპოტიდან და გადმოვა მისი ყველა ნაპირიდან,

⁸და გაივლის იუდაში და წალეკავს და მისი ფრთების გაშლა მთელი შენი ქვეყნის სიგანისა იქნება, ემანუელ!“

⁹აწიოკდით, ხალხებო, და შეძრწუნდით! ყური დაუგდეთ, ქვეყნის ყველა შორეულო მხარეებო! შემოისარტყლეთ და შეძრწუნდით! შემოისარტყლეთ და შეძრწუნდით!

¹⁰განიზრახეთ განზრახვა, მაგრამ დაირღვევა, თქვით სიტყვა, მაგრამ არ შესრულდება, რადგან ჩვენთანაა ღმერთი!“

¹¹რადგან ასე მითხრა უფალმა წინასწარმეტყველური ხელის ძალით და გამაფრთხილა, არ მევლო ამ ხალხის გზით:

¹²„ნუ უწოდებთ შეთქმულებას ყოველივე იმას, რასაც ეს ხალხი უწოდებს შეთქმულებას; და ნუ შეგეშინდებათ იმისი, რისიც მას ეშინია, და ნუ დაფრთხებით.

¹³უფალი ცაბაოთია, წმიდად რომ უნდა შერაცხოთ! და ისაა თქვენი შიში და ისაა თქვენი ზარი.

¹⁴და იქნება ის სიწმიდედ და დაბრკოლების ქვად და წინაღობის კლდედ ისრაელის ორივე ხალხისათვის; მახედ და ბადედ იერუსალიმის მცხოვრებთათვის.

¹⁵და წაბორძიკდებიან მათზე მრავალნი და დაეცემიან და დაილეწებიან, გაებმებიან ბადეში და შეპყრობილ იქნებიან.“

¹⁶შეკარი მოწმობა, დაბეჭდე რჯული ჩემს მოწაფეთა შორის.

¹⁷და დაველოდები უფალს, რომელიც იფარავს თავის სახეს იაკობის სახლისაგან, და ვესავ მას.

¹⁸აი, მე და ბავშვები, რომლებიც მომცა მე უფალმა ნიშებად და სასწაულებად ისრაელში სიონის მთაზე დავანებულ უფალ ცაბაოთისაგან,

¹⁹თუ გეტყვიან: „გამოჰკითხეთ მკვდრის გამომძახებელთ და გრძნეულთ, მოჩურჩულეთ და მუცლით მეზღაპრეებს,“ განა ყოველი ხალხი თავის ღმერთს არ გამოჰკითხავს მკვდართა მეშვეობით ცოცხალთათვის?

²⁰რჯულსა და მოწმობას ვფიცავ, რომ იტყვიან ისინი ისეთ სიტყვას, რომელსაც არა აქვს განთიადი.

²¹და გაივლის მასში გაჭირვებული და მშიერი და, როცა შიმშილი გატანჯავს, გამძვინვარდება, დასწყევლის თავის მეფეს და თავის ღმერთს და აიხედავს ზემოთ,

²²და დახედავს მიწას და აჰა, უბედურება და სიბნელე, გაჭირვების წყვდიადი; და უკუნეთში განიდევნება.