Read ბიბლია ლევ. 11 Bible Online

ლევ. 11 - ბიბლია bible

ლევ. 11

²„უთხარით ისრაელის ძეთ: ‘აჰა, ეს ცხოველები შეგიძლიათ ჭამოთ ყოველ პირუტყვთაგან, რომელიც მიწაზეა:

³ყოველი პირუტყვი, რომელსაც გაყოფილი აქვს ჩლიქი ღრმა ჭრილით და ამოიცოხნის საცოხნელს, ჭამეთ.

⁴„‘ხოლო იმათგანი არ ჭამოთ, რომელნიც ამოიცოხნიან საცოხნელს და არა აქვთ გაყოფილი ჩლიქი. აქლემი, რადგან იგი ამოიცოხნის საცოხნელს, მაგრამ მისი ჩლიქი არაა გაყოფილი, უწმიდურია ის თქვენთვის;

⁵და ბოცვერი, რადგან იგი ამოიცოხნის საცოხნელს, მაგრამ მას არა აქვს გაყოფილი ჩლიქი, უწმიდურია ის თქვენთვის;

⁶და კურდღელი, რადგან იგი ამოიცოხნის საცოხნელს, მაგრამ არა აქვს მას გაყოფილი ჩლიქი, უწმიდურია ის თქვენთვის;

⁷და ღორი, რადგან მას აქვს გაყოფილი ჩლიქი ღრმა ჭრილით, მაგრამ არ ამოიცოხნის საცოხნელს, უწმიდურია ის თქვენთვის.

⁸მათი ხორცი არ ჭამოთ და მათ მძორს არ შეეხოთ; უწმიდურნი არიან ისინი თქვენთვის.

⁹„‘აჰა, ესენი შეგიძლიათ ჭამოთ ყოველთაგან, რომელნიც წყალში არიან, ყოველი, რომელსაც აქვს ფარფლი და ქერეჭი წყალში, ზღვებში და მდინარეებში, ისინი შეგიძლიათ ჭამოთ.

¹⁰და ყოველნი, რომლებსაც არა აქვთ ფარფლი და ქერეჭი ზღვებში და მდინარეებში, წყლის ყოველ ქვეწარმავალთაგან, ყოველ ცოცხალ არსებათაგან, რომელნიც წყალში არიან, საძაგელნი არიან თქვენთვის.

¹¹საძაგელნი უნდა იყვნენ ისინი თქვენთვის: მათი ხორცი არ ჭამოთ და მათი მძორი გძაგდეთ.

¹²ყოველს, რომელსაც არა აქვს ფარფლი და ქერეჭი წყალში, საძაგელია თქვენთვის.

¹³„‘ესენი გძაგდეთ ფრინველთაგან, არ იჭამონ, საძაგელნი არიან ისინი: არწივი, ზღვის ორბი და ზღვის არწივი,

¹⁴და ძერა და შევარდენი მისი გვარისდა მიხედვით.

¹⁵ყოველი ყორანი მისი გვარისდა მიხედვით,

¹⁶და სირაქლემა და თოლია, და ქორი მისი გვარისდა მიხედვით,

¹⁷და კიოტი, თევზიყლაპია და ძენძერუკი,

¹⁸და ჭოტი, ვარხვი და სვავი,

¹⁹და ყარყატი, ყანჩა მისი გვარისდა მიხედვით, ოფოფი და ღამურა.

²⁰„‘ყოველი მწერი — მფრინავი თუ ოთხზე მოსიარულე საძაგელია თქვენთვის.

²¹ეს კი შეგიძლიათ ჭამოთ: ყოველი მფრინავი თუ ოთხზე მოსიარულე მწერი, რომელსაც აქვს წვივები, რათა ხტუნავდეს მით მიწაზე.

²²ესენი შეგიძლიათ ჭამოთ მათგან: კალია, მისი გვარისდა მიხედვით, სოლამი, მისი გვარისდა მიხედვით, ხარგოლი მისი გვარისდა მიხედვით, და ხაგაბი მისი გვარისდა მიხედვით.

²³და ყოველი სხვა მფრინავი მწერი, რომელსაც ოთხი ფეხი აქვს, საძაგელია თქვენთვის.

²⁴„‘მათგან გაუწმიდურდებით. ყოველი, ვინც შეეხება მათს მძორს, გაუწმიდურებული იქნება საღამომდე.

²⁵და ყველამ, ვინც აიღებს რამეს მათი მძორისგან, უნდა გაირეცხოს თავისი სამოსელი და გაუწმიდურებული იქნება საღამომდე.

²⁶„‘ყოველი პირუტყვი, რომელსაც გაყოფილი ჩლიქი აქვს, მაგრამ არა აქვს ღრმა ჭრილი, და არ ამოიცოხნის საცოხნელს, უწმიდურია თქვენთვის. ყოველი, რომელიც შეეხება მათ, გაუწმიდურდება.

²⁷და ყოველი მავალი თავის თათებზე ყოველ ცხოველთაგან, რომლებიც დადიან ოთხზე, უწმიდურია თქვენთვის. ვინც კი შეეხება მათ მძორს, გაუწმიდურებული იქნება საღამომდე.

