Read ბიბლია ლევ. 8 Bible Online

ლევ. 8 - ბიბლია bible

ლევ. 8

¹და უთხრა უფალმა მოსეს:

²„აიყვანე აარონი და მისი ძენი მასთან ერთად, და შესამოსელნი და საცხებელი ზეთი, და ცოდვის მსხვერპლის მოზვერი, და ორი ვერძი, და კალათი ხმიადებით.

³და შეკრიბე მთელი თემი საკრებულო კარვის შესასვლელთან.“

⁴და გააკეთა მოსემ, როგორც უბრძანა უფალმა მას, და შეიკრიბა თემი საკრებულო კარვის შესასვლელთან.

⁵და უთხრა მოსემ თემს: „ეს არის სიტყვა, რომელიც ბრძანა უფალმა შესასრულებლად.“

⁶და მიიყვანა მოსემ აარონი და მისი ძენი, და განბანა ისინი წყლით.

⁷და შემოსა ის კვართით, და შემოარტყა მას სარტყელი და ჩააცვა მას შესამოსელი, და შემოსა ეფოდით, და შემოარტყა მას ეფოდის სარტყელი, და მიამაგრა იმით ეფოდი მასზე.

⁸და დაადო აარონს სამკერდული, და ურიმი და თუმიმი.

⁹და მოახვია დოლბანდი თავზე, და დაადვა დოლბანდს მისი წინაპირიდან ოქროს ფირფიტა, წმიდა გვირგვინი, როგორც უბრძანა უფალმა მოსეს.

¹⁰და აიღო მოსემ საცხებელი ზეთი და სცხო კარავს და ყოველივეს, რაც მასშია, და განწმიდა ისინი.

¹¹და მოასხურა მისგან სამსხვერპლოს შვიდჯერ და სცხო სამსხვერპლოსა და მის ყოველ ჭურჭელს, და მის საბანელს, და მის კვარცხლბეკს მათ განსაწმედად.

¹²და დაღვარა საცხებელი ზეთი აარონის თავზე, და სცხო მას განსაწმედად.

¹³და მოიყვანა მოსემ აარონის ძენი და შემოსა ისინი კვართით, და შემოარტყა მათ სარტყლები, და დაადგა მათ თავსაბურავები, როგორც უბრძანა უფალმა მოსეს.

¹⁴და მიიყვანა მოზვერი ცოდვის მსხვერპლისა და დაასხეს აარონმა და მისმა ძეებმა ხელები ცოდვის მოზვერის თავს.

¹⁵და დაკლა ის და აიღო მოსემ სისხლი და დაადო სამსხვერპლოს რქებს ირგვლივ თავისი თითით, და წარხოცა ცოდვა სამსხვერპლოდან, და სისხლი დაღვარა სამსხვერპლოს საძირკველთან და განწმიდა იგი, რათა შეენდო მისთვის.

¹⁶და აიღო მთელი ქონი, რომელიც შიგნეულზეა, და აპკი ღვიძლისა, და ორივე თირკმელი მათი ქონით, და დააკმია მოსემ სამსხვერპლოზე.

¹⁷მოზვერი და მისი ტყავი, მისი ხორცი და მისი სკორე დაწვა ცეცხლზე ბანაკს გარეთ, როგორც უბრძანა უფალმა მოსეს.

¹⁸და მიიყვანა ვერძი სრულადდასაწველად და დაასხეს აარონმა და მისმა ძეებმა ხელები ვერძს თავზე.

¹⁹და დაკლა მოსემ და მოაპკურა სისხლი სამსხვერპლოს ირგვლივ.

²⁰და ვერძი დაჭრა ასო-ასოდ, და დააკმია მოსემ თავი და ნაჭრები, და ქონი.

²¹და შიგნეული და კანჭები გარეცხა წყლით. და დაწვა მოსემ მთელი ვერძი სამსხვერპლოზე. ეს სრულადდასაწველი კეთილსურნელებაა, იგი საცეცხლო შესაწირავია უფლისათვის, როგორც უბრძანა უფალმა მოსეს.

²²და მოჰგვარა მეორე ვერძი, ავსების ვერძი, და დაასხეს აარონმა და მისმა ძეებმა ხელები ვერძს თავზე.

²³და დაკლა იგი და აიღო მოსემ მისი სისხლი და სცხო აარონის მარჯვენა ყურის ბიბილოს და მისი მარჯვენა ხელის ცერს, და მისი მარჯვენა ფეხის ცერს.

²⁴და მოიყვანა აარონის ძენი, და სცხო მოსემ სისხლი მათი მარჯვენა ფეხის ცერს, და მოაპკურა მოსემ ეს სისხლი სამსხვერპლოს ირგვლივ.

²⁵და აიღო ქონი და დუმა, და მთელი ქონი, რომელიც შიგნეულზეა, და ღვიძლის აპკი და ორივე თირკმელი და მათი ქონი, მარჯვენა ბეჭი.

²⁶და ხმიადების კალათიდან, რომელიც უფლის წინაშეა, აიღო მან ერთი ხმიადის კვერი და ერთი კვერი პურისა, ზეთიანი, და ერთი ნამცხვარი, და დაადო ქონს და მარჯვენა ბეჭს.

²⁷და დადო ყოველივე ეს აარონის ხელისგულებზე და მის ძეთა ხელისგულებზე და შეარხია ისინი შერხევით უფლის წინაშე.

²⁸და აიღო მოსემ ისინი მათი ხელებიდან და დააკმია სამსხვერპლოზე სრულადდასაწველითურთ. ეს ავსების მსხვერპლია კეთილსურნელებად, ეს საცეცხლო შესაწირავია უფლისათვის.

²⁹და აიღო მოსემ მკერდი და მიიტანა და შეარხია იგი შერხევით უფლის წინაშე. ავსების ვერძიდან იყო მოსესთვის ულუფა, როგორც უბრძანა უფალმა მოსეს.

³⁰და აიღო მოსემ საცხებელი ზეთი და სისხლი, რომელიც სამსხვერპლოზე იყო, და მოასხურა აარონს, მის შესამოსელს და მის ძეთა შესამოსელს მასთან ერთად. და განწმიდა აარონი, მისი შესამოსელი და მისი ძენი და მის ძეთა შესამოსელი მასთან ერთად.

³¹და უთხრა მოსემ აარონს და მის ძეთ: „მოხარშეთ ეს ხორცი საკრებულო კარვის შესასვლელთან და იქ ჭამეთ ის პურთან ერთად, რომელიც ავსების კალათშია, როგორც მე ვბრძანე, ‘აარონმა და მისმა ძეებმა ჭამონო ის.’

³²ხოლო ნარჩენი ხორცისა და პურისა ცეცხლში დაწვით.

³³საკრებულო კარვის შესასვლელს არ გაშორდეთ შვიდ დღეს, ვიდრე არ შესრულდება თქვენი ავსების დღეები. რადგან შვიდ დღეს უნდა ივსებოდეს თქვენი ხელები.

³⁴როგორც გაკეთდა ამ დღეს, ასე ბრძანა უფალმა კეთება თქვენი შენდობისთვის.

³⁵და საკრებულო კარვის შესასვლელთან დარჩით შვიდი დღე და ღამე, და დაიმარხეთ უფლის სამარხვო, რათა არ დაიხოცოთ; რადგან ასე მამცნო უფალმა.“

³⁶და აღასრულეს აარონმა და მისმა ძეებმა ყოველივე, რაც უბრძანა უფალმა მოსეს ხელით.