Read ბიბლია ლევ. 19 Bible Online

ლევ. 19 - ბიბლია bible

ლევ. 19

¹და უთხრა უფალმა მოსეს:

²„ელაპარაკე ისრაელის ძეთა მთელ თემს და უთხარი მათ: ‘წმიდა იყავით, რადგან წმიდა ვარ მე, უფალი, ღმერთი თქვენი.

³„‘თითოეულს ეშინოდეს თავისი დედისა და თავისი მამისა, და ჩემი შაბათები დაიცავით. მე ვარ უფალი ღმერთი თქვენი.

⁴„‘ნუ მიმართავთ კერპებს და ჩამოსხმულ ღმერთებს ნუ გაიკეთებთ თქვენთვის. მე ვარ უფალი, ღმერთი თქვენი.

⁵„‘და როცა შესწირავთ სამშვიდობო მსხვერპლს უფალს, ისე შესწირეთ, რომ წყალობა მიიღოთ.

⁶თქვენი მსხვერპლშეწირვის დღეს და მეორე დღეს შეიჭამოს იგი, ხოლო ნარჩენი მესამე დღემდე ცეცხლში დაიწვას.

⁷და თუ შეიჭმება მესამე დღეს, საძაგლობა იქნება და არ მიიღება.

⁸მისი მჭამელი თავის ბრალს დაიდებს, რადგან უფლის სიწმიდე შებღალა. და უნდა მოიკვეთოს ის კაცი თავისი ხალხიდან.

⁹„‘და როცა მომკით სამკალს თქვენი მიწისა, არ მოასრულო სამკალი თქვენი ყანის კიდემდე და მკის დროს ჩაბნეულს ნუ აკრეფთ.

¹⁰და თქვენს ვენახს ნუ მოიმცვრევთ, და ვენახში დარჩენილ მარცვლებს ნუ აკრეფთ: ღარიბისა და ხიზნისათვის დატოვეთ ისინი. მე ვარ უფალი, ღმერთი თქვენი.

¹¹„‘არ მოიპაროთ, არ იცრუოთ და არ მოატყუოთ ერთიმეორე.

¹²„‘არ დაიფიცოთ ჩემი სახელი ტყუილზე, და არ შებღალოთ სახელი თქვენი ღმერთისა. მე ვარ უფალი.

¹³„‘არ ავნო შენს მოყვასს და არც არა მოსტაცო, და არ გაათევინო ღამე შენთან მოჯამაგირის შრომის გასამრჯელოს განთიადამდე.

¹⁴„‘არ დასწყევლო ყრუ და ბრმის წინაშე არ დადო დაბრკოლება, არამედ გეშინოდეს შენი ღმერთისა. მე ვარ უფალი.

¹⁵„‘არა ქმნა უსამართლობა სასამართლოში, არ იყო პირმოთნე გლახაკის მიმართ და არ მიეპირფერო ძლიერს: სიმართლით განსაჯე შენი მოყვასი.

¹⁶„‘არ გაავრცელო ჭორი შენს ხალხში, არ აღუდგე შენი მოყვასის სისხლს. მე ვარ უფალი.

¹⁷„‘არ გძულდეს შენი ძმა შენს გულში. მხილებით ამხილე მოყვასი შენი და არ დაგეკისრება ცოდვა მის გამო.

¹⁸„‘არ იძიო შური და არ იღვარძლო შენი ხალხის ძეთა მიმართ და შეიყვარე მოყვასი შენი, როგორც თავი შენი.

¹⁹„‘ჩემი წესები დაიცავით. საქონელი შენი არ შეაუღლო სხვა გვარს; და შენს მინდორზე არ დათესო ორი სხვადასხვა ჯიშის თესლი; და არ ჩაიცვა სელის და მატყლის შერეული ძაფით ნაქსოვი სამოსელი.

²⁰„‘თუ ვინმე დაწვეს ქალთან თესლისდენისთვის და იყოს იგი მხევალი, კაცის დანიშნული, მაგრამ არ იყოს გამოსყიდული, ან თავისუფლება არ ჰქონდეს მინიჭებული, მაშინ სასჯელი უნდა დაედოს, მაგრამ არა სიკვდილი, რადგან იგი არაა თავისუფალი.

²¹და მიიტანოს მან თავისი დანაშაულის მსხვერპლი უფლისათვის საკრებულო კარვის შესასვლელთან: ვერძი დანაშაულის მსხვერპლად.

²²და შეუნდობს მას მღვდელი დანაშაულს ვერძით უფლის წინაშე მისი ცოდვისათვის, რომლითაც შესცოდა.

²³„‘და როცა შეხვალთ ქვეყანაში და დარგავთ რომელიმე მსხმოიარე ხეს, მიიჩნიეთ მისი ნაყოფი წინადაუცვეთლად. სამი წელი უნდა იყოს თქვენთვის წინადაუცვეთლად, არ უნდა იჭამოს.

²⁴მეოთხე წელს იყოს ყოველი მისი ნაყოფი ნაკურთხი უფლის სადიდებლად.

²⁵მეხუთე წელს ჭამეთ თქვენ მისი ნაყოფი, რათა შეიძინოთ მისი მოსავალი. მე ვარ უფალი, ღმერთი თქვენი.

²⁶„‘არ ჭამოთ სისხლიანად, არ იმარჩიელოთ და არ იჯადოქროთ,

²⁷„‘არ შეიკრიჭოთ თმის კიდე თავის ირგვლივ და არ წაახდინო კიდე შენი წვერისა.

²⁸„‘არ დაიკაწროთ მკვდრისთვის თქვენი სხეული და ნუ გაიკეთებთ წარწერებს ჩხვლეტით. მე ვარ უფალი.

²⁹„‘ნუ წაბილწავ შენს ასულს როსკიპობით, რათა არ გაირყვნას ქვეყანა და არ აღივსოს მრუშობით.

³⁰„‘ჩემი შაბათები დაიცავით და ჩემი საკურთხევლის გეშინოდეთ. მე ვარ უფალი.

³¹„‘ნუ მიმართავთ მესულთანეებს და ჯადოსნებს, ნუ ცდილობთ გაუწმიდურებას მათით. მე ვარ უფალი, ღმერთი თქვენი.

³²„‘ჭაღარის წინაშე წამოდექი და პატივი ეცი მოხუცებულის სახეს, და გეშინოდეს შენი ღმერთისა. მე ვარ უფალი.

³³„‘როცა შემოგეხიზნებათ ხიზანი თქვენს ქვეყანაში, არ შეავიწროვოთ იგი.

³⁴როგორც მკვიდრი თქვენს შორის, ისე იყოს თქვენთან ხიზანი და გიყვარდეთ იგი, როგორც თქვენი თავი, რადგან ხიზნები იყავით თქვენც ეგვიპტის ქვეყანაში. მე ვარ უფალი, ღმერთი თქვენი.

³⁵„‘არა ქმნათ უსამართლობა სამართალში, ზომა-წონაში და საწყაოში.

³⁶სწორი სასწორი, სწორი საწონი, სწორი ეფა და სწორი ჰინი გქონდეთ თქვენ. მე ვარ უფალი, ღმერთი თქვენი, რომელმაც გამოგიყვანეთ ეგვიპტის ქვეყნიდან.

³⁷„‘დაიცავით ყოველი ჩემი წესი და ყოველი ჩემი სამართალი. მე ვარ უფალი.’“