²⁸მათი მძორის ამღებმა გაირეცხოს სამოსელი და გაუწმიდურებული იქნება ის საღამომდე. გაუწმიდურებული არიან ისინი თქვენთვის.

²⁹„‘აჰა, რა არის უწმიდური თქვენთვის ქვეწარმავალთაგან: დედამიწაზე მხოხავნი: თხუნელა, თაგვი და ხვლიკი მისი გვარისდა მიხედვით,

³⁰ანაკა, მსვენლომი, ძლოკვი, ხომეტი და ქამელეონი.

³¹ესენი უწმიდურები არიან თქვენთვის ყოველ ქვეწარმავალთაგან. ყოველი, რომელიც შეეხება მათ მკვდრებს, გაუწმიდურებული იქნება საღამომდე.

³²და ყველაფერი, რასაც დაეცემა რომელიმე მათგანი მკვდარი, გაუწმიდურდება. ყოველი ჭურჭელი ხისა ან სამოსელი, ან ტყავი, ან ტომარა, და ყოველი საგანი, რომელიც გამოიყენება საქმეში, ჩაშვებულ უნდა იქნას წყალში და უწმიდური იქნება საღამომდე, ხოლო შემდეგ იქნება სუფთა.

³³და ყოველი ჭურჭელი თიხისა, რომელშიც ჩავარდება რომელიმე იმათგანი, ყველაფერი, რაც მასშია, გაუწმიდურდება და უნდა დაამსხვრიოთ.

³⁴ყოველი საჭმელი, რომელიც იჭმება, რომელშიც შეაღწია წყალმა ასეთი ჭურჭლიდან, გაუწმიდურდება. და ყოველი სასმელი, რომელსაც სვამენ ყოველ ასეთ ჭურჭელში.

³⁵და ყველაფერი რაზეც დაეცემა რაიმე, მათი მძორისგან, გაუწმიდურდება. თონე და ქურა უნდა დაიმსხვრეს: ისინი გაუწმიდურებულნი არიან და გაუწმიდურებულნი იქნებიან თქვენთვისაც.

³⁶მხოლოდ წყარო და ჭა — წყალსატევი — სუფთა იქნება. ვინც შეეხება მათ მძორს, გაუწმიდურდება.

³⁷და თუ დაეცა რაიმე მათი მძორისგან რომელიმე მცენარის თესლს, რომელიც ითესება, მაშინ იგი სუფთაა.

³⁸და თუ დაესხა წყალი თესლს და დაეცა რაიმე მძორისაგან, უწმიდური იქნება თქვენთვის.

³⁹„‘თუ მოკვდა პირუტყვთაგანი, რომელიც გეჭმევათ, ვინც შეეხება მის მძორს, უწმიდური იქნება საღამომდე.

⁴⁰და რომელმაც ჭამოს მკვდარი მათგანი, უნდა გარეცხოს თავისი სამოსელი და უწმიდური იქნება საღამომდე; და რომელმაც წაიღოს მისი მძორი, უნდა გარეცხოს თავისი სამოსელი და უწმიდური იქნება საღამომდე.

⁴¹„‘და ყოველი ქვეწარმავალი, რომელიც ქვემძრომობს მიწაზე, საძაგელია, არ უნდა იჭამოს.

⁴²ყოველი, რომელიც ხოხავს მუცელზე, და ყოველი, რომელიც დადის ოთხზე, და ყოველი მრავალფეხიანი ქვეწარმავალთაგან, რომელნიც ქვემძრომობენ მიწაზე, არ ჭამოთ ისინი, რადგან საძაგელნი არიან ისინი.

⁴³ნუ წაბილწავთ თქვენს თავს ყოველი ქვემძრომი ქვეწარმავლით და ნუ გაუწმიდურდებით მათით, და ნუ იქნებით უწმიდურნი მათგან.

⁴⁴რადგან მე ვარ უფალი, ღმერთი თქვენი, განიწმიდეთ და იყავით წმიდები, რადგან წმიდა ვარ მე, და ნუ გააუწმიდურებთ თქვენს თავს ყოველი ქვეწარმავლით, რომელიც ქვემძრომობს მიწაზე.

⁴⁵რადგან, მე ვარ უფალი, რომელმაც გამოგიყვანეთ თქვენ ეგვიპტის ქვეყნიდან, რათა ვიყო თქვენს ღმერთად. და იყავით წმიდა, რადგან წმიდა ვარ მე.

⁴⁶„‘ესაა რჯული პირუტყვისა, ფრინველისა და ყოველი ცოცხალი არსებისა, რომელნიც წყალში იძვრიან, და ყოველი არსებისა, რომელნიც მიწაზე ქვემძრომობენ,

⁴⁷რათა სხვაობა იყოს უწმიდურსა და წმიდას შორის, და ცხოველს შორის, რომელიც შეიძლება შეიჭამოს, და ცხოველს შორის, რომელიც არ უნდა შეიჭამოს.’“