Read ბიბლია ლევ. 21 Bible Online

ლევ. 21 - ბიბლია bible

ლევ. 21

¹და უთხრა უფალმა მოსეს: „განუცხადე მღვდლებს, აარონის ძეთ, და უთხარი მათ: ‘არც ერთი მათგანი არ გაუწმიდურდეს მკვდართან შეხებით თავის ხალხში.

²მხოლოდ თავისი ხორციელი ნათესავის გამო: თავისი დედის და თავისი მამის, თავისი ვაჟის და თავისი ასულის, და თავისი ძმის,

³და თავისი დის, თავისი ახლობელი ქალწულისა, რომელიც არ იყო გათხოვილი, შეუძლია შეხება, არ გაუწმიდურება.

⁴ნუ გაიუწმიდურებს თავს კაცი თავის ხალხში, რათა არ წაიბილწოს იგი.

⁵„‘არ გადაიპარსონ თავი და წვერის კიდეები არ შეიჭრან და სხეულზე არ გაიკეთონ ნაჭდევი.

⁶წმიდები უნდა იყვნენ ისინი თავიანთი ღმერთისათვის და არ შებღალონ სახელი თავიანთი ღმერთისა, რადგან უფლის საცეცხლო შესაწირავს, თავიანთი ღმერთის პურსა სწირავენ ისინი, და ამიტომ უნდა იყვნენ ისინი წმიდები.

⁷„‘ქალი მეძავი და წაბილწული არ შეირთონ მათ, ასევე ქალი განქორწინებული თავისი ქმრისაგან არ შეირთონ მათ, რადგან წმიდები არიან თავისი ღმერთისათვის.

⁸შენ აკურთხე ის, რადგან შენს ღმერთს სწირავს იგი პურს. წმიდა იყოს ის შენთვის, რადგან წმიდა ვარ მე, უფალი, თქვენი გამწმედელი.

⁹„‘თუ მღვდლის ასული წაიბილწავს თავს მრუშობით, თავისი მამის წამბილწველია — ცეცხლში დაიწვას იგი.

¹⁰„‘მთავარი მღვდელი თავის ძმათაგან, რომლის თავზე დასხმულ იქნა საცხებელი ზეთი და რომელსაც აუვსეს ხელი, რომ შეიმოსოს წმიდა შესამოსლით, თავს ნუ გაიშიშვლებს, სამოსელს ნუ დაიხევს.

¹¹მკვდართან არავისთან არ უნდა შევიდეს იგი. თავისი მამისა და თავისი დედის გვამითაც კი არ წაიბილწოს თავი.

¹²საწმიდარს არ უნდა მოცილდეს, რათა არ წაბილწოს საწმიდარი თავისი ღმერთისა, რადგან მისი ღმერთის საცხებელი ზეთის გვირგვინია მასზე. მე ვარ უფალი.

¹³„‘ცოლად ქალწული შეირთოს.

¹⁴ქვრივი, ან ქმარგაყრილი, ან წაბილწული მეძავი არ შეირთოს. მხოლოდ ქალწული შეირთოს ცოლად თავისი ხალხიდან.

¹⁵არ წაბილწოს თავისი თესლი თავის ხალხში, რადგან მე ვარ უფალი, მისი განმწმედელი.’“

¹⁶და უთხრა უფალმა მოსეს:

¹⁷„ასე უთხარი აარონს: ‘არავინ შენი თესლიდან თავიანთ თაობებში, რომელსაც ექნება ხინჯი სხეულზე, არ მივიდეს თავისი ღმერთისთვის პურის შესაწირად.

¹⁸არავინ, ვისაც ხინჯი აქვს ტანზე, არ მივიდეს: არც ბრმა არც კოჭლი, ან მახინჯი,

¹⁹ან კაცი, რომელსაც ფეხი აქვს მოტეხილი ან ხელი აქვს მოტეხილი,

²⁰ან კუზიანია, ან ქონდრისკაცია, ან რომელსაც ლიბრი აქვს თვალზე, ან ქეცი, ან დაზიანებული აქვს კვერცხები.

²¹ყოველი კაცი, რომელსაც ხინჯი აქვს აარონ მღვდლის თესლიდან, არ მიეახლოს უფლის საცეცხლო შესაწირავთა შესაწირად, ხინჯიანია ის, არ მიეახლოს თავისი ღმერთისთვის პურის შესაწირად.

²²პური თავისი ღმერთისა ყოვლად წმიდისაგან და წმიდისაგან შეუძლია ჭამოს.

²³მაგრამ ფარდასთან არ მივიდეს და სამსხვერპლოს არ მიეახლოს, რადგან ხინჯი აქვს. არ წაბილწოს ჩემი საკურთხეველი, რადგან მე ვარ უფალი, მათი განმწმედელი’“.

²⁴და ეს გამოუცხადა მოსემ აარონს და მის ძეთ და ყველა ისრაელის ძეს.