Read ბიბლია ლევ. 18 Bible Online

ლევ. 18 - ბიბლია bible

ლევ. 18

¹და უთხრა უფალმა მოსეს:

²„ელაპარაკე ისრაელის ძეთ და უთხარი მათ: ‘მე ვარ უფალი, ღმერთი თქვენი.

³არ მოიქცეთ მსგავსად ეგვიპტის ქვეყნის მცხოვრებთა, სადაც ცხოვრობდით თქვენ, და მსგავსად ქანაანის ქვეყნის ჩვეულებათა, სადაც მე მიგიყვანთ თქვენ, და მათი წესებით არ იცხოვროთ.

⁴შეასრულეთ ჩემი სამართალნი, და დაიცავით ჩემი წესები, იცხოვრეთ მათით. მე ვარ უფალი, ღმერთი თქვენი.

⁵და დაიცავით ჩემი წესები და ჩემი სამართალნი, რომელთა აღსრულებით იცოცხლებს კაცი. მე ვარ უფალი.

⁶„‘არავინ თავის ხორცით ნათესავს არ მიუახლოვდეს სიშიშვლის გამოსაჩენად. მე ვარ უფალი.

⁷„‘სიშიშვლე მამაშენისა და სიშიშვლე დედაშენისა არ გამოაჩინო. იგი დედაა შენი, არ ახადო მისი სიშიშვლე.

⁸„‘სიშიშვლე მამაშენის ცოლისა არ გამოაჩინო. მამაშენის სიშიშვლეა იგი.

⁹„‘სიშიშვლე შენი დისა, მამაშენის ასულისა ან დედაშენის ასულისა, სახლში შობილისა ან გარეთ შობილისა, არ ახადო მათი სიშიშვლე.

¹⁰„‘სიშიშვლე შენი ძის ასულისა ან შენი ასულის ასულისა, არ ახადო მათი სიშიშვლე, რადგან შენი სიშიშვლეა ისინი.

¹¹„‘სიშიშვლე მამაშენის ცოლის ასულისა, მამაშენისგან შობილისა, შენი და არის იგი, არ ახადო მისი სიშიშვლე.

¹²„‘სიშიშვლე მამაშენის დისა არ ახადო, მამაშენის ხორცია იგი.

¹³„‘სიშიშვლე დედაშენის დისა არ ახადო, რადგან დედაშენის ხორცია იგი.

¹⁴„‘სიშიშვლე მამაშენის ძმისა არ ახადო: მის ცოლს არ მიუახლოვდე, შენი ძალუაა იგი.

¹⁵„‘სიშიშვლე შენი რძლისა არ ახადო: შენი ძის ცოლია იგი.

¹⁶„‘სიშიშვლე შენი ძმის ცოლისა არ ახადო: შენი ძმის სიშიშვლეა იგი.

¹⁷„‘სიშიშვლე შენი ცოლის ასულისა არ ახადო, მისი ძის ასული და მისი ასულის ასული არ ითხოვო სიშიშვლის ასახდელად. ერთი ხორცისანი არიან ისინი. ეს გარყვნილება იქნება.

¹⁸„‘ცოლის დას ნუ ითხოვ მეტოქედ მისი სიშიშვლის ასახდელად ცოლის სიცოცხლეში.

¹⁹„‘ქალს უსუფთაობის ჟამს ნუ მიუახლოვდები მისი სიშიშვლის ასახდელად.

²⁰„‘შენი მოყვასის ცოლთან არ დაწვე თესლის დასაღვრელად, რადგან გაუწმიდურდები მისით.

²¹„‘შენს შთამომავალთაგან არ მისცე ცეცხლში გასატარებლად მოლეხთან და ნუ შებღალავ შენი ღმერთის სახელს; მე ვარ უფალი.

²²„‘მამაკაცთან არ დაწვე, როგორც წვებიან ქალთან. ეს საძაგლობაა.

²³„‘და არავითარ პირუტყვთან არ დაწვე, რადგან გაუწმიდურდები მისით. ქალი არ დადგეს პირუტყვის წინ მასთან შესაუღლებლად. ეს საზიზღრობაა.

²⁴„‘ნუ გაუწმიდურდებით ყოველივე ამით, რადგან ამით იყვნენ გაუწმიდურებულნი ხალხები, რომელთაც თქვენგან ვდევნი მე.

²⁵და გაუწმიდურდა ქვეყანა და დავსაჯე იგი თავისი ცოდვისათვის, და ამოანთხია ქვეყანამ თავისი მცხოვრებნი.

²⁶და თქვენ დაიცავით ჩემი წესები და ჩემი სამართალნი, და ნუ გააკეთებს ნურაფერს ყოველ ამ საძაგლობიდან მკვიდრი და ხიზანი, რომელიც ხიზნობს თქვენს შორის.

²⁷რადგან ყოველი ეს საძაგლობა ჩაიდინა ამ ქვეყნის ხალხმა, რომელიც თქვენზე წინ იყო; და შეიბილწა ქვეყანა;

²⁸და რომ არ ამოგანთხიოთ ქვეყანამ, თუ მას გააუწმიდურებთ, როგორც ამოანთხია მან ხალხი, რომელიც თქვენამდე იყო.

²⁹რადგან ყოველი, ვინც ჩაიდენს რამეს ამ სისაძაგლეთაგან, სიცოცხლე ამის ჩამდენთა მოისპობა მათი ხალხის გარემოდან.

³⁰დაიცავით ჩემი ბრძანებანი, ნუ მოიქცევით ამ საძაგელი წესების მიხედვით, რომლებიც თქვენამდე სრულდებოდა, რომ არ გაუწმიდურდეთ მათით. მე ვარ უფალი, ღმერთი თქვენი.“